ଦିଗପହଣ୍ଡି,୧୪।୯(ଡି.ଏନ.ଏ): କରୋନା ବିରୋଧରେ ଚାଲିଥିବା ଟିକାକରଣ ଅଭିଯାନକୁ ୨୦୦ ଦିନ ବିତିଯାଇଥିଲେ ମଧ୍ୟ ଦିଗପହଣ୍ଡି ସହରରେ ଲୋକଙ୍କୁ ମିଳୁନି କରୋନା ଟିକା। ଗତ ଜାନୁୟାରୀ ୧୬ରୁ ଟିକାକରଣ ଅଭିଯାନ ଶୁଭାରମ୍ଭ କରାଯାଇଥିଲେ ସୁଦ୍ଧା ସ୍ଥାନୀୟ ପ୍ରଶାସନିକ ଅବ୍ୟବସ୍ଥା କାରଣରୁ ସହରର ଟିକାକେନ୍ଦ୍ରକୁ ଆସିପାରୁନି ପ୍ରଥମ ଡୋଜ ଟିକା। ମଙ୍ଗଳବାର ସ୍ଥାନୀୟ ପ୍ରାଥମିକ ବିଦ୍ୟାଳୟ ଟିକା କେନ୍ଦ୍ରରେ ଅସମ୍ଭାଳ ଭିଡ଼ ଦେଖିବାକୁ ମିଳିଥିଲା। ଅବ୍ୟବସ୍ଥା କାରଣରୁ ଦୀର୍ଘସମୟ ଧରି ଟିକା ପାଇଁ ବହୁ ସଂଖ୍ୟକ ଲୋକ ସକାଳୁ ମଧ୍ୟାହ୍ନ ଯାଏ ଧାଡ଼ିରେ ଠିଆ ହୋଇଥିବା ବେଳେ ବିଳମ୍ବ କାରଣରୁ ହୋହାଲ୍ଲା କରିଥିଲେ। ପୋଲିସ ସେଠାରେ ପହଞ୍ଚି ପରିସ୍ଥିତିରେ ସୁଧାର ଆଣିିଥିଲା। ମାତ୍ର ଶହେ ଡୋଜ ଟିକା ଆସିଥିବାରୁ ୫ ଶହରୁ ଊଦ୍ଧର୍ବ ଲୋକ ଟିକା ନ ପାଇ ନିରାଶରେ ଘରକୁ ଫେରୁଛନ୍ତି। ଟିକା କେନ୍ଦ୍ରରେ ଟିକାବଣ୍ଟନରେ ରାଜନୈତିକ ଚାପ ଥିବା ଗୁରୁତର ଅଭିଯୋଗ ହୋଇଛି। ଟିକା ଯୋଗାଣ କରାଯିବା ପଛରେ କିଛି ବ୍ୟକ୍ତିଙ୍କ ମନ୍ଦ ଉଦ୍ଦେଶ୍ୟ ରହିଥିବା ନେଇ ଚର୍ଚ୍ଚା ହେଉଛି। ଏଭଳି ସ୍ଥିତିରେ ଦିଗପହଣ୍ଡି ବ୍ଲକ ଅନ୍ତର୍ଗତ ବିଭିନ୍ନ ପଞ୍ଚାୟତ ଅଧୀନ ଗାଁ ଗୁଡିକରେ ଥିବା ଟିକାକେନ୍ଦ୍ର ଆବଶ୍ୟକ ନଥିଲେ ମଧ୍ୟ ପର୍ଯ୍ୟାପ୍ତ ପରିମାଣରେ ଟିକା ଉପଲବ୍ଧ ହେଉଥିବାବେଳେ ଦିଗପହଣ୍ଡି ସହରବାସୀଙ୍କ ପାଇଁ ଟିକା କାହିଁକି ଆସୁନି ସେ ନେଇ ପ୍ରଶ୍ନବାଚୀ ସୃଷ୍ଟି କରିଛି। ଟିକା ଯୋଗାଣ ଦାୟିତ୍ୱରେ ଥିବା ପ୍ରଶାସନିକ ଅଧିକାରୀ ମାନଙ୍କୁ ପଚାରିଲେ ସେମାନେ ଭିନ୍ନ ଭିନ୍ନ କଥା କହୁଛନ୍ତି। ଏହାକୁ ନେଇ ଜନ ଅସନ୍ତୋଷ ପ୍ରକାଶ ପାଇଛି। ଦିଗପହଣ୍ଡି ସହର ବାସୀଙ୍କୁ ଆବଶ୍ୟକ ମୁତାବକ ପ୍ରଥମ ଡୋଜ ଟିକା ତୁରନ୍ତ ଦିଆନଗଲେ ଆନ୍ଦୋଳନ କରାଯିବ ବୋଲି ପୂର୍ବତନ ଏନ୍ ଏ ସି ଅଧ୍ୟକ୍ଷ ପ୍ରଫୁଲ୍ଲ ପଣ୍ଡା, ଗଞ୍ଜାମ ଜିଲା କଂଗ୍ରେସ କମିଟି ସମ୍ପାଦକ କେ. କୁନା, ନଗର କଂଗ୍ରେସ ସଭାପତି ଦୀପକ କୁମାର ମିଶ୍ର, ପୂର୍ବତନ କାଉନ୍ସିଲର ଏମ. ତ୍ରିନାଥ, ଭାଜପା ନଗର କମିଟି ସଭାପତି ପ୍ରଶାନ୍ତ ପୂଜାରୀ ପ୍ରମୁଖ ଚେତାବନୀ ଦେଇଛନ୍ତି।
