ସମ୍ବଲପୁର,୪।୧(ବ୍ୟୁରୋ): ବହୁ ବାଦବିବାଦ ପରେ ସମ୍ବଲପୁର ଜିଲା ମୁଖ୍ୟ ଚିକିତ୍ସାଳୟକୁ କୋଭିଡ-୧୯ ମେଡିକାଲ କରାଯାଇଥିଲା। ତେବେ କୋଭିଡ ମେଡିକାଲ ଗତ ନଭେମ୍ବର ୧୯ରୁ ଭିମ୍ସାର ସ୍ଥାନାନ୍ତର ହେବା ପରେ ମଧ୍ୟ ଜିଲା ମୁଖ୍ୟ ଚିକିତ୍ସାଳୟ ସ୍ଥିତିରେ ସୁଧାର ଆସିନାହିଁ। ସେ ସମୟରେ ଯାହାକୁ ନେଇ ଭୟ କରାଯାଉଥିଲା ଏବେ ତାହା ସତ ହୋଇଛି । ମେଡିସିନ ବିଭାଗରେ ମହିଳା ଓ ପୁରଷଙ୍କ ପାଇଁ ୧୦୦ ଶଯ୍ୟା ରହିଥିଲା। ଏବେ କେବଳ ୨୭ ଶଯ୍ୟା ରହିଛି। ତେଣୁ ରୋଗୀ ଚିକିତ୍ସାରେ ବାଧା ଉପୁଜିଛି। କୋଭିଡ ସମୟରେ ପୁରଷ ମେଡିସିନ ୱାର୍ଡକୁ ଆଇସିୟୁଓ ମହିଳା ମେଡିସିନ ୱାର୍ଡକୁ ଆଇସୋଲେସନ ୱାର୍ଡ କରାଯାଇଥିଲା। ପୂର୍ବରୁ ପଡିଥିବା ବେଡ ସଂଖ୍ୟାରେ ଏବେ ହ୍ରାସ ପାଇଛି। ଏବେ ପ୍ରତିଦିନ ଆସୁଥିବା ରୋଗୀଙ୍କ ପାଇଁ ଚିକିତ୍ସାରେ ବାଧା ହେଉଛି। ପ୍ରତିଦିନ ୧୦ରୁ ୧୨ ଜଣ ରୋଗୀ ମେଡିସିନ ବିଭାଗରେ ଭର୍ତ୍ତି ହେଉଛନ୍ତି। ତାହା ତୁଳନାରେ ୩ରୁ ୪ ଜଣ ସୁସ୍ଥ ହୋଇ ଘରକୁ ଫେରୁଛନ୍ତି। ତେଣୁ ରୋଗୀ ମାନଙ୍କୁ ଚିକିତ୍ସା ସେବା ଯୋଗାଇଦେବା କଷ୍ଟକର ହୋଇ ପଡିଛି। ଏବେ ଶୀତ କାକରରେ ରୋଗୀ ଓ ସମ୍ପର୍କୀୟମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଅନେକ ସମୟରେ ଡାକ୍ତରମାନେ ଶଯ୍ୟା ଅଭାବରୁ ଭିମ୍ସାରକୁ ରୋଗୀ ସ୍ଥାନାନ୍ତର କରୁଛନ୍ତି । ଫଳରେ ସେମାନେ ହଇରାଣ ଓ ଖର୍ଚ୍ଚାନ୍ତ ହେଉଛନ୍ତି। ଛୋଟ ଓ ସାଧାରଣ ରୋଗୀମାନେ ମଧ୍ୟ ବାଧ୍ୟ ହୋଇ ଘରୋଇ ମେଡିକାଲକୁ ଯାଉଛନ୍ତି। ଏ ଦିଗରେ ଜିଲା ପ୍ରଶାସନ ତୁରନ୍ତ ପଦକ୍ଷେପ ଗ୍ରହଣ କରିବାକୁ ଦାବି ହେଉଛି। ଏ ସମ୍ପର୍କରେ ଏଡିିଏମ୍ଓ ଅଲେଖ ମହାପାତ୍ର କହିଛନ୍ତି ଯେ, ସମସ୍ୟା ଉପରେ ଅବଗତ ରହିଛୁ। ଏ ନେଇ ବିଭାଗୀୟ ଉଚ୍ଚପଦସ୍ଥ ଅଧିକାରୀଙ୍କୁ ଜଣାଇ ଦିଆଯାଇଛି। ଖୁବ୍ଶୀଘ୍ର ଏହାର ସମାଧାନ ହୋଇଯିବ ବୋଲି ସେ କହିଥିଲେ।
ସୂଚନାଯୋଗ୍ୟ, ଜିଲା ସଦର ଡାକ୍ତରଖାନାକୁ ପ୍ରତିଦିନ ସହର ସମେତ ଜିଲାର ବିଭିନ୍ନ ଅଞ୍ଚଳରୁ ରୋଗୀମାନେ ଚିକିତ୍ସା ପାଇଁ ଆସନ୍ତି। କୋଭିଡ ମେଡିକାଲ ବନ୍ଦ ହେବା ପରେ ରୋଗୀ ସଂଖ୍ୟାରେ ବୃଦ୍ଧି ପାଇଛି । ଏବେ ଏହି ଡାକ୍ତରଖାନାରେ ବିଭିନ୍ନ ସମସ୍ୟା ଲାଗି ରହିଛି ।
