ଡୁଙ୍ଗୁରିପାଲି, ୨୮।୪ (ଦୀନବନ୍ଧୁ ସୁନା): ବରଗଡ଼ -ବଲାଙ୍ଗୀର ୨୬ ନଂ ଜାତୀୟ ରାଜପଥରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି। ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି FCI ଓ ହାଇସ୍କୁଲ ମଝିରେ ମଙ୍ଗଳବାର ଅପରାହ୍ନ ୩ ଟାରେ ଏକ ବସ ଓ କାର ମଧ୍ୟରେ ମୁହାଁମୁହିଁ ଧକ୍କା ହୋଇଛି।
ସୂଚନା ଅନୁଯାୟୀ, ଗୋଟିଏ ପରିବାରର ୬ ଜଣ ସଦସ୍ୟ ରାଞ୍ଚିରୁ ବଲାଙ୍ଗୀର ଅଭିମୁଖେ କାର (CG 17 LD 8549) ରେ ଯାତ୍ରା କରୁଥିଲେ। FCI ଓ ହାଇସ୍କୁଲ ମଧ୍ୟରେ ଥିବା ଏକ ବୁଲାଣିରେ ବିପରୀତ ଦିଗରୁ ଆସୁଥିବା ଏକ ଘରୋଇ ବସ (OR 17k 0576) ସହ କାରଟିର ମୁହାଁମୁହିଁ ଧକ୍କା ହୋଇଥିଲା। ବସଟି ଡୁଙ୍ଗୁରିପାଲିରୁ ତେଲ ଭରିବାକୁ ଯାଉଥିବା ସମୟରେ ଏହି ଦୁର୍ଘଟଣା ଘଟିଥିବା ଜଣାପଡ଼ିଛି।
ଏହି ଦୁର୍ଘଟଣାରେ କାର ଚାଳକ, ରାଞ୍ଚିର ବୀରେନ୍ଦ୍ର କୁମାର ସିଂ (୬୫)ଙ୍କର ମୃତ୍ୟୁ ଘଟିଛି। ଡାକ୍ତରଖାନାରେ ତାଙ୍କୁ ମୃତ ଘୋଷଣା କରାଯାଇଛି। ଏଥିସହିତ ୪ ଜଣ ଗୁରୁତର ଆହତ ହୋଇଛନ୍ତି। ସେମାନେ ହେଲେ ହର୍ସଲ କୁମାର (୪୮) (ମୃତକଙ୍କ ପୁଅ), ନିରମଲା ସିଂ (୬୨) (ମୃତକଙ୍କ ସ୍ତ୍ରୀ), ଶୁକଦେବ ଦାସ (୪୯) (ବସ ଚାଳକ), ଭାଗବତ ବେଣ୍ଡକାର (୩୨) (ବସ ହେଲପର)।
ଗୁରୁତରମାନଙ୍କୁ ପ୍ରାଥମିକ ଚିକିତ୍ସା ପରେ ବୁର୍ଲା ଭୀମସାର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି। କାରରେ ଥିବା ହର୍ସଲ କୁମାରଙ୍କ ସ୍ତ୍ରୀ ଓ ଦୁଇଟି ଛୋଟ ପିଲା ଏହି ଦୁର୍ଘଟଣାରେ ଅଳ୍ପକେ ରକ୍ଷା ପାଇଛନ୍ତି।
ପ୍ରତକ୍ଷ୍ୟଦର୍ଶି, ସ୍ଥାନୀୟ ଲୋକ ଓ ସେବା ଫାଉଣ୍ଡେସନର ସଦସ୍ୟମାନେ ତୁରନ୍ତ ଉଦ୍ଧାର କାର୍ଯ୍ୟ କରିଥିଲେ। ଖବର ପାଇ ଡୁଙ୍ଗୁରିପାଲି ଥାନା ଅଧିକାରୀ ରୋଜାଲିନ ପଟେଲ ଓ ତାଙ୍କ ଟିମ ଘଟଣା ସ୍ଥଳରେ ପହଞ୍ଚିଥିଲେ। ଗାଡ଼ି ଦୁଇଟିକୁ କ୍ରେନ ଯୋଗେ ରାସ୍ତାରୁ ହଟାଯାଇ ଥାନାରେ ରଖାଯାଇଛି। ଦୁର୍ଘଟଣା ଯୋଗୁଁ ଜାତୀୟ ରାଜପଥ ପ୍ରାୟ ୧ ଘଣ୍ଟା ଧରି ଜାମ ହୋଇଥିଲା।
ପୋଲିସ ମୃତଦେହକୁ ଜବତ କରିଛି। ଏହି ଘଟଣାରେ ମାମଲା (Case No. 107, Dt. 28/4/2026) ରୁଜୁ କରି ତଦନ୍ତ ଜାରି ରହିଥିବା ଥାନା ଅଧିକାରୀ ରୋଜାଲିନ ପଟେଲ ସୂଚନା ଦେଇଛନ୍ତି।
