ଭୋପାଳ,୨୪।୫: ବିବାହର ମାତ୍ର ୫ ମାସ ପରେ ହୋଇଥିବା ଟ୍ବିଶା ଶର୍ମାଙ୍କ ସନ୍ଦେହଜନକ ମୃତ୍ୟୁ ମାମଲା ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି। ମୃତ୍ୟୁର ୧୩ ଦିନ ପରେ ଆଜି ଅର୍ଥାତ ରବିବାର ଭୋପାଳର ଭଦଭଦା ବିଶ୍ରାମ ଘାଟରେ ସା ପ୍ରାୟ ୫ଟା ସମୟରେ ତାଙ୍କର ଅନ୍ତିମ ସଂସ୍କାର କରାଯିବ।
ଦିଲ୍ଲୀ ଏମ୍ସ (AIIMS)ର ଚାରି ଜଣିଆ ବରିଷ୍ଠ ଡାକ୍ତରୀ ଦଳଙ୍କ ଦ୍ୱାରା ଭୋପାଳରେ ତ୍ୱିଶାଙ୍କର ଦ୍ୱିତୀୟ ପୋଷ୍ଟମର୍ଟମ (ମୃତଦେହ ବ୍ୟବଚ୍ଛେଦ) କରାଯାଉଛି। ପରିବାର ଲୋକଙ୍କ କହିବା ଅନୁସାରେ, ସମସ୍ତ ମେଡିକାଲ ପ୍ରକ୍ରିୟା ଶେଷ ହେବା ପରେ ହିଁ ଅନ୍ତିମ ସଂସ୍କାର କରାଯିବ।
ଗତ ମେ ୧୨ ତାରିଖରେ ଶ୍ୱଶୁର ଘରେ ଟ୍ବିଶାଙ୍କର ସନ୍ଦେହଜନକ ମୃତ୍ୟୁ ହୋଇଥିଲା। ମୃତ୍ୟୁର ଏତେ ଦିନ ବିତିଯାଇଥିଲେ ମଧ୍ୟ ସଠିକ ଯାଞ୍ଚ ପାଇଁ ଏପର୍ଯ୍ୟନ୍ତ ତାଙ୍କର ସଂସ୍କାର ହୋଇପାରି ନ ଥିଲା। ଟ୍ବିଶାଙ୍କ ପରିବାର ଲୋକଙ୍କ ଆରୋପ ଅନୁସାରେ, ଶ୍ୱଶୁର ଘରଲୋକେ ପ୍ରଭାବଶାଳୀ ହୋଇଥିବାରୁ ପ୍ରକୃତ ସତ୍ୟକୁ ଲୁଚାଇବାକୁ ଚେଷ୍ଟା କରାଯାଉଥିଲା। ଏହି କାରଣରୁ ସେମାନେ ଦ୍ୱିତୀୟ ପୋଷ୍ଟମର୍ଟମ ପାଇଁ ଦାବି କରିଥିଲେ। ମଧ୍ୟପ୍ରଦେଶ ହାଇକୋର୍ଟଙ୍କ ନିର୍ଦ୍ଦେଶ ପରେ ଦିଲ୍ଲୀ ଏମ୍ସର ଏକ ସ୍ବତନ୍ତ୍ର ଟିମ୍ ରବିବାର ସକାଳେ ଭୋପାଳରେ ପହଞ୍ଚିଛନ୍ତି। ଟ୍ବିଶାଙ୍କ ଭାଇ ଆଶିଷ ଶର୍ମା କହିଛନ୍ତି ଯେ ସମସ୍ତ ଆଇନଗତ ପ୍ରକ୍ରିୟା ପରେ ନିର୍ଦ୍ଧାରିତ ସମୟରେ ଅନ୍ତିମ ସଂସ୍କାର କରାଯିବ।
ଏହି ମାମଲାର ମୁଖ୍ୟ ଅଭିଯୁକ୍ତ ତଥା ଟ୍ବିଶାଙ୍କ ସ୍ବାମୀ ସମର୍ଥ ସିଂହଙ୍କୁ ପୋଲିସ ଗିରଫ କରିଛି। ପ୍ରାୟ ୧୦ ଦିନ ଧରି ଫେରାର ରହିବା ପରେ ପୋଲିସ ତାଙ୍କୁ ଧରିବାରେ ସଫଳ ହୋଇଥିଲା। ଏହାପରେ ଭୋପାଳ କୋର୍ଟ ସମର୍ଥଙ୍କୁ ୭ ଦିନିଆ ପୋଲିସ ରିମାଣ୍ଡରେ ପଠାଇଛନ୍ତି।
ପୋଲିସ ଜେରା ସମୟରେ ସମର୍ଥ ଦାବି କରିଛନ୍ତି ଯେ, ଗର୍ଭବତୀ ହେବା ପରେ ଟ୍ବିଶାଙ୍କ ବ୍ୟବହାରରେ ପରିବର୍ତ୍ତନ ଆସିଥିଲା। ସେ ବେଙ୍ଗାଲୁରୁ ଯିବାକୁ ମନା କରି ଅଜମେରରେ ରହିବାକୁ ଚାହୁଁଥିଲେ।
ବର୍ତ୍ତମାନ ପୋଲିସ ଏବଂ ତଦନ୍ତକାରୀ ସଂସ୍ଥା ଏହି ମାମଲାର ସବୁ ଦିଗକୁ ଗମ୍ଭୀରତାର ସହ ଯାଞ୍ଚ କରୁଛନ୍ତି। ଦ୍ୱିତୀୟ ପୋଷ୍ଟମର୍ଟମ ରିପୋର୍ଟ ଆସିବା ପରେ ଆଗାମୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଅପରପକ୍ଷେ ଝିଅକୁ ନ୍ୟାୟ ପ୍ରଦାନ କରିବା ପାଇଁ ଟ୍ବିଶାଙ୍କ ପରିବାର ଲୋକେ ଅଡ଼ି ବସିଛନ୍ତି।