କିଭ୍, ୨୩ା୮: ୟୁକ୍ରେନ୍ରେ ରୁଷିଆ ଆକ୍ରମଣକୁ ୧୮୦ ଦିନ ବିତିଗଲାଣି। ହେଲେ ୟୁକ୍ରେନୀୟଙ୍କ ପାଇଁ ଏହି ୬ ମାସ ଯେପରି କେଉଁଠି ଅଟକିଯାଇଛି। ମାତ୍ର ୫ ମାସର ଶିଶୁକୁ ଧରି ପଡ଼ୋଶୀ ପୋଲାଣ୍ଡକୁ ଗତ ମାର୍ଚ୍ଚରେ ପଳାୟନ କରିଥିବା ୟୁକ୍ରେନୀୟ ମହିଳା ତାଇସିଆ ମୋକ୍ରୋଜୁବ୍ ଭାବିଥିଲେ ଅତିବେଶୀରେ ମେ’ ସୁଦ୍ଧା ଯୁଦ୍ଧ ସରିଥିବ। ସେ ପୁଣି ଘରକୁ ଫେରିଆସିବେ। ହେଲେ ଇତିମଧ୍ୟରେ ତାଙ୍କ ଶିଶୁକୁ ୧୧ ମାସ ପୂରିଥିଲେ ବି ରୁଷିଆର ଆକ୍ରମଣ ଜାରି ରହିଛି। ଏବେ ବି ସେ ସ୍ବାମୀ, ପରିବାରଠାରୁ ଦୂରରେ। ନା ସରିଛି ଯୁଦ୍ଧ ନା ପୂରଣ ହୋଇଛି ତାଙ୍କ ଆଶା। ଯୁଦ୍ଧ ଅନ୍ତ ହେବାର କୌଣସି ରାସ୍ତା ଫିଟିପାରି ନ ଥିବାରୁ ଏହା ଆଗକୁ କେତେଦିନ ଧରି ଚାଲିବ ତାହା ମଧ୍ୟ ଅନିଶ୍ଚିତତାରେ। ଏହି କାହାଣୀ କେବଳ ଜଣକର ନୁହେଁ। ଯୁଦ୍ଧ ପ୍ରଭାବିତ ୟୁକ୍ରେନ୍ରୁ ଅନ୍ୟ ଦେଶକୁ ଜୀବନ ରକ୍ଷା ପାଇଁ ପଳାୟନ କରିଥିବା କୋଟିଏରୁ ଊର୍ଦ୍ଧ୍ୱ ୟୁକ୍ରେନୀୟ ଏବେ ଅନିଶ୍ଚିତତା ଭିତରେ ଜୀବନ କାଟୁଛନ୍ତି।
ରୁଷିଆ-ୟୁକ୍ରେନ୍ ମଧ୍ୟରେ ଯୁଦ୍ଧ ଥମିବା ପରିବର୍ତ୍ତେ ଆହୁରି ଭୟଙ୍କର ହୋଇପାରେ ବୋଲି ଆଶଙ୍କା କରାଯାଉଛି। ଆସନ୍ତା ୨୪ ତାରିଖରେ ୟୁକ୍ରେନ୍ ଏହାର ୩୧ ତମ ସ୍ବାଧୀନତା ଦିବସ ପାଳନ କରିବାକୁ ଥିବାବେଳେ ମସ୍କୋ ବଡ଼ଧରଣର ଆକ୍ରମଣ ଯୋଜନା କରିଥିବା ଆଶଙ୍କା କରାଯାଇଛି। ତେଣୁ ସମସ୍ତ ୟୁକ୍ରେନୀୟ ସତର୍କ ରହିବାକୁ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ପରାମର୍ଶ ଦେଇଛନ୍ତି। ରାଜଧାନୀ କିଭ୍କୁ ରୁଷିଆ ଟାର୍ଗେଟ କରିପାରେ ବୋଲି କୁହାଯାଉଥିବାରୁ ଗୁରୁବାର ପର୍ଯ୍ୟନ୍ତ ସ୍ବାଧୀନତା ଦିବସ ରାଲି ଉପରେ କଟକଣା ଲଗାଯାଇଛି। ଖର୍କିଭରେ କର୍ଫ୍ୟୁ ଜାରି ହୋଇଛି। ଦକ୍ଷିଣ ୟୁକ୍ରେନ୍ର କେତେକ ସହର ଉପରେ ରୁଷିଆ ମିଶାଇଲ, ରକେଟ୍ ମାଡ଼ ଜାରି ରଖିଛି। ଜାପୋରିଜିଝିଆ ନ୍ୟୁକ୍ଲିୟର ପ୍ଲାଣ୍ଟ ନିକଟରେ ମସ୍କୋ ବାରମ୍ବାର ଆକ୍ରମଣ କରୁଥିବାରୁ କୌଣସି ବଡ଼ ଧରଣର ଅଘଟଣ ଘଟିପାରେ ବୋଲି କିଭ୍ ଆଶଙ୍କା ବ୍ୟକ୍ତ କରିଛି। ଏହାର ମୁକାବିଲା ପାଇଁ କିଭ୍ ନିଜକୁ ପ୍ରସ୍ତୁତ କରୁଛି।
