କେନ୍ଦୁଝର, ୩୧।୧ (ସ୍ବ.ପ୍ର.) କେନ୍ଦୁଝର ଜିଲାରେ ହାତୀମାନଙ୍କ ଅପେକ୍ଷା ଖଣିଖାଦାନ ଓ ଖଣି ପରିବହନକୁ ଗୁରୁତ୍ୱ ଦିଆଯାଉଛି। ଫଳରେ ହାତୀ ମାନଙ୍କ ଚଳପ୍ରଚଳ ସଙ୍କୁଚିତ ହେବା ସହ ଚଲାପଥ ଅବରୋଧ ହୋଇଯାଉଥିବାରୁ ହାତୀ ପଲ ବିବ୍ରତ ହୋଇ ଆଖପାଖ ଅଞ୍ଚଳରେ ଉପଦ୍ରବ ଚଳାଉଛନ୍ତି। ସେହିପରି ରାସ୍ତାରେ ଶହ ଶହ ଟ୍ରକ ଲମ୍ବାଧାଡି ଏବଂ ହାତୀ ଚଲାପଥ ଅଞ୍ଚଳରେ ଟ୍ରକ ପାର୍କିଂ ଯୋଗୁ ହାତୀ ପଲ ଚଳାଚଳ କରିପାରୁ ନାହାନ୍ତି।
ବିଶେଷ କରି ଟ୍ରକ ଲମ୍ବା ଧାଡି ଯୋଗୁଁ ଭୂୟାଁ ଓ ଜୁଆଙ୍ଗ ପୀଢ ରେଞ୍ଜ୍ ଅଧୀନ କାଇପୁର ଠାରୁ ଅଞ୍ଜର ପର୍ଯ୍ୟନ୍ତ ରାସ୍ତା (ଏନ୍ଏଚ୍-୪୯) ରେ ହାତୀ ପଲ ରାସ୍ତା ପାର ହୋଇପାରୁ ନାହାନ୍ତି। ଏହି କାରଣରୁ ଗତ କିଛି ଦିନ ହେଲା ଭେଜିଡିହି-ତଳକାଇଁସାରୀ ଜଙ୍ଗଲରେ (ବଡଘାଗରା ରାସ୍ତା) ୯ ଟି ହାତୀ ରହିଥିଲେ ହେଁ କୁଆଡେ ଯାଇପାରୁ ନ ଥିବାରୁ ସ୍ଥାନୀୟ ଲୋକେ ଭୟଭୀତ ହୋଇ ପଡୁଛନ୍ତି। ରେଞ୍ଜ୍ ଅଫିସ ଠାରୁ ମାତ୍ର ୧ କି.ମି. ମଧ୍ୟରେ ହାତୀପଲ ସାନମାଛକାନ୍ଦଣା ନଦୀ କୂଳ ଜଙ୍ଗଲରେ ଅଟକି ରହିଥିବାରୁ ସେମାନେ ଉତକ୍ଷିପ୍ତ ହୋଇ ଉପଦ୍ରବ କରୁଛନ୍ତି। ସେହିପରି ବଡଘାଗରାକୁ ବହୁ ସଂଖ୍ୟାରେ ପର୍ଯ୍ୟଟକ ଭୋଜିଭାତ କରିବା ଓ ବୁଲିବାକୁ ଯାଉଥିବାରୁ ସେମାନଙ୍କ ପାଇଁ ମଧ୍ୟ ବିପଦ ଆଶଙ୍କା ରହୁଛି ା
ସେହିପରି କାଇପୁର ନିକଟରେ ରାସ୍ତା କଡରେ ହାତୀ ଚଳପ୍ରଚଳ ଅଞ୍ଚଳରେ ହଜାର ହଜାର ସଂଖ୍ୟାରେ ଟ୍ରକ ପାର୍କିଂ କରୁଥିବା କାରଣରୁ ହାତୀ ମାନେ ବୁଲାବୁଲିରେ ସମସ୍ୟା ଭୋଗୁଛନ୍ତି ା ଟ୍ରକ ଗୁଡିକର ଉଜ୍ୱଳ ଆଲୋକ ତଥା ବିକଟାଳ ହର୍ନ ଯୋଗୁ ହାତୀ ମାନେ ରାସ୍ତା ପାର ହୋଇ ଗୋଟିଏ ଜଙ୍ଗଲରୁ ଅନ୍ୟ ଜଙ୍ଗଲକୁ ଯିବା ଆସିବା କରିୁପାରୁନାହାନ୍ତି। ଏହାର ପ୍ରତିକାର କରିବାକୁ ପରିବେଶବିତ ମାନେ ଦାବି କରିଛନ୍ତି। ଏନେଇ କିଛି ମାସ ତଳେ ଜିଲା ପରିଷଦ ଅଧ୍ୟକ୍ଷା କମଳିନୀ ପାତ୍ର କେନ୍ଦୁଝର ଡିଏଫଓ ଏବଂ ଉପଜିଲାପାଳଙ୍କୁ ଚିଠି ଲେଖି ସମସ୍ୟା ଜଣାଇଥିଲେ ହେଁ କାୈଣସି ସମାଧାନ କରାଯାଇନାହିଁ କିମ୍ବା ତାଙ୍କୁ ଯାଞ୍ଚ ରିପୋର୍ଟ ଦିଆଯାଇ ନ ଥିବାରୁ ଅସନ୍ତୋଷ ବ୍ୟକ୍ତ କରି ଉଚ୍ଚ ଅଧିକାରୀଙ୍କୁ ଜଣାଇଥିବା କହିଛନ୍ତି।
