ଥୁଆମୂଳ ରାମପୁର, ୧୦ା୫ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକର ଜୀବନରେଖା କୁହାଯାଉଥିବା ଥୁଆମୂଳ ରାମପୁର – କାଶୀପୁର ମୁଖ୍ୟ PWD ରାସ୍ତା ଏବେ ପଥିକଙ୍କ ପାଇଁ ବିପଦ ସାଜିଛି । ସାହୁ ଜଙ୍ଗଲ ନିକଟସ୍ଥ ରାସ୍ତା କଡ଼ରେ ଦୁଇଟି ଶୁଖିଲା ଗଛ ଅତି ବିପଦସଙ୍କୁଳ ଅବସ୍ଥାରେ ରହିଛି। ଗଛଗୁଡ଼ିକ ଯେକୌଣସି ମୁହୂର୍ତ୍ତରେ ରାସ୍ତା ଉପରେ ପଡିଲା ଭଳି ଲାଗୁଥିବା ବେଳେ ଏହା ଏକ ବଡ଼ ଧରଣର ଦୁର୍ଘଟଣା ସହ ଧନଜୀବନ ହାନିର ଆଶଙ୍କା ସୃଷ୍ଟି କରିଛି ।
ବର୍ତ୍ତମାନ କାଳବୈଶାଖୀ ସମୟ ହୋଇଥିବାରୁ ପ୍ରତିଦିନ ପବନ ଓ ବର୍ଷା ହେଉଛି । ଏହି ପୂର୍ତ୍ତ ବିଭାଗ ରାସ୍ତା ଦେଇ ଶତାଧିକ ଯାନବାହନ ସମେତ ସ୍ଥାନୀୟ କାଠକୁରା ଓ ଥୁଆମୂଳ ରାମପୁର ଗ୍ରାମବାସୀ ଯାତାୟାତ କରିଥାନ୍ତି। ଗଛଗୁଡ଼ିକର କାଣ୍ଡ ଓ ଶାଖା ସମ୍ପୂର୍ଣ୍ଣ ଶୁଖି ଯାଇଥିବାରୁ, ଏହା ତଳେ ଗତି କରୁଥିବା ଲୋକଙ୍କ ପାଇଁ ଏବେ ‘ମୃତ୍ୟୁର ଛାଇ’ ପରି ସାଜିଛି। ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଏହାକୁ ନେଇ ଗଭୀର ଅସନ୍ତୋଷ ଓ ଭୟର ବାତାବରଣ ଦେଖିବାକୁ ମିଳିଛି।
ଏହି ସମ୍ବେଦନଶୀଳ ପ୍ରସଙ୍ଗରେ ଦକ୍ଷିଣ ବନାଞ୍ଚଳ ଫରେଷ୍ଟର ଏକାଦଶୀ ନାଏକଙ୍କୁ ପଚାରିବାରୁ ସେ କହିଛନ୍ତି, “ଆମେ ତୁରନ୍ତ ସେହି ସ୍ଥାନକୁ ଯାଇ ଗଛର ସ୍ଥିତି ଯାଞ୍ଚ କରିବୁ। ଯଦି ଗଛଟି ଅତି ବିପଦସଙ୍କୁଳ ଅବସ୍ଥାରେ ଥିବା ଜଣାପଡ଼େ, ତେବେ ଉପରିସ୍ଥ ଅଧିକାରୀ (DFO)ଙ୍କୁ ଅବଗତ କରାଯାଇ କାଟିବାର ବ୍ୟବସ୍ଥା କରାଯିବ। ଅଥବା ସ୍ଥାନୀୟ ସରପଞ୍ଚଙ୍କ ତରଫରୁ ଏକ ଲିଖିତ ଅଭିଯୋଗ ମିଳିଲେ ମଧ୍ୟ ଆମେ ତୁରନ୍ତ ଆବଶ୍ୟକୀୟ ପଦକ୍ଷେପ ଗ୍ରହଣ କରିବୁ।”
ସମସ୍ୟା ସ୍ପଷ୍ଟ, ସମାଧାନର ବାଟ ମଧ୍ୟ ଖୋଲା ଅଛି। ମାତ୍ର ବଡ଼ ପ୍ରଶ୍ନ ହେଉଛି—ପ୍ରଶାସନ କୌଣସି ଅଘଟଣ ଘଟିବା ଯାଏଁ ଅପେକ୍ଷା କରିବ ନା ଲୋକଙ୍କ ସୁରକ୍ଷାକୁ ପ୍ରାଥମିକତା ଦେଇ ଏହି ବିପଦକୁ ହଟାଇବ? PWD ବିଭାଗ ଏବଂ ବନ ବିଭାଗର ସମନ୍ୱିତ ପଦକ୍ଷେପ ହିଁ ଏଠାରେ ଜୀବନ ବଞ୍ଚାଇପାରିବ। ଏହି ବିପଦପୂର୍ଣ୍ଣ ଶୁଖିଲା ଗଛକୁ ତୁରନ୍ତ କାଟିବା ପାଇଁ ଅଞ୍ଚଳବାସୀ ପ୍ରଶାସନ ନିକଟରେ ଦୃଢ଼ ଦାବି କରିଛନ୍ତି।