ଯୋଡ଼ା,୨୧।୭(ଡି.ଏନ.ଏ.): ୨୦୨୦ରେ କେନ୍ଦୁଝର ଜିଲା ଖଣି ମଣ୍ଡଳର ଏକାଧିକ ଖଣିକୁ ବିଭିନ୍ନ କମ୍ପାନୀ ନିଲାମ ନେଇଛନ୍ତି। ଏପରି କି କିଛି ଖଣିକୁ ବିକ୍ରି ମୂଲ୍ୟଠାରୁ ଶହେ ପ୍ରତିଶତରୁ ଅଧିକ ମୂଲ୍ୟ ଦେଇ ଏକାଧିକ ବ୍ୟବସାୟୀମାନେ ହାତେଇଛନ୍ତି। ନୂଆ ଭାବେ ନିଲାମ ମାଧ୍ୟମରେ ଲିଜ୍ ପାଇଥିବା କମ୍ପାନୀଗୁଡ଼ିକ ସେମାନଙ୍କ ଖଣିଜ ଉତ୍ତୋଳନ ଆରମ୍ଭ କରିଛନ୍ତି। ତେବେ ନିଲାମ ଡାକରେ ଶହେ ପ୍ରତିଶତଠାରୁ ଅଧିକ ମୂଲ୍ୟ ଦେବେ ବୋଲି ସରକାରଙ୍କଠାରେ ଯେଉଁ ଚୁକ୍ତି କରିଥିଲେ ସେଗୁଡ଼ିକୁ କେତେକ କମ୍ପାନୀ ପୂରଣ କରିବାରେ ସଫଳ ହୋଇପାରୁ ନାହାନ୍ତି। ଫଳରେ ଅଭିନବ ଉପାୟରେ ଉକ୍ତ ଖଣି କମ୍ପାନୀ ଅନିୟମିତତା କରି ଖଣିଜ ପରିବହନ କରୁଥିବା ଜଣାପଡ଼ିଛି। ଏଭଳି ଅନିୟମିତତା ସମ୍ପର୍କରେ ରାଜ୍ୟ ସରକାରଙ୍କ ଖଣି ବିଭାଗର ନଜରକୁ ଆସିବା ପରେ ଗତ ୧୦ତାରିଖରେ ଷ୍ଟେଟ ଲେଭଲ ଏନ୍ଫୋର୍ସମେଣ୍ଟ ସ୍ବାର୍ଡ ଜରିବାହାଲସ୍ଥିତ କାଶ୍ଭି ଖଣିରେ ଯାଞ୍ଚ କରିଥିଲା। ଯାଞ୍ଚ ସମୟରେ ଖଣିଜ ପରିବହନରେ ବ୍ୟାପକ ଅନିୟମିତତା ହୋଇଥିବା ଜଣାପଡ଼ିଛି। ଏନେଇ ସବିଶେଷ ତଥ୍ୟ ପାଇବା ପରେ ଯୋଡ଼ା ଖଣି ଯୁଗ୍ମ ନିର୍ଦ୍ଦେଶକ ସଲିଳ ବେହେରା ପତ୍ର ସଂଖ୍ୟା ୪୦୯୯/ତା୧୭।୭।୨୦୨୧ରେ ଜରିବାହାଲ ଖଣିରୁ ଖଣିଜ ପରିବହନକୁ ବାତିଲ କରିଛନ୍ତି। କାଶ୍ଭି ଖଣିର ଖଣି ପ୍ରବନ୍ଧକଙ୍କୁ ଏନେଇ ପତ୍ର ପଠାଯାଇଛି। ଚିଠିରେ ଉଲ୍ଳେଖ ରହିଛି ଯେ, ଜରିବାହାଲସ୍ଥିତ କାଶ୍ଭି ଖଣିରେ ଅନିୟମିତତା କରାଯାଇ ଖଣିଜ ଷ୍ଟାକ(ଗଚ୍ଛିତ) କରାଯାଇଥିଲା। ଯେଉଁ ଗ୍ରେଡ(ମାନ)ର ଲୁହାପଥର ପରିବହନ ପାଇଁ ଅନୁମୋଦନ ନିଆଯାଇଥିଲା, ତାହାଠାରୁ ଉନ୍ନତମାନର ଲୁହାପଥର ଷ୍ଟାକ୍ରେ ଗଛିତ ରଖାଯାଇଥିଲା। କମ୍ ମୂଲ୍ୟ ଥିବା ଲୁହାପଥର ଗୁଣ୍ଡ ଷ୍ଟାକରେ ଶତକଡ଼ା ୧୦ରୁ ୧୫ ପ୍ରତିଶତ ଅଧିକ ମୂଲ୍ୟ ଥିବା ଉନ୍ନତମାନର ଲୁହାପଥର ରଖାଯାଇଛି, ଯାହାକି ପ୍ରୋଭିଜନ ଅଫ୍ ଓଏମ୍(ପିଟିଏସ୍ ଆଣ୍ଡ ଆଇଏମ୍ ଆଣ୍ଡ ଆରପିଏସ୍ଟି ଆଣ୍ଡ ଟି) ରୁଲ ୨୦୧୬ ର ଉଲ୍ଲଂଘନ ହୋଇଥିବା ଚିଠିରେ ସୂଚନା ଦିଆଯାଇଛି । ଏନେଇ କାଶ୍ଭି ଖଣି ପକ୍ଷରୁ କୌଣସି ମତାମତ ମିଳିପାରି ନାହିଁ।
