ଓ୍ବାଶିଂଟନ,୧୦ା୧୧: ସାଧାରଣ ନିର୍ବାଚନ ପରେ ଆମେରିକାର ନବ ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ସମର୍ଥକଙ୍କଠାରୁ ସାହାଯ୍ୟ ଲୋଡ଼ିଛନ୍ତି। ଡେମୋକ୍ରାଟ୍ମାନଙ୍କୁ ଦାନ କରିବାକୁ ସେ ସମର୍ଥକମାନଙ୍କୁ ଅନୁରୋଧ କରିଛନ୍ତି। ସୋସିଆଲ ମିଡିଆରେ ପୋଷ୍ଟ କରି ଟ୍ରମ୍ପ କହିଛନ୍ତି, ଡେମୋକ୍ରାଟ୍ଙ୍କ ପାଖରେ ଅଧିକ ଟଙ୍କା ନାହିଁ। କମଲା ହାରିସ୍ଙ୍କ ନିର୍ବାଚନ ପ୍ରଚାରର ୨୦ ମିଲିୟନ ଆମେରିକୀୟ ଡଲାରର ରିପୋର୍ଟ ଆସିବା ପରେ ସେ ଏହି କଥା କହିଛନ୍ତି।
ପଲିଟିକୋର୍ କାଲିଫର୍ନିଆ ବ୍ୟୁରୋ ମୁଖ୍ୟ କ୍ରିଷ୍ଟୋଫର କାଡେଲାଗୋ କହିଛନ୍ତି, ହାରିସ୍ ଏହି ନିର୍ବାଚନରେ ଅତିକମ୍ରେ ୨୦ ମିଲିୟନ ଆମେରିକୀୟ ଡଲାର ଋଣ କରିଛନ୍ତି। ମୁଁ ଆଶ୍ଚର୍ଯ୍ୟ ଯେ, ୨୦୨୦ ରାଷ୍ଟ୍ରପତି ନିର୍ବାଚନରେ କଠିନ ଏବଂ ସାହସର ସହ ସଂଗ୍ରାମ କରି ରେକର୍ଡ ଦାନ ସଂଗ୍ରହ କରିଥିବା ଡେମୋକ୍ରାଟ୍ଙ୍କ ପାଖରେ ଟଙ୍କା ନାହିଁ।
ଟ୍ରମ୍ପ କହିଛନ୍ତି, ‘ଏହି କଷ୍ଟ ସମୟରେ ଡେମୋକ୍ରାଟମାନଙ୍କୁ ସାହାଯ୍ୟ କରିବା ପାଇଁ ଆମେ ଯାହା କରିପାରିବୁ ତାହା କରିବୁ। ଦଳ ଭାବରେ ଅଧିକ ଏକତା ବଜାୟ ରଖିବା ପାଇଁ ଆମକୁ ପାଣ୍ଠି ସଂଗ୍ରହ କରିବାକୁ ପଡ଼ିବ। ନଭେମ୍ବର ୫ରେ ଅନୁଷ୍ଠିତ ନିର୍ବାଚନ ପାଇଁ ୬୦ ବର୍ଷୀୟ ଉପରାଷ୍ଟ୍ରପତି କମଲା ହାରିସ୍ ଡେମୋକ୍ରାଟିକ୍ ପାର୍ଟିର ରାଷ୍ଟ୍ରପତି ପ୍ରାର୍ଥୀ ଥିଲେ। ଟ୍ରମ୍ପଙ୍କଠାରୁ ହାରିଥିବା ହାରିସ୍ ପାଣ୍ଠି ସଂଗ୍ରହର ସମସ୍ତ ରେକର୍ଡ ଭାଙ୍ଗିଛନ୍ତି।
ଫେଡେରାଲ ନିର୍ବାଚନ ଆୟୋଗର ତଥ୍ୟ ଅନୁଯାୟୀ, ହାରିସ୍ଙ୍କ ନିର୍ବାଚନ ପ୍ରଚାର ଏବଂ ତାଙ୍କ ସୁପର ପିଏସିଗୁଡିକ ୨.୩ ବିଲିୟନ ଡଲାର ସଂଗ୍ରହ କରି ୧.୯ ବିଲିୟନ ଡଲାର୍ ଖର୍ଚ୍ଚ କରିଛନ୍ତି। ଅନ୍ୟପକ୍ଷରେ ଟ୍ରମ୍ପଙ୍କ ଦଳ ୧.୮ ବିଲିୟନ ଆମେରିକୀୟ ଡଲାରରୁ ଅଧିକ ସଂଗ୍ରହ କରି ୧.୬ ବିଲିୟନ ଡଲାର ଖର୍ଚ୍ଚ କରିଛନ୍ତି।
ଏକ ରିପୋର୍ଟ ଅନୁଯାୟୀ, ହାରିସ୍ଙ୍କ ନିର୍ବାଚନ ପ୍ରଚାରରେ ଅଂଶଗ୍ରହଣ କରିଥିବା ଅଜୟ ଜୈନ ଭୁଟୋରିଆ କହିଛନ୍ତି, ଏକ ବିଲିୟନ ଆମେରିକୀୟ ଡଲାରରୁ ଅଧିକ ଟଙ୍କା ସଂଗ୍ରହ ତଥା ଖର୍ଚ୍ଚ କରିବା ସତ୍ତ୍ୱେ ହାରିସ୍ଙ୍କ ୨୦୧୪ ନିର୍ବାଚନର ସ୍ବର ସେହି ଭୋଟରଙ୍କ ନିକଟରେ ପହଞ୍ଚିବାରେ ବିଫଳ ହୋଇଥିଲା। ବଢୁଥିବା ଖର୍ଚ୍ଚ ସହିତ ସଂଘର୍ଷ କରୁଥିବା ମଧ୍ୟବିତ୍ତ ଆମେରିକୀୟମାନଙ୍କ ମଧ୍ୟରେ ବ୍ୟବଧାନକୁ ଦୂର କରିପାରିନାହିଁ।
