ନୂଆଦିଲ୍ଲୀ,୧୩।୯: ଚଳିତ ଥର ଦେଶର ରାଜଧାନୀ ଦିଲ୍ଲୀରେ ରାମଲିଳା ଭବ୍ୟ ସହକାରେ ଆୟୋଜିତ ହେବା ପାଇଁ ପୁରା ଜୋରସୋରରେ ପ୍ରସ୍ତୁତି ଚାଲିଛି। ବିଶେଷ କଥା ହେଉଛି ଏଥର ରାମଲୀଳାରେ କ୍ୟାବିନେଟ ମନ୍ତ୍ରୀ ଓ ଟିଭି କଳାକାରଙ୍କୁ ଏକାଠି ଦେଖିବାକୁ ମିଳିବ। ଏଥିରେ ଅଶ୍ୱିନୀ କୁମାର ଚୌବେ ଋଷି ବୈଶିଷ୍ଠ, ଫଗାନ ସିଂ କୁଲାସ୍ତେ ଋଷି ଅଗସ୍ତ୍ୟ ଏବଂ ଧୀବର ଭୂମିକାରେ ଉତ୍ତର-ପୂର୍ବ ଦିଲ୍ଲୀର ଭାଜପା ବିଧାୟକ ମନୋଜ ତିୱାରୀ ଙ୍କ ଅଭିନୟ ଦେଖିବାକୁ ମିଳିବ। ସେହିପରି ଅର୍ଜୁନ ରାମ ମେଘୱାଲ ଭଜନ ଗାଇବେ ବୋଲି ଜଣାପଡ଼ିଛି। ଭେଟେରାନ ଅଭିନେତା ଅସରାନୀ ନାରଦ ଭୂମିକାରେ ନଜର ଆସିବେ। ସେପ୍ଟେମ୍ବର ୨୬ରୁ ଆରମ୍ଭ ହୋଇ ଏହା ଦଶହରାରେ ଶେଷ ହେବ। ତେବେ ୧୦ଦିନ ଧରି ଚାଲିବାକୁ ଥିବା ଏହି କାର୍ଯ୍ୟକ୍ରମରେ ମନ୍ତ୍ରୀ ଓ କଳାକାରମାନେ ମିଳିତ ଭାବେ ରାମଲୀଳାରେ ରାମଙ୍କ ପୁରୁଣା କାହାଣୀକୁ ଜୀବନ୍ତ କରିବାକୁ ଚେଷ୍ଟା କରିବେ। କେବଳ ଏତିକି ନୁହେଁ, ଏଥର ଦର୍ଶକମାନେ କର୍ତ୍ତବ୍ୟ ପଥ ମଡେଲ ଏବଂ ସବୁଠୁ ବଡ଼ ମଞ୍ଚ ଦେଖିବାକୁ ପାଇବେ। ଏଥର ଦଶହରାରେ ବାହୁବଲୀ ଫେମ୍ ଅଭିନେତା ପ୍ରଭାସ ରାବଣର ପୁତ୍ତଳିକା ଜଳାଇବେ। ଭାରତର ସ୍ବାଧୀନତାର ୭୫ତମ ବାର୍ଷିକୀ ପାଳନ ଅବସରରେ ପଡ଼ିଆରେ ୭୫ଟି ତ୍ରିରଙ୍ଗା ପତାକାରେ ସଜାଯିବ। ରାମଲୀଳା ପଡ଼ିଆର ମୁଖ୍ୟ ଫାଟକରେ ପ୍ରଭୁ ରାମଙ୍କ ଫଟୋ ଲଗାଯିବ, ଯାହାର ନାମ ‘ରାମ ଦ୍ୱାର’ ରଖାଯିବ ବୋଲି ଲୁଭ କୁଶ ରାମଲୀଳା କମିଟିର ସଭାପତି ଅର୍ଜୁନ କୁମାର କହିଛନ୍ତି। ସେହିପରି ଦ୍ୱିତୀୟ ଫାଟକକୁ ‘ନେତାଜୀ ସୁଭାଷ ଚନ୍ଦ୍ର ବୋଷ ଦ୍ୱାର’ କୁହାଯିବ। ତାଙ୍କର ପ୍ରତିମୂର୍ତ୍ତି ଏଠାରେ ଲଗାଯିବ। ପଡ଼ିଆରେ ୧୮୦X୬୦ ଫୁଟର ଏକ ତିନି ମହଲା ମଞ୍ଚ ତିଆରି କରାଯିବ। ଯାହା ଉପରେ ଏକ ବଡ଼ ରାମ ମନ୍ଦିର ନିର୍ମାଣ ହେବ। ଏହା ପୂର୍ବରୁ ଏହା ୧୨୦X୪୮ ଫୁଟ ମଞ୍ଚ ତିଆରି ହେଉଥିଲା। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ନିମନ୍ତ୍ରଣ କରାଯାଇଛି ବୋଲି ଅର୍ଜୁନ କୁମାର କହିଛନ୍ତି। ଅନ୍ୟପଟେ ମୁମ୍ବାଇର ମେକ୍ଅପ୍ ଆଟିଷ୍ଟ ବିଷ୍ଣୁ ପାଟିଲ ରାମଲୀଳା ସମୟରେ ଦିଲ୍ଲୀରେ ରହିବେ। ଅଭିନେତାମାନଙ୍କ ପୋଷାକ ମଧ୍ୟ ବଲିଉଡ୍ର ଫ୍ୟାଶନ ଡିଜାଇନର୍ ଦ୍ୱାରା ଡିଜାଇନ କରାଯାଇଥିବା ଜଣାପଡ଼ିଛି।
