ବରଗଡ଼,୨୮।୫(ପ୍ରେମାନନ୍ଦ ଖମାରୀ): ବରଗଡ଼ ଜିଲାର ବିଭିନ୍ନ ଅଞ୍ଚଳରେ ଗୁରୁବାର କାଳବୈଶାଖୀ ପ୍ରଭାବରେ ଝଡ଼ବତାସ ଓ ବର୍ଷା ହୋଇଛି। ବର୍ଷା ଯୋଗୁ କ୍ଷେତ, ଖଳାରେ ରହିଥିବା ଅମଳ ଧାନ ଭିଜି ଯାଇଛି।
କେବଳ ସେତିକି ନୁହେଁ, ଝଡବତାସରେ ପବନର ବେଗ ଏତେ ତୀବ୍ର ଥିଲା ଯେ, ବିଭିନ୍ନ ସ୍ଥାନରେ ଗଛଗୁଡ଼ିକ ଭାଙ୍ଗି ରାସ୍ତା ଓ ବିଦ୍ୟୁତ୍ ତାର ଉପରେ ପଡିଛି। ଫଳରେ ଯାତାୟାତ ଓ ବିଦ୍ୟୁତ୍ ସେବା ବାଧାପ୍ରାପ୍ତ ହୋଇଛି।
ବରଗଡ଼ ଗାନ୍ଧୀ ଛକରେ ଏକ ଗଛ ଭାଙ୍ଗି ପଡିବାରୁ ବିଦ୍ୟୁତ୍ ସେବା ବ୍ୟାହତ ହୋଇଛି। ସା ୭ଟାରୁ ରାତି ୯ଟା ୩୦ସୁଦ୍ଧା ସହରର ବିଭିନ୍ନ ଅଞ୍ଚଳକୁ ବିଦ୍ୟୁତ୍ ସେବା ଯୋଗାଇବା ସ୍ବାଭାବିକ ହୋଇପାରି ନ ଥିଲା। ଫଳରେ ଲୋକଙ୍କୁ ଅନ୍ଧାରରେ ରହିବାକୁ ପଡିଛି। ବିଭାଗୀୟ କର୍ମଚାରୀମାନେ ଭାଙ୍ଗିଲା ଗଛ ହଟାଇବା ସହିତ ବିଦ୍ୟୁତ୍ ସେବା ଯୋଗାଣକୁ ସ୍ବାଭାବିକ କରିବା ପାଇଁ ଲାଗି ପଡିଛନ୍ତି। ଜିଲାର ଭେଡେନ, ଅତାବିରା ସମେତ ବିଭିନ୍ନ ସ୍ଥାନରେ ଏଭଳି ସ୍ଥିତି ଉପୁଜିଥିବା ସୂଚନା ମିଳିଛି।