ଥୁଆମୂଳ ରାମପୁର, ୨।୫(ଦୁର୍ଗା କୀର୍ତ୍ତି): କଳାହାଣ୍ଡି ଓ ରାୟଗଡ଼ା ଜିଲା ସୀମାନ୍ତରେ ଥିବା ସିଜିମାଲି ଓ କୁଟ୍ରୁମାଳି ପାହାଡ଼କୁ ନେଇ ସଂଗ୍ରାମ ଏବେ ତୀବ୍ରତର ହୋଇଛି। ସିଜିମାଲିର ପାରମ୍ପରିକ ‘ତିଜିରାଜା ପୂଜା ପର୍ବ’ ସମାପ୍ତି ପରେ ଶାଗବାରୀ ଗ୍ରାମ ନିକଟସ୍ଥ ପାହାଡ଼ ସତ୍ୟାଗ୍ରହ ସ୍ଥଳରେ ‘ମା-ମାଟି-ମାଳି ସୁରକ୍ଷା ମଞ୍ଚ’ ପକ୍ଷରୁ ଏକ ବିଶାଳ ସୁରକ୍ଷା ସମାବେଶ ଅନୁଷ୍ଠିତ ହୋଇଯାଇଛି। ମେ’ ୧ ଆନ୍ତର୍ଜାତିକ ଶ୍ରମିକ ଦିବସ ଅବସରରେ ଆୟୋଜିତ ଏହି ସମାବେଶରେ ହଜାର ହଜାର ଆଦିବାସୀ ଏକଜୁଟ ହୋଇ କମ୍ପାନୀ ପ୍ରୀତି ଓ ପୋଲିସ ଦମନ ବିରୋଧରେ ରଣହୁଙ୍କାର ଦେଇଛନ୍ତି।
ମା-ମାଟି-ମାଳି ସୁରକ୍ଷା ମଞ୍ଚର ସଭାପତି ସୁବାସ ସିଂ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସଭାରେ କୁଟ୍ରୁମାଳି ଖଣି ପ୍ରସଙ୍ଗରେ ସରକାର ଓ ପ୍ରଶାସନକୁ କଡ଼ା ଚେତାବନୀ ଦିଆଯାଇଛି। ଆଦାନୀ କମ୍ପାନୀ ସ୍ୱାର୍ଥରେ କୁଟ୍ରୁମାଳି ପାଇଁ ପ୍ରଭାବିତ ଗ୍ରାମଠାରୁ ୪୦ ରୁ ୫୦ କିଲୋମିଟର ଦୂରରେ ଜନଶୁଣାଣି କରିବା ପ୍ରୟାସକୁ ‘ଅଗଣତାନ୍ତ୍ରିକ’ ଓ ‘ଆଇନ ବିରୋଧୀ’ ବୋଲି ଦର୍ଶାଯାଇ ଏହାକୁ ବାତିଲ କରିବା ପାଇଁ ଏକ ସର୍ବସମ୍ମତ ପ୍ରସ୍ତାବ ଗୃହୀତ ହୋଇଛି। ପୋଲିସ ଦମନ ଜରିଆରେ ଲୋକଙ୍କୁ ଆତଙ୍କିତ କରି ଏଭଳି ଜନଶୁଣାଣିକୁ କୌଣସି ପରିସ୍ଥିତିରେ ସଫଳ ହେବାକୁ ଦିଆଯିବ ନାହିଁ ବୋଲି ସଂଗ୍ରାମୀମାନେ ଶପଥ ନେଇଛନ୍ତି।
ସମାବେଶରେ ଲୋକ ଶକ୍ତି ଅଭିଯାନର ରାଷ୍ଟ୍ରୀୟ ଆବାହକ ପ୍ରଫୁଲ୍ଲ ସାମନ୍ତରା ଯୋଗଦେଇ ପ୍ରଶାସନ ପ୍ରାୟୋଜିତ କମ୍ପାନୀ ଆତଙ୍କରାଜକୁ ବନ୍ଦ କରିବାକୁ ନିବେଦନ କରିଛନ୍ତି। ସରକାର ସିଜିମାଲି ଓ କୁଟ୍ରୁମାଳିରୁ ଖଣି ଲିଜ୍ ପ୍ରତ୍ୟାହାର କରିବା ସହ ସମଗ୍ର ରାଜ୍ୟରେ ବକ୍ସାଇଟ୍ ଖଣି ଖନନକୁ ସଂପୂର୍ଣ୍ଣ ନିଷେଧ କରନ୍ତୁ ବୋଲି ସେ ଦାବି କରିଛନ୍ତି। ଅନ୍ୟମାନଙ୍କ ମଧ୍ୟରେ ଜନ ଆନ୍ଦୋଳନ ନେତା ନରେନ୍ଦ୍ର ମହାନ୍ତି, ଡାକ୍ତର ବିଶ୍ୱଜିତ୍, ଆଫଳତୁନ, ନାରଙ୍ଗୀ ଦେଇ ମାଝୀ, ଲକ୍ଷ୍ମଣ ମାଝୀ ଏବଂ ଲକ୍ଷ୍ମୀ ସୀସା ପ୍ରମୁଖ ଗତ ଏପ୍ରିଲ ୭ ତାରିଖରେ କଣ୍ଟାମାଳଠାରେ ପୋଲିସର ବର୍ବର ଆକ୍ରମଣକୁ ତୀବ୍ର ନିନ୍ଦା କରିଛନ୍ତି। ଏହି ଘଟଣାରେ ସଂପୃକ୍ତ ଏସପି, ଜିଲ୍ଲାପାଳ ଓ କାଶୀପୁର ଥାନା ଅଧିକାରୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି।
ମାଟି ପାଇଁ ଲଢ଼େଇ କରି ଜେଲରୁ ଖଲାସ ହୋଇଥିବା ୯ ଜଣ ମହିଳା ଆନ୍ଦୋଳନକାରୀଙ୍କୁ ଏହି ଅବସରରେ ସମ୍ମାନିତ କରାଯାଇଛି। ସିଜିମାଲିରେ ବେଦାନ୍ତ କମ୍ପାନୀର ପ୍ରବେଶ ଓ ପୋଲିସ କ୍ୟାମ୍ପ ବିରୋଧରେ ଶାଗବାରୀ ଘାଟିରେ ସ୍ଥାନୀୟ ଲୋକଙ୍କ ଦ୍ୱାରା ପ୍ରତିଷ୍ଠିତ ‘ଜନତା କ୍ୟାମ୍ପ’ ଏବେ ସଂଗ୍ରାମର ପ୍ରତୀକ ପାଲଟିଛି। କଣ୍ଟାମାଳ ଅତ୍ୟାଚାର ପରେ ଯେଉଁ ରାଜନୈତିକ ଦଳମାନେ ଅଞ୍ଚଳ ଗସ୍ତ କରିଥିଲେ, ସେମାନେ ନିଜର ରିପୋର୍ଟ ସାର୍ବଜନୀନ କରି ଲୋକଙ୍କ ସମ୍ମୁଖରେ ସତ୍ୟ ରଖନ୍ତୁ ବୋଲି ମଞ୍ଚ ପକ୍ଷରୁ ଆହ୍ୱାନ ଦିଆଯାଇଛି। ସିଜିମାଲି ଓ କୁଟ୍ରୁମାଳିରୁ କମ୍ପାନୀ ନହଟିବା ଯାଏଁ ଏହି ପାହାଡ଼ ସତ୍ୟାଗ୍ରହ ଜାରି ରହିବ ବୋଲି ସୂଚନା ମିଳିଛି।
