ଭୁବନେଶ୍ୱର,୪। ୮(ବ୍ୟୁରୋ): କମିଶନରେଟ ପୋଲିସର ନିଦ ହଜାଇଥିବା ଦୁଇ ଲୁଟେରା ଗ୍ୟାଙ୍ଗ୍ ଧରାପଡିଛି। ଏଥିସହ ୮ଜଣଙ୍କୁ ଗିରଫ କରାଯାଇଛି। ସେମାନଙ୍କ ନିକଟରୁ ୭୦ ମୋବାଇଲ ଫୋନ୍, ୨୩ ଲାପ୍ଟପ୍, ୯ ବାଇକ ଓ ୨ ଏଲ୍ଇଡି ଟିଭି ଜବତ କରିଛି। ଗିରଫ ଅଭିଯୁକ୍ତମାନେ ହେଲେ ଚକେଇସିଆଣିରେ ରହୁଥିବା ରଞ୍ଜନ ସେନାପତି(୨୦), ମାଳିସାହି ମସ୍ଜିଦ କଲୋନୀର ସଞ୍ଜୟ ବେହେରା(୨୩), ବରମୁଣ୍ଡା ପାଲାମଣ୍ଡପ ସାହିର ମଣ୍ଟୁ ପାଇକରାୟ(୩୮) ଓ ସେକ୍ ଜାଭେଦ(୩୭)। ଏମାନେ ଦୁଇ ଲୁଟେରା ଗ୍ୟାଙ୍ଗ୍ର ସଦସ୍ୟ ହୋଇଥିବାବେଳେ ଏମାନଙ୍କ ନାମରେ ଖାରବେଳ ନଗର, ଖଣ୍ଡଗିରି, ଜଟଣୀ ଓ ଏୟାରଫିଲ୍ଡ ଥାନାରେ ଏକାଧିକ ମାମଲା ରହିଛି। ସେହିପରି ଅନ୍ୟ ୪ଜଣ ହେଲେ ସାମନ୍ତରାପୁରର ଚନ୍ଦନ କୁମାର ପ୍ରଧାନ(୨୭), ଗୁରୁଜଙ୍ଗ ଟାଙ୍ଗିସାହିର ଭାଗବତ ପ୍ରସାଦ ମହାପାତ୍ର(୩୨), ପୁରୀ ଜିଲା ଗୋପର ଆଲୋକ ବେହେରା(୨୮) ଓ ନିମାପଡାର ପ୍ରଦୀପ କୁମାର ଦାଶ(୩୩)। ଏମାନେ ଲୁଟ୍ ଓ ଚୋରି ସାମଗ୍ରୀ କିଣିବା ଅଭିଯୋଗରେ ଗିରଫ ହୋଇଥିଲେ। ତେବେ ଏଥିରେ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ଚଢ଼ାଉ ଜାରି ରହିଥିବା ସୂଚନା ମିଳିଛି।
ଗତ କିଛିଦିନ ହେବ ରାଜଧାନୀରେ ଲୁଟ୍ ଓ ଚୋରି ବଢ଼ି ଯାଇଥିଲା। ପୋଲିସ ଅଧିକାରୀ ମଧ୍ୟ ବର୍ତ୍ତି ପାରି ନ ଥିଲେ। ଶେଷରେ ଏମାନଙ୍କୁ ଧରିବା ପାଇଁ ୩ଟି ସ୍କ୍ବାଡ୍ ଗଠନ କରାଯାଇ ଜେଲ୍ ଫେରନ୍ତା ଲୁଟେରାଙ୍କ ଉପରେ ନଜର ରଖିଥିଲା। ଏନେଇ ଏକ ତାଲିକା ପ୍ରସ୍ତୁତ କରାଯାଇ ଚଢ଼ାଉ ଆରମ୍ଭ ହୋଇଥିଲା। ପୋଲିସ ଦେଇଥିବା ସୂଚନାନୁସାରେ, ଗିରଫ ମଣ୍ଟୁ ଗ୍ୟାଙ୍ଗ୍ ଗଢି ଖଣ୍ଡଗିରି ଓ ତମାଣ୍ଡୋ ଥାନା ଅଞ୍ଚଳରେ ଥିବା ଛାତ୍ରାବାସକୁ ଟାର୍ଗେଟ କରୁଥିଲେ। ଦିନରେ ବ୍ଲୁପ୍ରିଣ୍ଟ୍ ପ୍ରସ୍ତୁତ କରିବା ପରେ ରାତିରେ ସହଯୋଗୀଙ୍କ ସହ ସେ ବାଲ୍କୋନି ଦେଇ ହଷ୍ଟେଲରେ ପଶି ଲାପ୍ଟପ୍ ଓ ମୋବାଇଲ୍ ଫୋନ୍ ସମେତ ଯାହା ପାରୁଥିଲେ ଚୋରି କରୁଥିଲେ। ତେବେ ଯେପରି କେହି ସହଜରେ ଧରିପାରିବେ ନାହିଁ ସେଥିପାଇଁ ସେମାନେ ଦେହରେ ତେଲ ବୋଳି ଯାଉଥିଲେ। ରବିବାର ରାତିରେ ଖଣ୍ଡଗିରି ଅଞ୍ଚଳରେ ଯାଞ୍ଚବେଳେ ମଣ୍ଟୁ ଧରାପଡିଥିଲେ। ତାଙ୍କୁ ପଚରାଉଚରା ପରେ ପୋଲିସ ବିଭିନ୍ନ ସ୍ଥାନରେ ଚଢାଉ କରି ଚୋରି ସାମଗ୍ରୀ ଜବତ କରିବା ସହ ସେସବୁକୁ କିଣିଥିବା ୪ଜଣଙ୍କୁ ଗିରଫ କରାଯାଇଥିଲା।
ସେହିପରି ରଞ୍ଜନ, ସଞ୍ଜୟ ଓ ଜାଭେଦ ଅନ୍ୟଏକ ଗ୍ୟାଙ୍ଗ୍ କରିଥିଲେ। ସେମାନେ ଭିଡ଼ରେ ପଶି ଲୋକଙ୍କ ମୋବାଇଲ ଓ ପର୍ସ ଝାମ୍ପି ନେବା ସହ ରାତିରେ ଯାତ୍ରୀଙ୍କୁ ଅଟକାଇ ଲୁଟୁଥିଲେ। ଏହାସହ ଲୋକଙ୍କ ଘରେ ପଶି ଚୋରି କରୁଥିଲେ। ସ୍ପେଶାଲ ସ୍କ୍ବାଡ୍ ଏକ ଚୋରି ମୋବାଇଲ୍ ଫୋନ୍ର ଇଏମ୍ଆଇ ନମ୍ବରରୁ ସେମାନଙ୍କ ପାଖରେ ପହଞ୍ଚତ୍ଥିଲା।
ଏନେଇ ଡିସିପି ଉମାଶଙ୍କର ଦାଶ କହିଛନ୍ତି, ଲୋକମାନେ ସେକେଣ୍ଡ ହ୍ୟାଣ୍ଡ୍ ସାମଗ୍ରୀ କିଣିବାବେଳେ ରସିଦ ବା ବିଲ୍ ଦେଖି କିଣନ୍ତୁ। ନ ହେଲେ ଜାଣତରେ ହେଉ ଅବା ଅଜାଣତରେ କ୍ରାଇମ୍ କରି ବସିବେ। ପ୍ରମାଣ ମିଳିଲେ ଆମେ ଗିରଫ କରିବାକୁ ବାଧ୍ୟ ହେବୁ। ଏହାସହ ବାଇକ୍ରେ ଜିପିଏସ୍ ଲଗାଇ ନିଜ ହେପାଜତରେ ରଖନ୍ତୁ ବୋଲି ଦାଶ କହିଛନ୍ତି।
