ସମ୍ବଲପୁର,୨୬ା୨(ବ୍ୟୁରୋ): ସମ୍ବଲପୁର ଜିଲା ବୁର୍ଲା ଥାନା ଗୋଶାଳା କ୍ଲବପଡ଼ାରେ ଶୁକ୍ରବାର ଏକ ଅଭାବନୀୟ ଘଟଣା ଘଟିଛି। ଗାଡ଼ିଆରେ ବୁଡ଼ି ୨ ଶିଶୁକନ୍ୟାଙ୍କ ମୃତ୍ୟୁ ଘଟିଛି। ସେମାନେ ହେଲେ ଡୋଲେଶ୍ୱରୀ ଛୁରିଆ(୩) ଓ ନିଶା ମହାନନ୍ଦ(୩)। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାରବର୍ଗଙ୍କୁ ହସ୍ତାନ୍ତର କରିଛି। ଘଟଣାକୁ ନେଇ ଗୋଶାଳା ଅଞ୍ଚଳରେ ଶୋକର ଛାୟା ଖେଳିଯାଇଛି। ମିଳିଥିବା ରିପୋର୍ଟ ଅନୁସାରେ ସକାଳ ପ୍ରାୟ ୮ଟା ସମୟରେ ପ୍ରତିଦିନ ଭଳି ଦୁଇ ଶିଶୁକନ୍ୟା ଖେଳିବାକୁ ଯାଇଥିଲେ। ଘରଠାରୁ କିଛି ଦୂରରେ ଏକ ଗାଡ଼ିଆ ରହିଛି। ଖେଳୁଥିବା ସମୟରେ ଦୁଇ ଶିଶୁ ଗାଡ଼ିଆ ଭିତରେ ପ୍ରାୟ ୩ଫୁଟ ଗଭୀର ପାଣିରେ ବୁଡ଼ିଯାଇଥିଲେ। ଦେଢଘଣ୍ଟା ପରେ ପିଲାମାନଙ୍କୁ ନ ପାଇ ପରିବାର ଲୋକେ ଚିନ୍ତିତ ହୋଇପଡ଼ିଥିଲେ। ପାଖ ପଡ଼ିଶାରେ ପଚରାଉଚୁରା କରିଥିଲେ। ପରେ ସନ୍ଦେହରେ ଗାଡ଼ିଆରେ ଖୋଜାଖୋଜି କରି ଅଚେତ ଅବସ୍ଥାରେ ଉଦ୍ଧାର କରିଥିଲେ। ତୁରନ୍ତ ସେମାନଙ୍କୁ ବୁର୍ଲା ଭିମ୍ସାରକୁ ନିଆଯାଇଥିଲେ ହେଁ ସେଠାରେ ଡାକ୍ତର ମୃତ ଘୋଷଣା କରିଥିଲେ।
