ବଡ଼ବିଲ,୧୮ା୫(ସ୍ବ.ପ୍ର.): କେନ୍ଦୁଝର ଜିଲା ବଡ଼ବିଲ ଥାନା ଷ୍ଟେଶନ ରୋଡ୍ସ୍ଥିତ ଇଣ୍ଡଷ୍ଟ୍ରିଆଲ ଏରିଆର ଏକ ଓ୍ବାର୍କଶପ୍ରୁ ବିଭିନ୍ନ ଲୁହା ସାମଗ୍ରୀ ଚୋରି ଅଭିଯୋଗରେ ପୋଲିସ ବୁଧବାର ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ଦ୍ୱୟ ହେଲେ ବଡ଼ବିଲ ଲକ୍ଷ୍ମୀନଗର ଅଞ୍ଚଳର ସୁନୀଲ ପାତ୍ର ଏବଂ ଇନ୍ଦିରା କଲୋନୀ ଅଞ୍ଚଳର ରଘୁନାଥ ଗୋପ।
ସୂଚାନୁଯାୟୀ, ବଡ଼ବିଲ ଇଣ୍ଡଷ୍ଟ୍ରିଆଲ ଏରିଆସ୍ଥିତ ବଡ଼ବିଲ ଷ୍ଟିଲ୍ ଫେବ୍ରିକେଶନ ଓ୍ବାର୍କଶପରୁ ଗତ ସୋମବାର ବିଳମ୍ବିତ ରାତିରେ ଦୁଇ ଜଣ ଦୁର୍ବୃତ୍ତ ବିଭିନ୍ନ ଲୁହା ସାମଗ୍ରୀ ଚୋରି କରିଥିବା ନେଇ ମଙ୍ଗଳବାର ଅଭିଯୋଗ କରିଥିଲେ। ତେବେ ପୋଲିସ ବଡ଼ବିଲ ଥାନା କେସ ନଂ. ୮୯/୨୨ରେ ଏ ନେଇ ଏକ ମାମଲା ରୁଜୁ କରି ତଦନ୍ତ ଜାରି ରଖିଥିଲା। ବୁଧବାର ପୋଲିସ ଉକ୍ତ ଚୋରିରେ ସଂପୃକ୍ତ ଦୁଇ ଅଭିଯୁକ୍ତଙ୍କୁ ଗିରଫ କରିବା ସହ ଚୋରି ଯାଇଥିବା ସାମଗ୍ରୀଗୁଡ଼ିକୁ ଉଦ୍ଧାର କରିଥିବା ଜଣାପଡ଼ିଛି। ବୁଧବାର ଅଭିଯୁକ୍ତ ଦ୍ୱୟଙ୍କୁ କୋର୍ଟ ଚାଲାଣ କରାଯାଇଛି।
