ୱାଶିଂଟନ,୪ା୧୦: କୋଭିଡ୍ରେ ସଂକ୍ରମିତ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଶୁକ୍ରବାର ସନ୍ଧ୍ୟାରେ ଓ୍ବାଂଶିଟନ ବାହାରେ ଥିବା ଓ୍ବାଲ୍ଟର ରିଡ୍ ଆର୍ମି ହସ୍ପିଟାଲରେ ଭର୍ତ୍ତି କରାଯାଇଛି। ତାଙ୍କର ପରୀକ୍ଷଣାତ୍ମକ କୋଭିଡ୍ ଚିକିତ୍ସା କରାଯାଉଥିବାବେଳେ ସେ ସୁସ୍ଥ ଥିବା ନେଇ ୧୮ ସେକେଣ୍ଡର ଭିଡିଓ ରେକର୍ଡିଂ ଟୁଇଟ୍ କରି ଜଣାଇଛନ୍ତି। କରୋନା ପଜିଟିଭ ଥିବା ତାଙ୍କ ସ୍ତ୍ରୀ ମେଲାନିଆ ମଧ୍ୟ ଭଲ ଥିବା ସେ ଜଣାଇଛନ୍ତି। ହ୍ବାଇଟ୍ ହାଉସ୍ ପ୍ରେସ୍ ସଚିବ କେଲି ମ୍ୟାକନା କହିଛନ୍ତି ଯେ, ମେଡିକାଲ ବିଶେଷଜ୍ଞଙ୍କ ପରାମର୍ଶ କ୍ରମେ ଟ୍ରମ୍ପ ଆର୍ମି ହସ୍ପିଟାଲରେ କିଛିଦିନ ସରକାରୀ କାର୍ଯ୍ୟ କରିବେ। ୭୪ ବର୍ଷୀୟ ଟ୍ରମ୍ପଙ୍କଠାରେ କରୋନାର ସାମାନ୍ୟ ଲକ୍ଷଣ ଥିବାବେଳେ ସ୍ବାସ୍ଥ୍ୟାବସ୍ଥା ଯେଭଳି ଗୁରୁତର ନ ହେବ ସେଥିପ୍ରତି ଧ୍ୟାନ ଦିଆଯାଇ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବା ଜଣାପଡ଼ିଛି। କରୋନା ମାମଲାଗୁଡ଼ିକୁ ଦେଖିଲେ, ବୟସ ଓ ମେଦବହୁଳତା ଯୋଗୁ ଟ୍ରମ୍ପ ‘ଅଧିକ ବିପଦ ବର୍ଗ’ରେ ଅଛନ୍ତି। ଅନ୍ୟପକ୍ଷରେ ଏହି ସ୍ବାସ୍ଥ୍ୟ ସମସ୍ୟା ଟ୍ରମ୍ପଙ୍କ ପାଇଁ ରାଷ୍ଟ୍ରପତି ଭାବେ ପୁନଃ ନିର୍ବାଚିତ ହେବା ଆଗରେ ଏକପ୍ରକାର ସଙ୍କଟ ଭାବେ ଉଭା ହୋଇଛି। ନଭେମ୍ବର ୩ରେ ହେବାକୁ ଥିବା ରାଷ୍ଟ୍ରପତି ନିର୍ବାଚନରେ ତାଙ୍କ ପ୍ରତିଦ୍ୱନ୍ଦ୍ୱୀ ତଥା ଡେମୋକ୍ରାଟିକ୍ ପ୍ରାର୍ଥୀ ଜୋ ବିଡେନ ପ୍ରଚାର ଅଭିଯାନକୁ ଜୋର୍ଦାର କରିଛନ୍ତି। ଏଭଳିସ୍ଥଳେ ଟ୍ରମ୍ପଙ୍କ ନିର୍ବାଚନ ପ୍ରଚାର ଗୁରୁତର ପ୍ରଭାବିତ ହେବା ଆଶଙ୍କା କରାଯାଉଛି। ଟ୍ରମ୍ପଙ୍କ କ୍ୟାମ୍ପେନ ମ୍ୟାନେଜର କହିଛନ୍ତି ଯେ, ନିର୍ବାଚନ ପ୍ରଚାର କାର୍ଯ୍ୟକ୍ରମ ପ୍ରାୟତଃ ସ୍ଥଗିତ ରହିବ କିମ୍ବା ଭର୍ଚୁଆଲ ହେବ। ସେହିପରି ମେଲାନିଆଙ୍କ ସହ ଜଡ଼ିତ କେତେକ କାର୍ଯ୍ୟକ୍ରମ ମଧ୍ୟ ସ୍ଥଗିତ ରଖାଯାଇଛି। ଏଥିରୁ ଅକ୍ଟୋବର ୧୫ରେ ଟ୍ରମ୍ପ-ବିଡେନଙ୍କ ମଧ୍ୟରେ ଦ୍ୱିତୀୟ ବିତର୍କ କାର୍ଯ୍ୟକ୍ରମ ହେବା ନେଇ ସନ୍ଦେହ ସୃଷ୍ଟି ହୋଇଛି। ତେବେ ଉପରାଷ୍ଟ୍ରପତି ମାଇକ ପେନ୍ସ ନିର୍ବାଚନ ପ୍ରଚାର ଜାରି ରଖିବେ ବୋଲି ଜଣାପଡ଼ିଛି। କାରଣ ତାଙ୍କର କୋଭିଡ୍ ଟେଷ୍ଟ ରିପୋର୍ଟ ନେଗେଟିଭ୍ ରହିଛି।
