ଓ୍ବାଶିଂଟନ/ନୂଆଦିଲ୍ଲୀ, ୬।୯: ଆମେରିକାରେ ନଭେମ୍ବର ୩ରେ ରାଷ୍ଟ୍ରପତି ନିର୍ବାଚନ ହେବାକୁ ଯାଉଛି। ଶୀଘ୍ର କରୋନା ଟୀକା ବଜାରକୁ ଆଣିବା ପାଇଁ ରାଜନୈତିକ ଦଳ ପକ୍ଷରୁ ଉଦ୍ୟମ କରାଯାଉଛି। ଏହାଦ୍ୱାରା ଭୋଟରଙ୍କୁ ପ୍ରଭାବିତ କରାଯିବାର ଆଶା ରହିଛି। ତେବେ କୌଣସି ରାଜନୈତିକ ଚାପ ଆଗରେ ଆମେରିକା ଔଷଧ କମ୍ପାନୀଗୁଡ଼ିକ ମୁଣ୍ଡ ନୋଇବେନି ବୋଲି ରୋକ୍ ଠୋକ୍ କହିଦେଇଛନ୍ତି। ସୁରକ୍ଷିତ ଏବଂ କରୋନା ବିରୋଧରେ ପ୍ରଭାବଶାଳୀ ହେଉଥିବା ପ୍ରମାଣ ମିଳିବା ପରେ ଟୀକାକୁ ବଜାରକୁ ଛଡ଼ାଯିବ ବୋଲି ଔଷଧ କମ୍ପାନୀଗୁଡ଼ିକ କହିଛନ୍ତି। ଫାଇଜର, ଜନସନ୍ ଆଣ୍ଡ୍ ଜନସନ୍ ଏବଂ ମୋଡର୍ନା ଆଦି ୩ ଔଷଧ କମ୍ପାନୀଗୁଡ଼ିକ ପକ୍ଷରୁ ଏସମ୍ପର୍କିତ ଏକ ମିଳିତ ବିବୃତି ଆସନ୍ତା ସପ୍ତାହରେ ପ୍ରକାଶ ପାଇବ ବୋଲି ସୂଚନା ଦିଆଯାଇଛି। ଗଣମାଧ୍ୟମ ସଂସ୍ଥା ଓ୍ବାଲ ଷ୍ଟ୍ରିଟ୍ ଜର୍ନାଲ ଅନୁସାରେ ଏହି ମିଳିତ ବିବୃତିକୁ ଏବେ ଚୂଡାନ୍ତ ରୂପ ଦିଆଯାଉଛି। ଫାଇଜର ଏବଂ ମୋଡର୍ନା ଔଷଧ କମ୍ପାନୀ ଦ୍ୱାରା ପ୍ରସ୍ତୁତ କରୋନା ଟୀକାର ତୃତୀୟ ପର୍ଯ୍ୟାୟ ଟ୍ରାଏଲ୍ ଜାରି ରହିଛି। ଅପର ପକ୍ଷରେ ଜନସନ୍ ଆଣ୍ଡ୍ ଜନସନ୍ ଦ୍ୱାରା ପ୍ରସ୍ତୁତ ହୋଇଥିବା ଟୀକାର ଦ୍ୱିତୀୟ ପର୍ଯ୍ୟାୟ ଜାରି ରହିଛି। ଟ୍ରାଏଲ୍ ପରେ ସୁରକ୍ଷା ପ୍ରମାଣ ପତ୍ର ଆଧାରରେ ଟୀକାର ବଜାର ପ୍ରବେଶ କରାଯିବ। କୌଣସି ରାଜନୈତିକ ଦଳର ଫାଇଦା ପାଇଁ ସମୟ ପୂର୍ବରୁ କରୋନା ଟୀକାକୁ ବଜାରକୁ ଅଣାଯିବ ନାହିଁ ବୋଲି ସମ୍ପୃକ୍ତ କମ୍ପାନୀମାନେ କହିଛନ୍ତି।
