ଟିକିରି, ୭ା୧୧(ଡି.ଏନ୍.ଏ.):ରାୟଗଡ଼ା ଜିଲା କଶୀପୁର ବ୍ଲକ ଟିକିରିସ୍ଥିତ ଉତ୍କଳ ଆଲୁମିନା ଇଣ୍ଟରନ୍ୟାଶନାଲ ଲିମିଟେଡ(ୟୁଏଆଇଏଲ)ର ଉଦ୍ୟମୀ ପ୍ରକଳ୍ପ ଗ୍ରାମାଞ୍ଚଳର ଉଦ୍ୟୋଗୀଙ୍କ ପାଇଁ ପ୍ରେରଣା ସାଜିଛି। ଏହି ପ୍ରକଳ୍ପ ଅନେକଙ୍କ ଜୀବନରେ ପରିବର୍ତ୍ତନ ଆଣିଛି। ଜିଲାର ସୁରୁଗଞ୍ଜ ଗ୍ରାମର ସୁରେଶ ନାଏକ ପରିବାର ଚଳାଇବା ପାଇଁ କିଛିବର୍ଷ ତଳେ କେରଳ ଚାଲିଯାଇ ପ୍ରବାସୀ ଶ୍ରମିକ ଭାବେ କାମ କରୁଥିଲେ। ପରେ ଉଦ୍ୟମୀ ପ୍ରକଳ୍ପ ସହାୟତାରେ ଉଦ୍ୟୋଗୀ ହୋଇପାରିଛନ୍ତି। ଏବେ ସେ ଏକ ଫାବ୍ରିକେଶନ ୟୁନିଟର ମାଲିକ ପାଲଟିଛନ୍ତି। ତାଙ୍କ ଜୀବନରେ ହୋଇଥିବା ସକାରାତ୍ମକ ପରିବର୍ତ୍ତନ ପାଇଁ ସେ ଉଦ୍ୟମୀ ପ୍ରକଳ୍ପକୁ ଶ୍ରେୟ ଦେଇଛନ୍ତି। ସୁରେଶଙ୍କ ଭଳି ଅଞ୍ଚଳର ଅନେକ ଉଦ୍ୟୋଗୀ ଏହି ପ୍ରକଳ୍ପରୁ ସୁଫଳ ପାଇଛନ୍ତି।
ଉତ୍କଳ ଆଲୁମିନା ପକ୍ଷରୁ ଅଣ୍ଡରପ୍ରିନ୍ୟୋରଶିପ୍ ଡେଭଲପମେଣ୍ଟ ଇନ୍ଷ୍ଟିଟ୍ୟୁଟ ଅଫ ଇଣ୍ଡିଆ(ଇଡିଆଇଆଇ) ସହଯୋଗରେ ୨୧ ଜୁଲାଇରେ ଆରମ୍ଭ ହୋଇଥିବା ଏହି ଦୀର୍ଘସ୍ଥାୟୀ ଜୀବିକା ଉପାର୍ଜନ କାର୍ଯ୍ୟକ୍ରମ ଅଣକୃଷି ଏବଂ କୃଷି ଆନୁଷଙ୍ଗିକ କ୍ଷେତ୍ରରେ ୩୦୦ ଉଦ୍ୟୋଗୀଙ୍କୁ ପ୍ରୋତ୍ସାହିତ କରିବା ଲକ୍ଷ୍ୟ ରଖିଛି। ଆତ୍ମନିର୍ଭର ଭାରତ ଏବଂ ଏମ୍ଡିଜି ଲକ୍ଷ୍ୟ ହାସଲ ନିମନ୍ତେ ଏହି ପ୍ରକଳ୍ପ ରାୟଗଡ଼ା ଜିଲା କାଶୀପୁର ଏବଂ କଳାହାଣ୍ଡି ଜିଲା ଥୁଆମୂଳରାମପୁରର ଆଭ୍ୟନ୍ତରୀଣ ଦୁର୍ଗମ ଅଞ୍ଚଳଗୁଡ଼ିକରେ କାର୍ଯ୍ୟକାରୀ ହୋଇଛି। ସ୍ଥାନୀୟ ଜନସାଧାରଣଙ୍କର ସାମାଜିକ, ଅର୍ଥନୈତିକ କ୍ଷେତ୍ରରେ ବିକାଶ ଘଟାଇ ସେମାନଙ୍କ ଜୀବନରେ ପରିବର୍ତ୍ତନ ଆଣିବା ଏହାର ଉଦ୍ଦେଶ୍ୟ।
ଉଦ୍ୟମୀ ପ୍ରକଳ୍ପ ବିଷୟରେ ସୂଚନା ଦେଇ ୟୁଏଆଇଏଲ ୟୁନିଟ ମୁଖ୍ୟ ମଜହର ବେଗ କହିଛନ୍ତି, ଏହି ଅନନ୍ୟ ଦୀର୍ଘସ୍ଥାୟୀ ଜୀବିକା ଉପାର୍ଜନ କାର୍ଯ୍ୟକ୍ରମ ସରକାରଙ୍କର ଏମ୍ଏସ୍ଏମ୍ଇ, ଏସ୍ଏମ୍ଇ, ଓଏଲ୍ଏମ୍ ଆଦି ବ୍ୟବସ୍ଥାକୁ ରାଜ୍ୟରେ ସମର୍ଥନ କରୁଛି। ସେହି ସମୟରେ ଏକ ଦୀର୍ଘାବଧି ଆୟ ନିମନ୍ତେ ବାସ୍ତବ କ୍ଷେତ୍ରରେ ଯୋଜନାକୁ ଫଳପ୍ରସୂ କରାଉଛି। ଟିକିରିର ଗୋକୁଳମୁଣ୍ଡା ଗ୍ରାମରେ ଏଣ୍ଟରପ୍ରାଇଜ ମ୍ୟାପିଂ, ବ୍ୟବସାୟିକ ଯୋଜନା ପ୍ରସ୍ତୁତି, ସମ୍ମିଶ୍ରଣ, ବଜାର ସହାୟତା ଆଦି ବ୍ୟବସାୟିକ ବିକାଶ ସେବା ଯୋଗାଇବା ସହ ବଜାର ଚାହିଦା ପୂରଣ କରିବା, ଗ୍ରାମାଞ୍ଚଳ ବ୍ୟବସାୟକୁ ସମର୍ଥନ କରିବା ଏବଂ ଏହି ନୂଆ ବ୍ୟବସାୟୀଙ୍କ କୁଶଳତାରେ ଉନ୍ନତି ଆଣିବା ନିମନ୍ତେ ଏକ ଗ୍ରମାଞ୍ଚଳ ବିଜ୍ନେସ ଇନକ୍ୟୁବେସନ ସେଣ୍ଟର ସ୍ଥାପନ କରାଯାଇଛି। ଏହା ମଧ୍ୟ ଜୀବିକା ଉପାର୍ଜନ କ୍ଲଷ୍ଟର ସୃଷ୍ଟି କରୁଛି ।
