ନୂଆପଡ଼ା,୧୩ା୯ (ମକାରୁ ବେମାଲ):ନୂଆପଡ଼ା ସଦର ବ୍ଲକ କେନ୍ଦୁବାହାରା ପଞ୍ଚାୟତ ଭଇଁଷାଦରା ଗାଁରେ ଆଦିବାସୀଙ୍କୁ ଉପରେ ମାନସିକ ନିର୍ଯାତନା ଦିଆଯାଉଥିବା ନେଇ ଗ୍ରାମବାସୀ ଧରମବନ୍ଧା ଥାନାର ଦ୍ୱାରସ୍ଥ ହୋଇଛନ୍ତି। ସୂଚନା ଅନୁଯାୟୀ, ଭଇଁଷାଦରା ଗାଁରେ ମିର୍ଦ୍ଧା, ଗଣ୍ଡ, ଗଉଡ, ହରିଜନ, ସାହୁ, ରଣା, କେଉଟ, ମାଳି ଓ ଲୋହରା ଆଦି ଜାତିର ପାଖାପାଖି ଶହେ ପରିବାରର ୫ ଶହରୁ ଊର୍ଦ୍ଧ୍ୱ ଲୋକ ବାସ କରନ୍ତି। ଗାଁର ଅଧିକାଂଶ ଲୋକ ଚାଷ କାର୍ଯ୍ୟ ସରିଲେ ଦିନ ମଜୁରିଆ କାମ କରି ପରିବାର ପ୍ରତିପୋଷଣ କରନ୍ତି। ଗାଁରେ କୌଣସି ସାମାଜିକ କାର୍ଯ୍ୟ ହେଲେ ସମସ୍ତେ ଏକାଠି ପାଳନ କରନ୍ତି। ହେଲେ ଗାଁରେ କେତେଜଣ ପଛୁଆ ବର୍ଗର ଲୋକ ନିର୍ଯାତନା ଦେଇ ଆସୁଥିବା ସେମାନେ ଅଭିଯୋଗ କରିଛନ୍ତି। ପଛୁଆ ବର୍ଗର ଲୋକେ ବିବାହ, ବ୍ରତ, ପୂଜାକଲେ ଆଦିବାସୀମାନଙ୍କୁ ନିମନ୍ତ୍ରଣ କରୁଛନ୍ତି। ସେହି ଉତ୍ସବକୁ ଗଲେ କାହିଁକି ଆସିଲ ବୋଲି ଗାଁରେ ସଭା କରି ଜରିମାନା ଆଦାୟ କରୁଛନ୍ତି। ଜରିମାନା ନ ଦେଲେ ଗାଁ ଛାଡି ଚାଲିଯାଅ ବୋଲି ଧମକ ଦେଇ ନିଆଁ ପାଣି ବନ୍ଦ କରି ଦେଉଛନ୍ତି ବୋଲି ଥାନାରେ ଲିଖିତ ଅଭିଯୋଗ କରିଛନ୍ତି। ସମ୍ପୃକ୍ତ ବ୍ୟକ୍ତିମାନେ ଗାଁରେ ଥିବା ସରକାରୀ ଜମି, ଗାଁ ପୋଖରୀକୁ ଜବରଦଖଲ କରି ନେଇଛନ୍ତି। ଏ ସମ୍ପର୍କରେ ପୋଲିସକୁ କହିଲେ ପରିଣାମ ଭୟଙ୍କର ହେବ ବୋଲି ଧମକ ଦିଅନ୍ତି ବୋଲି ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି ା ତୁରନ୍ତ ଏହାର ତଦନ୍ତ କରି ନ୍ୟାୟ ପ୍ରଦାନ କରିବାକୁ ମିର୍ଦ୍ଧା ସମ୍ପ୍ରଦାୟର ୨୦ରୁ ଊର୍ଦ୍ଧ୍ୱ ପରିବାର ଥାନାରେ ଲିଖିତ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ଏସ୍ଆଇ ବିନୋଦ ବିହାରୀ ସେଠୀଙ୍କୁ ପଚାରିବାରୁ ଏହା ଉପରେ ତଦନ୍ତ କରାଯିବ, ସତ୍ୟାସତ୍ୟ ଜଣାପଡିଲା ପରେ ପଦକ୍ଷେପ ନିଆଯିବ ବୋଲି କହିଥିଲେ। ଏହି ସମୟରେ ଭକ୍ତବନ୍ଧୁ ଧରୁଆ, ସୁରେଶ ମିର୍ଦ୍ଧା, ସନ୍ତରାମ ମିର୍ଦ୍ଧା, ଦୁଃଖା ମିର୍ଦ୍ଧା, ରାମାୟଣ ବାଇ ମିର୍ଦ୍ଧା, ଦୁରପତି ମିର୍ଦ୍ଧା, ନିରଞ୍ଜନ ମିର୍ଦ୍ଧା, ପୁଷ୍ପା ମିର୍ଦ୍ଧା, ସୋଭାଗିରି ମିର୍ଦ୍ଧା, ମଙ୍ଗଳୁ ମିର୍ଦ୍ଧା ପ୍ରମୁଖ ଉପସ୍ଥିତ ଥିଲେ ା
