ଗଞ୍ଜାମ,୨୦।୪(ଡି.ଏନ୍.ଏ.): ବର୍ତ୍ତମାନ ସମୟରେ ସାରା ଦେଶରେ କରୋନା ସଂକ୍ରମଣର ଦ୍ୱିତୀୟ ଲହର ବିସ୍ଫୋରକ ରୂପ ଧାରଣ କରିଛି। ଏହାକୁ ଦୃଷ୍ଟିରେ ରଖି ବିଭିନ୍ନ ରାଜ୍ୟରେ ଲକ୍ଡାଉନ୍, ସଟ୍ଡାଉନ୍ ଆଦି ଘୋଷଣା କରାଯାଉଛି। ଏଥିରେ ଭୟଭୀତ ହୋଇ ଓଡ଼ିଶା ବାହାରେ ରହୁଥିବା ପ୍ରବାସୀ ଓଡ଼ିଆମାନେ ପ୍ରାଣ ବିକଳରେ ନିଜ ଗାଁକୁ ଫେରୁଥିବା ଦେଖାଯାଉଛି। ଗଞ୍ଜାମ ଜିଲା ରମ୍ଭା ଥାନା ଖଣ୍ଡଦେଉଳି ଗ୍ରାମର ବିଶ୍ୱନାଥ ଜେନା ନାମକ ଜଣେ ବ୍ୟକ୍ତି ସୁରଟରୁ ନିଜ ଗାଁକୁ ଫେରିବା ରାସ୍ତାରେ ଟ୍ରେନ୍ରେ ତାଙ୍କ ମୃତ୍ୟୁ ଘଟିଥିବା ଜଣାପଡ଼ିଛି। ତେବେ ତାଙ୍କର ମୃତଦେହ ମଙ୍ଗଳବାର ବ୍ରହ୍ମପୁର ଷ୍ଟେଶନରେ ପଡ଼ିରହିଥିବା ବେଳେ ମୃତ୍ୟୁର କାରଣ ଅସ୍ପଷ୍ଟ ଥିବା ଜିଆର୍ପି ଥାନା ପକ୍ଷରୁ କୁହାଯାଇଛି। ଏହି ଖବର ପ୍ରସାରିତ ହେବା ପରେ ବ୍ରହ୍ମପୁର ରେଳ ଷ୍ଟେଶନରେ ଭୟର ବାତାବରଣ ସୃଷ୍ଟି ହୋଇଛି। ମୃତ ବ୍ୟକ୍ତିଙ୍କ ସାଙ୍ଗରେ ଆସିଥିବା ଲୋକଙ୍କ କରୋନା ଟେଷ୍ଟ କରିବାକୁ ସ୍ଥାନୀୟ ଲୋକେ ଜିଆର୍ପିଙ୍କ ନିକଟରେ ଦାବି କରିଛନ୍ତି। ସେ ଗତ ଦୁଇଦିନ ତଳେ ପୁରୀ ଅହମ୍ମଦାବାଦ ଟ୍ରେନ୍ରେ ସୁରଟରୁ ବସିଥିଲେ। ପୂର୍ବରୁ ତାଙ୍କର ମଧୁମେହ ଥିବା ବେଳେ ଟ୍ରେନ୍ରେ ବାରମ୍ବାର ପରିସ୍ରା ହୋଇଥିବା ସାଙ୍ଗରେ ଆସିଥିବା ସମ୍ପର୍କୀୟ କହିଛନ୍ତି। ମୃତ ବ୍ୟକ୍ତିଙ୍କ ସୁରଟରୁ ଗଞ୍ଜାମ ଜିଲା ଖଲିକୋଟ ପର୍ଯ୍ୟନ୍ତ ଟିକେଟ ରହିଥିଲା। ହେଲେ ଟ୍ରେନ୍ରେ ତାଙ୍କର ମୃତ୍ୟୁ କେଉଁ କାରଣରୁ ହୋଇଛି ସେ ନେଇ ତଦନ୍ତ ଜାରି ରହିଛି।
