ଇମ୍ଫାଲ,୨୨।୧୧: ପୁଣି ଥରେ ହିଂସାର ନିଆଁରେ ଜଳୁଛି ମଣିପୁର। ନିକଟରେ ମେଟେଇ ସମ୍ପ୍ରଦାୟର ମହିଳା ଏବଂ ଶିଶୁଙ୍କ ମୃତଦେହ ମିଳିବା ପରେ ରାଜ୍ୟରେ ହିଂସା ଆରମ୍ଭ ହୋଇଥିଲା। ସେବେଠାରୁ ସମଗ୍ର ରାଜ୍ୟରେ ପରିସ୍ଥିତି ଉତ୍ତେଜନାପୂର୍ଣ୍ଣ ରହିଛି। ଏହି ସମୟରେ ମଣିପୁର ସମ୍ପର୍କରେ ଏକ ରିପୋର୍ଟରେ ଏକ ବଡ଼ ଖୁଲାସା କରାଯାଇଛି। ରିପୋର୍ଟ ଅନୁଯାୟୀ, ମଣିପୁରରେ ୧୫ ରୁ ୨୦ ବର୍ଷ ବୟସର ବାଳିକାମାନଙ୍କୁ ଅସ୍ତ୍ରଶସ୍ତ୍ର ବ୍ୟବହାର ଉପରେ ତାଲିମ ଦିଆଯାଉଛି।
ରିପୋର୍ଟ ଅନୁଯାୟୀ, ମଣିପୁରରେ ଝିଅମାନଙ୍କୁ ୪୫ ଦିନ ପାଇଁ ତାଲିମ ଦିଆଯାଉଛି। ଏଥିରେ ପ୍ରତ୍ୟେକ ବ୍ୟାଚରେ ୫୦ଜଣ ଝିଅ ରହୁଛନ୍ତି। ମଣିପୁରର ୟାଇଥିବି ଲୋକୋଲ, ଥାନା ଖୋଙ୍ଗଜାମ, ଜିଲା କାକଚିଙ୍ଗଠାରେ ଥିବା ରିଲିଫ କ୍ୟାମ୍ପରେ ଏହି ତାଲିମ କେନ୍ଦ୍ର ଖୋଲାଯାଇଛି। ଆଇଡିପିଏସ୍ ପାଇଁ ସରକାରଙ୍କ ଦ୍ୱାରା ସ୍ଥାପିତ ରିଲିଫ କ୍ୟାମ୍ପରେ ଏହି ତାଲିମ ଦିଆଯାଉଛି।
ଝିଅମାନେ ତାଲିମ ସମାପ୍ତ କରିବା ପରେ ସେମାନଙ୍କୁ ସିଧାସଳଖ ସଂଗଠନରେ ସାମିଲ କରାଯାଉନାହିଁ। ଏନ୍ଆଇଏର ଅନୁସନ୍ଧାନରୁ ଜଣାପଡିଛି ଯେ ମିଆଁମାରରୁ ମଣିପୁର ପର୍ଯ୍ୟନ୍ତ ଅସ୍ତ୍ରଶସ୍ତ୍ର ଚୋରା ଚାଲାଣ ମଧ୍ୟ ମଣିପୁରରେ ହିଂସା ପରିସ୍ଥିତି ପଛର ଏକ ପ୍ରମୁଖ କାରଣ। ଯାହାର ତଥ୍ୟ ନିକଟରେ ଦାଖଲ ହୋଇଥିବା ଏକ ଚାର୍ଜସିଟରୁ ସାମ୍ନାକୁ ଆସିଛି। ମିଆଁମାରରୁ ଉଭୟ ଗୋଷ୍ଠୀ ନିକଟରେ ଅସ୍ତ୍ରଶସ୍ତ୍ର ପହଞ୍ଚୁଛି। ଏହା ମଣିପୁରରେ ହିଂସା ବିସ୍ତାର ପାଇଁ ବ୍ୟବହୃତ ହେଉଛି।
ଗତ ମାସରେ କାକଚିଙ୍ଗ ଏବଂ ଥୋବାଲ ଜିଲ୍ଲାରେ ସୁରକ୍ଷା ବାହିନୀ ଦ୍ୱାରା ପୃଥକ ସର୍ଚ୍ଚ ଅପରେସନ ବେଳେ ଅସ୍ତ୍ରଶସ୍ତ୍ର ଏବଂ ଗୁଳି ଜବତ କରାଯାଇଥିଲା। ସୁରକ୍ଷା ବାହିନୀ ଗ୍ରେନେଡ, ଅନେକ ରାଇଫଲ୍ ଏବଂ ବନ୍ଧୁକ ଜବତ କରିଥିଲା।
କହିରଖୁଛୁ, ଏହି ତାଲିମ ଶିବିରଗୁଡ଼ିକ ସରକାରଙ୍କ ଦ୍ୱାରା ପରିଚାଳିତ ରିଲିଫ କ୍ୟାମ୍ପରେ ଚାଲିଛି। ତାଲିମ ନେଉଥିବା ଝିଅମାନଙ୍କର ବୟସ ୧୫ ରୁ ୨୦ ବର୍ଷ ଅଟେ। ରାଜ୍ୟରେ ହିଂସାତ୍ମକ କାର୍ଯ୍ୟକଳାପରେ ସାମିଲ ହେବାକୁ ସେମାନଙ୍କୁ ପ୍ରସ୍ତୁତ କରାଯାଉଛି।
ମଣିପୁରର ସାମ୍ପ୍ରତିକ ପରିସ୍ଥିତି କ’ଣ?
ମଣିପୁରରେ ଜାତି ବିବାଦର ପ୍ରଥମ ଘଟଣା ୩ ମଇ ୨୦୨୩ ରେ ସାମ୍ନାକୁ ଆସିଥିଲା। ସେବେଠାରୁ ଉଭୟ କୁକି-ମେଟେଇ ସମ୍ପ୍ରଦାୟର ସମୁଦାୟ ୨୪୦ ଜଣଙ୍କର ମୃତ୍ୟୁ ଘଟିଛି ଏବଂ ହଜାର ହଜାର ଲୋକ ବିସ୍ଥାପିତ ହୋଇଛନ୍ତି। ରାଜ୍ୟରେ ହିଂସା ଜାରି ରହିଛି। ଚଳିତ ମାସ ଆରମ୍ଭରେ ଜିରିବାମରେ ତିନିଜଣ ମହିଳା ଏବଂ ସେମାନଙ୍କ ତିନି ପିଲାଙ୍କ ହତ୍ୟା ପରେ ଉତ୍ତେଜନା ବୃଦ୍ଧି ପାଇଛି। ଜିରିବମ ଘଟଣାର ପ୍ରତିବାଦରେ ଲୋକଙ୍କ କ୍ରୋଧ ଉଠିଛି ଏବଂ ଗତ କିଛି ଦିନ ହେବ ବିକ୍ଷୋଭକାରୀମାନେ ଅନେକେ ବିଧାୟକଙ୍କ ଘରେ ଭଙ୍ଗାରୁଜା କରିଥିଲେ। ଜିରିବାମରେ ପୋଲିସ ଗୁଳି ଚଳାଇବାରୁ ଜଣେ ବିରୋଧକାରୀଙ୍କ ମୃତ୍ୟୁ ହୋଇଥିବା ଅଭିଯୋଗ ମଧ୍ୟ ହୋଇଛି। ଏହାଦ୍ୱାରା ଉତ୍ତେଜନା ମଧ୍ୟ ବୃଦ୍ଧି ପାଇଛି।
ରାଜ୍ୟରେ ସାମ୍ପ୍ରତିକ ପରିସ୍ଥିତି ଯୋଗୁ ଏନ୍ପିପି ଭାଜପା ସରକାରଙ୍କଠାରୁ ସମର୍ଥନ ପ୍ରତ୍ୟାହାର କରିନେଇଛି। ଏନ୍ ବିରେନ୍ ସିଂଙ୍କୁ ମୁଖ୍ୟମନ୍ତ୍ରୀ ପଦରୁ ନ ହଟାଇବା ପର୍ଯ୍ୟନ୍ତ ସମର୍ଥନ ଦେବେ ନାହିଁ ବୋଲି ଏନ୍ପିପି ଦାବି କରିଛି।
