ଭୁବନେଶ୍ୱର,୨୧।୩(ସ୍ପୋର୍ଟ୍ସ ବ୍ୟୁରୋ): ଓଡ଼ିଶାର ୧୨ ବର୍ଷୀୟା ବାଳିକା ଟେନିସ୍ ଖେଳାଳି ସୋହିନୀ ମହାନ୍ତି ଏକ ବିରଳ ସଫଳତା ଅର୍ଜନ କରିଛନ୍ତି। ପ୍ରଥମ ଓଡ଼ିଆ ଟେନିସ ଖେଳାଳି ଭାବେ ସେ ଜାତୀୟ ଚାମ୍ପିୟନଶିପ୍ର ସିଙ୍ଗଲ୍ସ ଫାଇନାଲ ମ୍ୟାଚ୍ ଖେଳିଛନ୍ତି। ସେ ମଧ୍ୟ ୧୪ ବର୍ଷରୁ କମ୍ ମୁମ୍ବାଇ ନ୍ୟାଶନାଲ୍ସ ବାଳିକା ଇଭେଣ୍ଟର ଡବଲ୍ସ ଫାଇନାଲ ମ୍ୟାଚ୍ ଖେଳିଛନ୍ତି। ୫୧ ର଼୍ୟାଙ୍କ୍ର ଖେଳାଳି ଭାବେ ସେ ଭାରତର ୨ ଓ ୬ ନମ୍ବର ଖେଳାଳିଙ୍କୁ ପରାସ୍ତ କରି ଫାଇନାଲରେ ପ୍ରବେଶ କରିଥିଲେ।
ତେବେ ସେ ଉଭୟ ସିଙ୍ଗଲ୍ସ ଓ ଡବଲ୍ସ ଇଭେଣ୍ଟରେ ଫାଇନାଲରେ ପରାସ୍ତ ହୋଇ ରନର୍ସ ଅପ୍ ବିବେଚିତ ହୋଇଛନ୍ତି। ସିଙ୍ଗଲ୍ସ ଫାଇନାଲରେ ସେ ଲଢ଼େଇ କରିଥିଲେ ମଧ୍ୟ ମହାରାଷ୍ଟ୍ରର ଅସ୍ମି ଅଡକରଙ୍କଠାରୁ ୬-୧, ୪-୬, ୨-୬ ସେଟ୍ରେ ପରାସ୍ତ ହୋଇଥିଲେ। ସେହିପରି ଡବଲ୍ସରେ ସୋହିନୀ ଓ ତାଙ୍କ ପାର୍ଟନର ଦିଲ୍ଳୀର ମାନ୍ସୀ ସିଂ ସଂଘର୍ଷ କରି ୭-୫, ୪-୬ ସେଟ୍ରେ ପ୍ରତିପକ୍ଷ ଯୋଡିଙ୍କଠାରୁ ପରାସ୍ତ ହୋଇ ରନର୍ସ ଅପ ହୋଇଥିଲେ। ମାତ୍ର ୧୨ ବର୍ଷ ବୟସରେ ସେ ଏ ପର୍ଯ୍ୟନ୍ତ ୫୯ଟି ଅଲ୍ ଇଣ୍ଡିଆ ଟାଇଟଲ୍ ହାସଲ କରିଛନ୍ତି। ଓଡ଼ିଶାରେ ସେ ଏହି କ୍ରମରେ ସର୍ବାଧିକ ଟାଇଟଲ ହାସଲକାରୀ ଖେଳାଳି ସାବ୍ୟସ୍ତ ହୋଇଛନ୍ତି। ଗତବର୍ଷ ସେ ଜାତୀୟ ୧୨ ବର୍ଷରୁ କମ୍ ସିଙ୍ଗଲ୍ସ ଟୁର୍ନାମେଣ୍ଟରେ ଦୁଇଥର ସେମିଫାଇନାଲରେ ପ୍ରବେଶ କରିଥିଲେ।
କୋଚ୍ ସୟଦ ଫାରହାନ ଅଲୀଙ୍କ ତତ୍ତ୍ୱାବଧାନରେ ସେ କ୍ରମାଗତ ଭାବେ ନିଜ ପ୍ରଦର୍ଶନରେ ଉନ୍ନତି ଆଣିବାରେ ସଫଳ ହୋଇଛନ୍ତି। ନିଜର କଠିନ ପରିଶ୍ରମ ଓ ଅଧ୍ୟବସାୟ ବଳରେ ସେ ୧୨ ବର୍ଷରୁ କମ୍ ଭାରତୀୟ ଡେଭିସ କପ୍ ଜୁନିୟର ଦଳରେ ସ୍ଥାନ ପାଇଥିଲେ। ଭାରତରେ ୧୨ ବର୍ଷରୁ କମ୍ ବର୍ଗରେ ସେ କ୍ୟାରିୟର ଶ୍ରେଷ୍ଠ ର଼୍ୟାଙ୍କିଙ୍ଗ୍ ୨ ନମ୍ବର ସ୍ଥାନ ହାସଲ କରିଥିଲେ।
