ଭୁବନେଶ୍ୱର,୧୮।୧(ବ୍ୟୁରୋ): ରାଜଧାନୀରେ ଏକ ଚାଞ୍ଚଲ୍ୟକର ଘଟଣା ଘଟିଛି। ସୋମବାର ଭୁବନେଶ୍ୱର ପଟିଆ ରେଳ ଷ୍ଟେଶନ ନିକଟରେ ଦୁଇ ନାବାଳିକାଙ୍କ ହାତଗୋଡ଼ ବାନ୍ଧି ରାତିସାରା ଗଣ ବଳାତ୍କାର କରାଯାଇଥିବା ଅଭିଯୋଗ ହୋଇଛି। ବଳତ୍କାରର ଶିକାର ହୋଇଥିବା ପୀଡ଼ିତା ମଧ୍ୟରୁ ଜଣଙ୍କ ବୟସ ୧୨ ବର୍ଷ ଓ ଅନ୍ୟଜଣେ ୧୪ ବର୍ଷର। ସ୍ଥାନୀୟ ଅଞ୍ଚଳର ୨ ଯୁବକ ଏଭଳି ଅମାନୁଷିକ କାଣ୍ଡ ଘଟାଇଥିବା ଜଣାପଡ଼ିଛି। ମଙ୍ଗଳବାର ସକାଳୁ ନାବାଳିକାଦ୍ୱୟ ଅଭିଯୁକ୍ତଙ୍କ କବଳରୁ ଖସିଆସି ସେମାନଙ୍କ ପରିବାର ଲୋକଙ୍କୁ ଜଣାଇବା ପରେ ଘଟଣା ସାମ୍ନାକୁ ଆସିଥିଲା। ଖବର ପାଇ ଇନ୍ଫୋସିଟି ଥାନା ପୋଲିସ ସହାୟତାରେ ଚାଇଲ୍ଡଲାଇନ କର୍ମକର୍ତ୍ତା ୨ ନାବାଳିକାଙ୍କୁ ଉଦ୍ଧାର କରିଛନ୍ତି। ପରେ ଏନେଇ ଜିଆର୍ପି ଥାନାରେ ଘଟଣା ସଂକ୍ରାନ୍ତରେ ଅଭିଯୋଗ କରାଯାଇଛି। ପୋଲିସ ପୋକ୍ସୋ ଆକ୍ଟ ସହ ଆଇପିସିର ବିଭିନ୍ନ ଦଫାରେ ମାମଲା ରୁଜୁ କରି ଅଧିକ ତଦନ୍ତ ଆରମ୍ଭ କରିଛି। ଏହି ଘଟଣାକୁ ନେଇ ରାଜଧାନୀରେ ଆଲୋଡ଼ନ ସୃଷ୍ଟି ହୋଇଛି।
ସୂଚନା ଅନୁଯାୟୀ, ପୀଡ଼ିତାଦ୍ୱୟ ସୋମବାର ସାରେ ପଟିଆ ରେଳ ଷ୍ଟେଶନକୁ ଯାଇଥିବାବେଳେ ସେମାନଙ୍କୁ ସ୍ଥାନୀୟ ଅଞ୍ଚଳର ଦୁଇ ଯୁବକ ଅପହରଣ କରି ରେଳ ଓଭରବ୍ରିଜ ନିକଟକୁ ନେଇଯାଇଥିଲେ। ଏହାପରେ ସେମାନେ ନାବାଳିକାଦ୍ୱୟଙ୍କୁ ଏକ ଦଉଡିରେ ବାନ୍ଧି ରାତିସାରା ବଳାତ୍କାର କରିଥିଲେ। ଏପଟେ ପୀଡିତାଦ୍ୱୟ କାନ୍ଦିବା ସହ ଯନ୍ତ୍ରଣାରେ ଚିତ୍କାର କରୁଥିଲେ ମଧ୍ୟ ଯୁବକଦ୍ୱୟ ଛାଡି ନ ଥିଲେ। ରାତି ହୋଇଥିବାରୁ ଚିତ୍କାର କେହି ଶୁଣି ପାରି ନ ଥିଲେ। ଏପରିକି ଘଟଣା ବିଷୟରେ ଅନ୍ୟମାନଙ୍କୁ ଜଣାଇଲେ ଜୀବନରୁ ମାରିଦେବାକୁ ଧମକ ଦେଇଥିଲେ। ସକାଳେ ନାବାଳିକାଦ୍ୱୟଙ୍କୁ ଅଭିଯୁକ୍ତମାନେ ଛାଡ଼ି ଦେଇଥିଲେ। ପୀଡିତା ଦ୍ୱୟ ଘରେ ପହଞ୍ଚି ଘଟଣା ବିଷୟରେ ଜଣାଇଥିଲେ। ପରିବାର ଲୋକେ ଏନେଇ ଅଭିଯୁକ୍ତଙ୍କୁ ପଚାରିବାରୁ ସେମାନେ ଘଟଣାକୁ ଚାପି ଦେବାକୁ ଟଙ୍କା ଯାଚିଥିଲେ। ଏନେଇ ଚାଇଲ୍ଡଲାଇନ ଖବର ପାଇବା ପରେ ଜୋନ-୬ ଏସିପି ଓ ଇନ୍ଫୋସିଟି ଥାନାକୁ ଜଣାଇଥିଲେ। ପରେ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚତ୍ ଖୋଳତାଡ଼ କରିଥିଲା। ଏହା ଜିଆର୍ପି ଥାନା ଅଧୀନରେ ଆସୁଥିବାରୁ ସ୍ଥାନୀୟ ପୋଲିସରେ ପରିବାର ପକ୍ଷରୁ ଅଭିଯୋଗ କରାଯାଇଥିଲା। ଏଥିସହ ଚାଇଲ୍ଡଲାଇନ୍ ପୀଡ଼ିତାଦ୍ୱୟଙ୍କୁ ଘଟଣାସ୍ଥଳରୁ ନେଇ ଜିଆର୍ପି ଥାନାରେ ପହଞ୍ଚତ୍ଥିଲା। ତେବେ ଜଣେ ପୀଡ଼ିତାଙ୍କ ମା’ଙ୍କ ପକ୍ଷରୁ ଲିଖିତ ଅଭିଯୋଗ କରାଯାଇଛି। ପୀଡିତାଙ୍କୁ ପଚରାଉଚରା କରାଯିବା ସହ ଅଭିଯୁକ୍ତଙ୍କୁ ଗିରଫ ପାଇଁ ପୋଲିସ ଉଦ୍ୟମ ଚଳାଇଛି। ଅଭିଯୁକ୍ତ ସ୍ଥାନୀୟ ଅଞ୍ଚଳରେ ଥିବା ବଡ଼ପନିକି ଆମିଷ ଦୋକାନରେ କାମ କରୁଥିବା ସୂଚନା ମିଳିଛି।
