ଦାରିଙ୍ଗବାଡ଼ି,୫ା୧(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ଜାଗୃତି କାର୍ଯ୍ୟାଳୟ ପରିସର ମଧ୍ୟରେ ସୋମବାର ୨ ଦିନିଆ ଜନଜାତି ସମ୍ମେଳନ ଆରମ୍ଭ ହୋଇଯାଇଛି। ଏଥିରେ ମୁଖ୍ୟ ଅତିଥିଭାବେ ଜନଜାତି ସମ୍ପ୍ରଦାୟର ବରିଷ୍ଠ ଚାଷୀ ତିଲମା ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ଜାଗୃତି ସମ୍ପାଦକ କୈକାସ ଚନ୍ଦ୍ର ଦଣ୍ଡପାଟ ଯୋଗଦେଇ ଏହି ସମ୍ମେଳନର ଉଦ୍ଦେଶ୍ୟ ଓ ଆବଶ୍ୟକତା ସମ୍ପର୍କରେ କହିଥିଲେ।
ପ୍ରକାଶ ଯେ, ଗତ କିଛି ବର୍ଷ ମଧ୍ୟରେ ଧିରେ ଧିରେ ଜନଜାତିଙ୍କ ଚଳଣିରେ ପରିବର୍ତ୍ତନ ହେଇଛି। ସେମାନଙ୍କ ପାରମ୍ପରିକ ନୃତ୍ୟ, ବାଦ୍ୟଯନ୍ତ୍ର, ଖାଦ୍ୟ, ଚଳଣି, ପୋଷାକରେ ବହୁଳ ପରିବର୍ତ୍ତନ ଆସିଛି। ଏହି ପରିବର୍ତ୍ତନ ଯୋଗୁ ଜାତି ସାମ୍ପ୍ରଦାୟର ଯୁବପିଢ଼ି ଧିରେ ଧିରେ ଜନଜାତିଙ୍କ ପାରମ୍ପରିକ ସମସ୍ତ ବିଷୟ ଜାଣିପାରୁନାହାନ୍ତି। ସେମାନଙ୍କୁ ଏହି ପାରମ୍ପରିକ ସମ୍ପର୍କରେ ଜଣାଇବା ଓ ତାର ପୁନରୁଦ୍ଧାର ପାଇଁ ଏହି କାର୍ଯ୍ୟକ୍ରମ ଦୀର୍ଘ ୫ ବର୍ଷ ଧରି ପାଳିତ ହେଉଥିବା କୁହାଯାଇଥିଲା ଏବେ ଏହି କାର୍ଯ୍ୟକ୍ରମ ପାଳିତ ପରେ ଅଞ୍ଚଳରେ ଧିରେ ଧିରେ ପାରମ୍ପରିକ ଚଳଣି, ବାଦ୍ୟ, ନୃତ୍ୟ, ଖାଦ୍ୟ ଓ ପୋଷାକ ପାରମ୍ପରିକ ଚାଷ ସମ୍ପର୍କରରେ ପୁନରୁଦ୍ଧାର ହେବା ସହ ଯୁବପିଢ଼ି ଜାଣିପାରୁଥିବା କୁହାଯାଇଛି।
ଏହି ଅବସରରେ ବୃକ୍ଷକୁ ରକ୍ଷା ବନ୍ଧନ ସହ ଗଛ ହିଁ ଜୀବନ ଓ ଜନଜାତିଙ୍କ ଜୀବିକା ଜୀବନକୁ ଜଙ୍ଗଲରୁ ସଂଗୃହୀତ ସାମଗ୍ରୀ ସ୍ବାବଲମ୍ବୀ କରୁଥିବାରୁ ଜଙ୍ଗଲର ଗୁରୁତ୍ୱ ସମ୍ପର୍କରେ କୁହାଯାଇଥିଲା। ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଗମା ପ୍ରଧାନ, ଲେଜ ପ୍ରଧାନ, ଜ୍ୟୋତିରାଜ ପ୍ରଧାନ, ବାଡାବାଙ୍ଗା ସରପଞ୍ଚ ପ୍ରସନ୍ନ ପ୍ରଧାନ, ଗୋବିନ୍ଦ ପ୍ରଧାନ, ପୂର୍ବତନ ସରପଞ୍ଚ ସୁଜାତ ପଡ୍ରା,ପୂର୍ବତନ ସମିତି ସଭ୍ୟା ମମିତା ପ୍ରଧାନ, ପୂର୍ବତନ ସମିତି ଅଧ୍ୟକ୍ଷ ବକଲା ପ୍ରଧାନ ପ୍ରମୁଖ ମଞ୍ଚାସୀନ ରହି ଜନଜାତିଙ୍କ ସମ୍ପର୍କରେ ଆଲୋଚନା କରିଥିଲେ। କାର୍ଯ୍ୟକ୍ରମକୁ ମନୋଜ ନାୟକ ଏବଂ ପ୍ରଦୀପ କହଁର ମଞ୍ଚ ପରିଚାଳନା କରିଥିଲେ। ଜାଗୃତିର କାର୍ଯ୍ୟକ୍ରମ ଅଧିକାରୀ ସଦାନନ୍ଦ ସିଂ, ଧ୍ରୁବ ଚରଣ ନାୟକ, ଅନ୍ତରଙ୍ଗ ଯୁବ ମହାସଂଘର ଜିଲା ସଭାପତି ଦିଲୀପ ସାହୁ, ଧନେଶ୍ୱର ସାହୁଙ୍କ ସମେତ ଅନେକ କର୍ମଚାରୀ ପରିଚାଳନା କରିଥିଲେ।
