କେନ୍ଦୁଝର,୨୭ା୫(ନରେଶ ଚନ୍ଦ୍ର ପଟ୍ଟନାୟକ): ବିଗତ ଦିନରେ କେନ୍ଦୁଝର ଜିଲା ଦେଇ ଯାଇଥିବା ଜାତୀୟ ରାଜପଥରେ ଅନେକ ଦୁର୍ଘଟଣା ଘଟି ବହୁ ଧନଜୀବନହାନି ହୋଇଛି। ବାରମ୍ବାର ଦୁର୍ଘଟଣା ପରେ ମଧ୍ୟ ଜାତୀୟ ରାଜପଥ କଡ଼ରୁ ଟ୍ରକ୍ର ଲମ୍ବାଧାଡ଼ି ହଟୁନାହିଁ। ତଦାରଖ ଅଭାବରୁ ଖଣିଜ ବୋଝେଇ ଟ୍ରକ୍ ଏଣେ ତେଣେ ପାର୍କିଂ କରାଯାଉଛି। ରାସ୍ତା କଡ଼ରେ ଟ୍ରକ୍ ଛିଡ଼ା ହେଉଥିବାରୁ ଦୁର୍ଘଟଣା ଘଟୁଛି। ଦୁର୍ଘଟଣା ଘଟି ମୃତାହତ ହେଲେ ପ୍ରଶାସନ ପକ୍ଷରୁ ଧରପଗଡ଼ ହୋଇଥାଏ। ଅନ୍ୟ ସମୟରେ ଦେଖା ମିଳେନାହିଁ ବୋଲି ସାମାଜିକକର୍ମୀମାନେ କହିଛନ୍ତି।
ପ୍ରକାଶ ଯେ, ଖଣିରୁ ଟ୍ରକ୍ ଲୋଡ ବେଳେ ସେମାନେ ପରମିଟ୍ ନେଉଛନ୍ତି। ବାଟରେ ବିଭିନ୍ନ ପରିବହନ ଠିକାସଂସ୍ଥା ସେମାନଙ୍କ ସୁବିଧା ସ୍ଥାନରେ ଚାଲାଣ ଦେବା ବ୍ୟବସ୍ଥା କରୁଛନ୍ତି। ଫଳରେ ଚାଳକ ରାସ୍ତା କଡ଼ରେ ଗାଡ଼ି ଅଟକାଇ ଚାଲାଣ ଓ ତେଲ ସ୍ଲିପ୍ ନେବାକୁ ବହୁ ସମୟ ଅପେକ୍ଷା କରିଥାନ୍ତି। ଅନ୍ୟ ଗାଡ଼ି ଚଳାଚଳରେ ସମସ୍ୟା ଉପୁଜିଛି। ଅନେକ ସମୟରେ ରାସ୍ତା ଜାମ୍ ମଧ୍ୟ ଏହି କାରଣରୁ ହୋଇଥାଏ। ବିଶେଷ କରି ପାଟଣା ବ୍ଲକ୍ ଖିରେଇଟାଙ୍ଗିରି ଟୋଲଗେଟ୍ ନିକଟରେ ଏଭଳି ପରିବହନ ଠିକାସଂସ୍ଥା ଚାଲାଣ ଓ ତେଲ ସ୍ଲିପ୍ ଦେଉଥିବାରୁ ଗାଡି ଚାଳକମାନେ ରାସ୍ତାରେ ଟ୍ରକ୍ ଅଟକାଇ ସଂଗ୍ରହ କରୁଛନ୍ତି। ଏଥି ପାଇଁ ଦୀର୍ଘ ଘଣ୍ଟା ଧରି ଟ୍ରକ୍ଗୁଡ଼ିକ ଲମ୍ବା ଲାଇନରେ ଅଟକି ରହିବା ଫଳରେ ଟ୍ରାଫିକ ସମସ୍ୟା ସୃଷ୍ଟି ହେଉଛି। ବାଉଁଶୁଳି ଘାଟି ପର୍ଯ୍ୟନ୍ତ ଲମ୍ବି ରହୁଥିବାରୁ ଘାଟି ରାସ୍ତା ଅଧିକ ବିପଦପୂର୍ଣ୍ଣ ହୋଇପଡୁଛି। ସେହିପରି ଏନ୍ଏଚ୍ ୨୦ର ସିଲିସୁଆଁ, ପୁଟୁଳିଆ ତଥା ଅନ୍ୟାନ୍ୟ ସ୍ଥାନରେ ସମାନ ଅବସ୍ଥା ଲାଗିରହିଛି। ଅନ୍ୟପକ୍ଷରେ ପରିବହନ ଠିକାସଂସ୍ଥା ଅଧିକ ଲାଭ ପାଇଁ ନିଜର ବା ନିଜ ଯୋଗାଯୋଗରେ ଥିବା ପେଟ୍ରୋଲ ପମ୍ପରୁ ତେଲ ନେବାକୁ ସ୍ଲିପ୍ ଦେଇଥାନ୍ତି। ଫଳରେ ଅନେକ ସମୟରେ ପେଟ୍ରୋଲ ପମ୍ପରେ ତେଲ ପାଇଁ ଏନ୍ଏଚ୍ ଉପରେ ଟ୍ରକ୍ ଲାଇନରେ ଛିଡ଼ା ହେଉଛି। ତେଲ ନ ଥିଲେ ଦୀର୍ଘ ଘଣ୍ଟା ରାସ୍ତାରେ ଟ୍ରକ୍ ପାର୍କିଂ କରି ଅପେକ୍ଷା କରିଥାନ୍ତି। ଅନେକ ସମୟରେ ରଙ୍ଗ୍ରୁଟ୍ରେ ଟ୍ରକ୍ ଆସିବାକୁ ବାଧ୍ୟ ହୋଇଥାନ୍ତି। ସେହିପରି ଏନ୍ଏଚ୍ ୪୯ ଅଞ୍ଜର (ପୁତୁଲୁପାଣି) ନିକଟରେ ଲୋଡିଂ ପାଇଁ ଟ୍ରକ୍ ଲମ୍ବାଧାଡ଼ି ଯୋଗୁ ଟ୍ରାଫିକ୍ ସମସ୍ୟା ଦେଖାଦେଇଥାଏ। ଅନେକ ଟ୍ରକ୍ ଚାଳକ ବେଆଇନ ଭାବରେ ରାସ୍ତା ଡିଭାଇଡର ଅତିକ୍ରମ କରି ଲୋଡିଂ ପାଇଁ ଯାଉଥିବାରୁ ଡିଭାଇଡର ଭାଙ୍ଗି ସମସ୍ୟା ଦେଖାଦେଇଥାଏ। ଜାତୀୟ ରାଜପଥ ପ୍ରାଧିକରଣ ବିଭିନ୍ନ ସ୍ଥାନରେ ରାସ୍ତା କଡ଼୍ରେ ପାର୍କିଂ ବ୍ୟବସ୍ଥା କରିଛି। ଏଣୁ ଅନ୍ୟ ସ୍ଥାନରେ ଗାଡି ପାର୍କିଂ କରିବା କେତେଦୂର ଆଇନସଙ୍ଗତ ବୋଲି ସାମାଜିକ କର୍ମୀ ଗୁଲାବ ଅଖତର ରାଇନ କହିଛନ୍ତି। ପରିବହନ ଠିକାସଂସ୍ଥାଗୁଡ଼ିକ ବହୁ ଲାଭ କରୁଛନ୍ତି। ମାତ୍ର ଲୋଡିଂ ସ୍ଥାନରେ ଚାଲାଣ ବା ତେଲ ସ୍ଲିପ ଦେବା ବ୍ୟବସ୍ଥା ନ କରି ରାସ୍ତା କଡ଼ରେ ଦେଉଛନ୍ତି। ସେମାନଙ୍କ ପାଇଁ ସାଧାରଣ ଲୋକେ ବିପଦପୂର୍ଣ୍ଣ ଭାବେ ଯାତାୟାତ କରୁଛନ୍ତି। ଏ ନେଇ ପଦକ୍ଷେପ ନେବାକୁ ସାମାଜିକ କର୍ମୀ ଦିଲୀପ ସାହୁଙ୍କ ସମେତ ବିଭିନ୍ନ ମହଲରେ ଦାବି ହେଉଛି। ଆଞ୍ଚଳିକ ପରିବହନ ଅଧିକାରୀ ଗୋପାଳକୃଷ୍ଣ ଦାସ କହିଛନ୍ତି, ପରିବହନ ଠିକାସଂସ୍ଥା ପକ୍ଷରୁ ରାସ୍ତାରେ ଟ୍ରକ୍ ଛିଡ଼ା କରି ଚାଲାଣ ବଣ୍ଟାଯାଉଛି। ସେମାନଙ୍କୁ ନୋଟିସ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
