ରାଜକୋଟ,୪।୧: ଭାରତୀୟ ଦଳ ପାଇଁ ୧୦ ବର୍ଷ ପରେ ଟେଷ୍ଟ ଖେଳିଥିବା ସୌରାଷ୍ଟ୍ର ଅଧିନାୟକ ଜୟଦେବ ଉନାଡକଟ ଆଉ ଏକ ରେକର୍ଡ ନିଜ ନାମରେ କରିଛନ୍ତି। ପ୍ରଥମ ଖେଳାଳି ଭାବରେ ସେ ରଣଜୀ ଟ୍ରଫି ମ୍ୟାଚର ପ୍ରଥମ ଓଭରରେ ହାଟ୍ରିକ ଅର୍ଜନ କରିଛନ୍ତି। ମଙ୍ଗଳବାର ଦିଲ୍ଲୀ ବିପକ୍ଷ ରଣଜୀ ମୁକାବିଲାରେ ସେ ଏହି ସଫଳତା ଅର୍ଜନ କରିଛନ୍ତି। ପ୍ରଥମ ଓଭରର ତୃତୀୟ, ଚତୁର୍ଥ ଓ ପଞ୍ଚମ ବଲରେ ସେ ଧ୍ରୁବ ଶୋରେ, ବୈଭବ ରାଓ୍ବଲ ଓ ଅଧିନାୟକ ୟଶ ଧୂଲଙ୍କୁ ଆଉଟ କରିଥିଲେ। ସମାନ ସ୍ପେଲର ପରବର୍ତ୍ତୀ ଓଭରରେ ମଧ୍ୟ ସେ ଅଗ୍ନିବର୍ଷୀ ବୋଲିଂ ସହିତ ଜଣ୍ଟି ସିଦ୍ଧୁ(୪), ଲଳିତ ଯାଦବ(୦) ଓ ଲକ୍ଷ୍ୟ ଥରେଜା(୧)ଙ୍କୁ ଆଉଟ କରିବାରୁ ଦିଲ୍ଲୀର ସ୍କୋର ୧୦/୭ରେ ପହଞ୍ଚିଥିଲା। ତେବେ ହ୍ରିତିକ ଶୋକିନ୍ଙ୍କ ଅପରାଜିତ ୬୮ ଓ ଶିବାଙ୍କ ବଶିଷ୍ଠଙ୍କ ୩୮ ରନ୍ ବଳରେ ଦିଲ୍ଲୀ ୧୩୩ ରନରେ ପହଞ୍ଚି ପାରିଥିଲା। ଉନାଡକଟ ୩୯ ରନ୍ ବ୍ୟୟରେ ୮ ଉଇକେଟ ନେବା ଚଳିତ ସିଜନର ଦ୍ୱିତୀୟ ସର୍ବଶ୍ରେଷ୍ଠ ପ୍ରଦର୍ଶନ ରହିଛି। ପୂର୍ବରୁ ଉତ୍ତରାଖଣ୍ଡର ଦୀପକ ଧପୋଲା ହିମାଚଳ ପ୍ରଦେଶ ବିପକ୍ଷରେ ୩୫ ରନ୍ ଦେଇ ୮ ଉଇକେଟ ଅକ୍ତିଆର କରିଥିଲେ। ଅନ୍ୟପକ୍ଷରେ ରଣଜୀ ଟ୍ରଫି ଇତିହାସରେ ଏହା ଶ୍ରେଷ୍ଠ ପ୍ରଦର୍ଶନ ତାଲିକାରେ ଷଷ୍ଠ ସ୍ଥାନରେ ରହିଛି।
