ଚଣ୍ଡିଖୋଲ,୧୬ା୭(ଡି.ଏନ୍.ଏ.): ବହୁ ଆଶା ଭରସା ନେଇ ହରିଦାସପୁର-ପାରାଦୀପ ରେଳ ପ୍ରକଳ୍ପ ଆରମ୍ଭ ହୋଇଥିଲା। ଓଡ଼ିଶାର ପ୍ରମୁଖ ପର୍ଯ୍ୟଟନସ୍ଥଳୀ ଲଳିତଗିରି, ରନତ୍ଗିରି, ଉଦୟଗିରି, ଓଳାଶୁଣୀ ଓ ଜାତୀୟ ଉଦ୍ୟାନ ଭିତରକନିକାକୁ ବାହାର ରାଜ୍ୟର ପର୍ଯ୍ୟଟକ ଆସିବେ ବୋଲି ସେତେବେଳେ ଘୋଷଣା କରାଯାଇଥିଲା। ତେବେ ଏହାମଧ୍ୟରେ ୨ ବର୍ଷ ହେବ ଏହି ରେଳପଥରେ ମାଲବାହୀ ଟ୍ରେନ୍ ଚଳାଚଳ କରୁଥିଲେ ମଧ୍ୟ ଅଦ୍ୟାବଧି ପାସେଞ୍ଜର ଟ୍ରେନ୍ ଚାଲିପାରିଲା ନାହିଁ। ୨୦୨୦ ଜୁଲାଇ ୩୦ରେ ଏହି ରେଳପଥରେ ପ୍ରଥମ କରି ମାଲବାହୀ ଟ୍ରେନ୍ ଚଳାଚଳ ଆରମ୍ଭ ହୋଇଥିଲା। ଏହାପରେ ପାସେଞ୍ଜର ଟ୍ରେନ୍ ପ୍ରଥମେ ଚଳାଇବାକୁ ଦାବି କରି ଲୋକେ ରେଳରୋକୋ ଆନ୍ଦୋଳନ ଆରମ୍ଭ କରିଥିଲେ। ଫଳରେ ୭ଦିନ ଟ୍ରେନ୍ ଚଳାଚଳ ବନ୍ଦ ରହିଥିଲା। ପରେ ପୂର୍ବତଟ ରେଳପଥ ପକ୍ଷରୁ ପ୍ରତିଶ୍ରୁତି ଦିଆଯାଇଥିଲା ଯେ, କରୋନା କଟକଣା ହଟିବା ପରେ ଏହି ରେଳପଥରେ ପାସେଞ୍ଜର ଟ୍ରେନ୍ ଚାଲିବ। ଏହାମଧ୍ୟରେ ପ୍ରତିଶ୍ରୁତିକୁ ୨ ବର୍ଷ ଅତିକ୍ରମ ହୋଇଗଲାଣି। କିନ୍ତୁ ପାସେଞ୍ଜର ଟ୍ରେନ୍ ଚାଲିପାରିନାହିଁ। କେବେ ଚାଲିବ ତାହା ମଧ୍ୟ ଠିକ୍ରେ କେହି କହି ପାରୁନାହାନ୍ତି। ୨୦୨୧ରେ କେନ୍ଦ୍ର ସରକାର ରେଳ ବଜେଟ୍ରେ ୧୦୦ କୋଟି ଟଙ୍କା ଏହି ରେଳପଥର ଉନ୍ନତି ପାଇଁ ପ୍ରଦାନ କରିଥିଲେ। ଶୀଘ୍ର ୮୨ କିଲୋମିଟର ଅତିକ୍ରମ କରିଥିବା ଏହି ରେଳପଥରେ ବିଭିନ୍ନ ସ୍ଥାନରେ ହୋଇଥିବା ରେଳ ଷ୍ଟେଶନ୍ଗୁଡ଼ିକର ଉନ୍ନତୀକରଣ କରାଗଲାପରେ ପାସେଞ୍ଜର ଟ୍ରେନ୍ ଚାଲିବ ବୋଲି ସେତେବେଳେ ପୂର୍ବତଟ ରେଳପଥ ଓ ରେଳ ବିକାଶ ନିଗମ ଲିମିଟେଡ୍ ତରଫରୁ କୁହାଯାଇଥିଲା।
ସୂଚନା ଥାଉକି, ଭାରତର ପ୍ରଥମ ଫାଟକ ବିହୀନ ରେଳପଥ ଭାବେ ପରିଗଣିତ ହରିଦାସପୁର-ପାରାଦୀପ ରେଳପଥ ୧୯୯୭ରେ କେନ୍ଦ୍ର ସରକାରଙ୍କ ତରଫରୁ ଘୋଷଣା କରାଯାଇ ଜମି ଅଧିଗ୍ରହଣ କାମ ଆରମ୍ଭ ହୋଇଥିଲା। ଏହି କାର୍ଯ୍ୟ ୨୦୦୭ରେ ଶେଷ ହେବାର ଥିବାବେଳେ ଜମି ଅଧିଗ୍ରହଣ ସମସ୍ୟା ଯୋଗୁ ବିଳମ୍ବ ହୋଇଥିଲା। ୨୦୨୦ ଜୁନ୍ରେ ପ୍ରକଳ୍ପ କାର୍ଯ୍ୟ ଶେଷ ହୋଇ ପ୍ରଥମ କରି ମାଲବାହୀ ଟ୍ରେନ୍ ଚାଲିଲା। ଏହି ରେଳପଥ ପିପିପି ମୋଡ୍ରେ ହୋଇଛି, ଯାହାକି ବହୁ ବଡ଼ବଡ଼ କମ୍ପାନୀ ରେଳପଥ ନିର୍ମାଣରେ ଅର୍ଥ ଲଗାଣ କରିଛନ୍ତି। ଉକ୍ତ ରେଳପଥ ମଧ୍ୟରେ ୯ଟି ଷ୍ଟେଶନ୍ ନିର୍ମାଣ କରାଯାଇଛି। ପୂର୍ବରୁ ହରିଦାସପୁର ଷ୍ଟେଶନ ଥିଲାବେଳେ ନୂତନ କରି ଚଣ୍ଡିଖୋଲ, ରନତ୍ଗିରି ରୋଡ୍, ଲଳିତଗିରିରୋଡ୍, ବାଜିପଡ଼ା, କେନ୍ଦ୍ରାପଡ଼ା, ମାର୍ଶାଘାଇ ରୋଡ଼, କଳାଗଡ଼, ନୂଆଗାଁ ଓ ସିଜୁ ଷ୍ଟେଶନ୍ ନିର୍ମାଣ କରାଯାଇଛି। ରେଳ ବିକାଶ ନିଗମ ଲିମିଟେଡ୍ ଏହି ଷ୍ଟେଶନ୍ଗୁଡ଼ିକର ଉନ୍ନତୀକରଣ କାର୍ଯ୍ୟ ହାତକୁ ନେଇଛି। ତେବେ କାର୍ଯ୍ୟ ମନ୍ଥର ଗତିରେ ଚାଲୁଥିବା ହେତୁ ବିକାଶ ପ୍ରକ୍ରିୟାରେ ବାଧା ସୃଷ୍ଟି ହୋଇଛି। ତୁରନ୍ତ ପାସେଞ୍ଜର ଟ୍ରେନ୍ ନ ଚାଲିଲେ ଆଞ୍ଚଳିକ ବିକାଶ ପରିଷଦ ପୁନର୍ବାର ଆନ୍ଦୋଳନକୁ ଓହ୍ଲାଇବ ବୋଲି ଚେତାବନୀ ଦେଇଛି। ଏ ସମ୍ପର୍କରେ ପୂର୍ବତଟ ରେଳପଥର ଲୋକସମ୍ପର୍କ ଅଧିକାରୀ ନିରାକାର ଦାସଙ୍କୁ ପଚାରିବାରେ ସେ କହିଛନ୍ତି, ଉକ୍ତ ରେଳପଥରେ ଷ୍ଟେଶନଗୁଡ଼ିକର ଆଧୁନିକୀକରଣ କାର୍ଯ୍ୟ ଅଦ୍ୟାବଧି ସରିନାହିଁ। ମାଲବାହୀ ଟ୍ରେନ୍ରେ ଯିବାରେ ବିଶେଷ ଅସୁବିଧା ନାହିଁ। ମାତ୍ର ପାସେଞ୍ଜର ଟ୍ରେନ୍ ଯିବାକୁ ହେଲେ ସିଗନାଲ ପଏଣ୍ଟଠୁ ଆରମ୍ଭ କରି ଯାତ୍ରୀଙ୍କ ସମସ୍ତ ପ୍ରକାର ସୁବିଧା ଆବଶ୍ୟକ ଅଛି। ତେଣୁ କାର୍ଯ୍ୟ ଶେଷ ହେଲାପରେ ପାସେଞ୍ଜର ଟ୍ରେନ୍ ଚାଲିବ ବୋଲି ସେ ମତ ରଖିଛନ୍ତି।
