ଚମ୍ପୁଆ, ୨୬।୪(ଡି.ଏନ୍.ଏ.) କେନ୍ଦୁଝର ଜିଲା ଚମ୍ପୁଆ ଉପଖଣ୍ଡ ଖଣି ଖାଦାନ ଅଞ୍ଚଳ ଭାବେ ବେଶ ପରିଚିତ। ଉକ୍ତ ଖଣି ଖାଦାନରୁ ଦୈନିକ ହଜାର ହଜାର ଟ୍ରକ ଏବଂ ଟ୍ରେଲର୍ରେ ଲୁହା ପଥର ଓ ଗୁଣ୍ଡ(ଫାଇନ୍ସ) ବାହାର ରାଜ୍ୟକୁ ଚାଲାଣ କରାଯାଉଛି। ମାତ୍ର ପରିବହନ ସମୟରେ ଆବଶ୍ୟକ ପଦକ୍ଷେପ ନିଆଯାଉ ନ ଥିବା ଦେଖିବାକୁ ମିଳିଛି। ଟ୍ରେଲର ଓ ଟ୍ରକ୍ ଗୁଡିକରେ ପରିବହନ ସମୟରେ ଗୁଣ୍ଡ ଗୁଡିକ ନ ଉଡିବା ପାଇଁ ଗାଡି ଚାଳକମାନେ ମାଲ ଗୁଡିକୁ ଘୋଡାଇ ନେବାର ନିୟମ ରହିଥିବା ବେଳେ ଅଧାରୁ ଅଧିକ ଗାଡ଼ି ଚାଳକମାନେ ଏଥିପ୍ରତି ଦୃଷ୍ଟି ଦେଉ ନାହାନ୍ତି। ପରିବହନ ସମୟରେ ଟ୍ରେଲର୍ ବା ଟ୍ରକ୍ ପଛରେ ଆସୁଥିବା ଦୁଇ ଚକିଆ ଯାନ ଓ ପଦଯାତ୍ରୀଙ୍କ ଆଖିରେ ଏହି ଗୁଣ୍ଡ ଗୁଡିକ ପଡୁଛି। ଫଳରେ ଦୁର୍ଘଟଣାର ସମ୍ଭାବନା ଦେଖା ଦେଇଛି। ଅନ୍ୟପକ୍ଷରେ ଗାଡ଼ି ଚାଳକମାନେ ଦ୍ରୁତ ଗତିରେ ଗାଡ଼ି ଚଳାଇବାରୁ ଏହି ଗୁଣ୍ଡ ଗୁଡିକ ଅଧିକ ଉଡୁଥିବା ଦେଖିବାକୁ ମିଳିଛି। କେତେକ ଗାଡ଼ି ଚାଳକ ନାମକୁ ମାତ୍ର ନିୟମକୁ ଆଖିଠାର ମାରି ଛିଣ୍ଡା ପଲିଥିନ ଘୋଡାଇ ଗାଡି ଚଳାଉଛନ୍ତି। ଏଥିପ୍ରତି ଅଙ୍କୁଶ ନ ଥିବା ଦେଖାଯାଇଛି। ଏସମ୍ପର୍କରେ ଚମ୍ପୁଆ ଥାନା ଅଧିକାରୀ ଗଗନ ନାଏକ କହିଛନ୍ତି, ପଲିଥିନ ନ ଘୋଡାଇ ମାଲ ପରିବହନ କରୁଥିବା ଯାନ ଗୁଡିକୁ ଯାଞ୍ଚ କରାଯାଇ ଜରିମାନା କରାଯିବ।
