ପାଟଣା,୨୨।୯(ବୀର କିଶୋର ଦାଶ): ଗତ ୨୦ ତାରିଖରେ ଠାକୁରମୁଣ୍ଡା ଥାନାରୁ ଜବତ ପିକଅପ ଭ୍ୟାନରେ ୬ ମଇଁଷିକୁ ନେଇ କେନ୍ଦୁଝର ଜିଲା ତୁରୁମୁଙ୍ଗା ଥାନା ରାଜନଗର ନନ୍ଦିନୀ ଗୋଶାଳାକୁ ଅଣାଯାଉଥିବା ସମୟରେ ପୋଲିସକୁ ପିସ୍ତଲ ଦେଖାଇ ୨ ଗିରଫ ହୋଇଛନ୍ତି। ରାଜନଗର ବୈତରଣୀ ନଦୀ ପୋଲ ନିକଟରୁ ଠାକୁରମୁଣ୍ଡା ପୋଲିସକୁ ପିସ୍ତଲ ଦେଖାଇ ପିକଅପ ଭ୍ୟାନକୁ ଛଡ଼ାଇ ନେଇଯାଇଥିବା ଅଭିଯୋଗରେ ସୋମବାର ତୁରୁମୁଙ୍ଗା ୨ ଜଣଙ୍କୁ ଗିରଫ କରି କୋର୍ଟଚାଲାଣ କରାଯାଇଛି। ଅପହରଣ କରି ନେଇଥିବା ଓଡ଼ି ୦୪ୟୁ୧୧୭୩ନମ୍ବର ପିକଅପ ଗାଡିକୁ ଠାକୁରମୁଣ୍ଡା ପୋଲିସ ଯାଜପୁର ଜିଲା ଧର୍ମଶାଳାରୁ ଉଦ୍ଧାର କରି ଗାଡି ସହ ଦୁଇ ଜଣକୁ ଆଣି ତୁରୁମୁଙ୍ଗା ପୋଲିସକୁ ଜିମା ଦେଇଥିଲା। ଠାକୁରମୁଣ୍ଡା ଥାନାର ହୋମଗାର୍ଡ ଇନ୍ଦ୍ରମଣି ନାଏକ ଅଭିଯୋଗ ଆଧାରରେ ପୋଲିସ ଦୁଇ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ଗାଡି ମାଲିକ ଯାଜପୁର ଜିଲା ଧର୍ମଶାଳା ଥାନା ଜାରକା ଜାମୁବଣିଆ ସାହିର ସୁବ୍ରତ ମହାରଣା(୩୬) ଏବଂ ତାଙ୍କ ସହଯୋଗୀ ମୃତ୍ୟୁଞ୍ଜୟ ରଥ (୨୭) । ଏନେଇ ତୁରୁମୁଙ୍ଗା ଥାନା ରେ ୨୩୭/୨୫ ରେ ମାମଲା ରୁଜୁ ହେବା ସହ ଏସଆଇ କିରଣ ସାହୁ ଘଟଣାର ତଦନ୍ତ କରୁଛନ୍ତି।
