ଦାରିଙ୍ଗବାଡ଼ି,୬ା୮(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ସିମନବାଡ଼ି ପଞ୍ଚାୟତର କୁଡ଼ିମୁଞ୍ଜାଠାରୁ ଡକରବାଡ଼ିକୁ ସଂଯୋଗ କରୁଥିବା ରାସ୍ତାରେ ବିରାଟକାୟ ଗଛ ଉପୁଡ଼ି ପଡ଼ିବା ସହ ବିଦ୍ୟୁତ ଖୁଣ୍ଟ ଭାଙ୍ଗି ପଡ଼ିରହିଛି। ଫଳରେ ଡକରବାଡ଼ିଠାରୁ ଗବାଟବାଡ଼ି ଦେଇ ସିମନବାଡ଼ି-ରାଇକିଆ ମୁଖ୍ୟ ରାସ୍ତାରେ ଯାତାୟାତ ବନ୍ଦ ହୋଇଯାଇଛି। ଫଳରେ ଡକରବାଡ଼ି, ଗବାଟବାଡ଼ି ଗ୍ରାମବାସୀ ସ୍ବାସ୍ଥ୍ୟସେବା ସହ ଜରୁରୀକାଳିନ ସେବା ପାଇବାରୁ ହଇରାଣ ଭୋଗୁଛନ୍ତି। ସେହିପରି ଉକ୍ତ ରାସ୍ତାରୁ ପିଚୁ ଉଠିଯାଇ କାଦୁଅ ଓ ଖାଲଖମାରେ ପରିଣତ ହୋଇଛି। ଗର୍ଭବତୀ ମହିଳା କି ଅନ୍ୟ କୌଣସି ରୋଗୀଙ୍କୁ ସ୍ବାସ୍ଥ୍ୟକେନ୍ଦ୍ର ପହଞ୍ଚାଇବା ମୁସ୍କିଲ ହେଉଥିବା ଗବାଟବାଡ଼ି ଗ୍ରାମର ଫ୍ରାଞ୍ଚାଇସ ପ୍ରଧାନ, ମନୋଜ ପ୍ରଧାନ, ଦାନୁଙ୍ଗା ପ୍ରଧାନ ପ୍ରମୁଖ କହିଛନ୍ତି। ଅଟୋ ଚାଲାକ ନୀଳମଣି ସାହୁ କହିଛନ୍ତି ଯେ, ଏଭଳି ରାସ୍ତା ଉପରେ ଗଛ ପଡ଼ି ଅବରୋଧ ହେବାର ଏକ ସପ୍ତାହ ବିତିଯାଇଥିଲେ ସୁଦ୍ଧା କୌଣସି ଗ୍ରାମ୍ୟ ଉନ୍ନୟନ ବିଭାଗ କିମ୍ବା ବିଦ୍ୟୁତ ବିଭାଗ କର୍ମଚାରି ଗବାଟବାଡ଼ିରେ ପହଞ୍ଚି ନ ଥିବା ସେ ଅଭିଯୋଗ କରିଛନ୍ତି। ଏନେଇ ଗ୍ରାମ୍ୟ ଉନ୍ନୟନ ବିଭାଗର ସହକାରୀ ନିର୍ବାହୀ ଯନ୍ତ୍ରୀ ରମାକାନ୍ତ ପଟ୍ଟନାୟକଙ୍କ ସହ ଯୋଗାଯୋଗ କରାଯିବାରୁ ଏସମ୍ପର୍କରେ ସେ ଜାଣି ନ ଥିଲେ ସେ ଶୁଣିଲେ ଘଟଣାସ୍ଥଳକୁ ଯାଇ ଦେଖି ପଦକ୍ଷେପ ନେବେ ବୋଲି କହିଛନ୍ତି। ସେହିପରି ବିଦ୍ୟୁତ ବିଭାଗର କନିଷ୍ଠ ଯନ୍ତ୍ରୀ ଶିବପ୍ରଦାଡ଼ ନାୟକଙ୍କ ସହ ଯୋଗାଯୋଗ କରାଯିବାରୁ ସେ କହିଛନ୍ତି, ଗବାଟବାଡ଼ିଠାରୁ କୁଡ଼ିମୁଞ୍ଜାକୁ ନୂତନ ବିଦ୍ୟୁତ ସଂଯୋଗ କରାଯାଉଛି। ଉକ୍ତ ତାର ଛିଣ୍ଡିବା ସହ ବିଦ୍ୟୁତଖୁଣ୍ଟ ଭାଙ୍ଗିଛି। ତାକୁ ଠିକା ସଂସ୍ଥାକୁ କହି ମରାମତି କରାଯିବ ବୋଲି କହିଛନ୍ତି ଉକ୍ତ ନୂତନ ଲାଇନରେ ବିଦ୍ୟୁତ୍ ସଂଯୋଗ କରାଯାଇ ନ ଥିବା ସେ ସ୍ପଷ୍ଟ କରିଛନ୍ତି।
