ଛତ୍ରପୁର,୩ା୧୦(ଡି.ଏନ୍.ଏ.): ଗଞ୍ଜାମ ଜିଲା ବ୍ରହ୍ମପୁର ସହରରେ ଟ୍ରାଫିକ୍ ମନିଟରିଂ ଏକ ପ୍ରକାର ଚ୍ୟାଲେଞ୍ଜ ହୋଇଛି। ସହରକୁ ଗଞ୍ଜାମ ସମେତ ଗଜପତି, କନ୍ଧମାଳ ଓ ଦକ୍ଷିଣ ଓଡିଶାର ବିଭିନ୍ନ ଜିଲାରୁ ଦୈନିକ ବହୁ ସଂଖ୍ୟାରେ ଯାନବାହନ ଆସିବା ସହ ହଜାର ହଜାର ଲୋକ ବିଭିନ୍ନ କାମରେ ଆସିଥାନ୍ତି। ଏଥିଲାଗି ଟ୍ରାଫିକ୍ ଜାମ୍ ଏକ ସାଧାରଣ କଥା ହେଲାଣି। ଅନ୍ୟପକ୍ଷରେ ଟ୍ରାଫିକ୍ ନିୟମକୁ କଡ଼ାକଡ଼ି ପାଳନ ପାଇଁ ସୁପ୍ରିମକୋର୍ଟଙ୍କ ନିର୍ଦ୍ଦେଶ ରହିଛି। ହେଲେ ସହରରେ ଟ୍ରାଫିକ୍ ମନିଟରିଂ ପାଇଁ ପର୍ଯ୍ୟାପ୍ତ ପ୍ରମୁଖ ଛକରେ ସିସି କ୍ୟାମେରା ଲାଗିନି। ମାତ୍ର ୪ଟି ସ୍ଥାନରେ ସାଧାରଣ ସିସି କ୍ୟାମେରା ଲାଗିଛି। ଏଚ୍ଡି ସିସି କ୍ୟାମେରା ବଦଳରେ ସାଧାରଣ ଲାଗିଛି।
ବ୍ରହ୍ମପୁର ସହରର ଗେଟ୍ ବଜାର, କମାପଲ୍ଳୀ, ପିଭିଏନ୍ ରାଓ ଛକ ଓ ଟାଟା ବେଞ୍ଜ ଛକରେ ସାଧାରଣ ସିସି କ୍ୟାମେରା ଲାଗିଛି। ବ୍ରହ୍ମପୁର ମହାନଗର ନିଗମ ପକ୍ଷରୁ ଟ୍ରାଫିକ୍ ମନିଟରିଂ ପାଇଁ ଏହା ଲଗାଯାଇଥିଲା। ସେତିକିରେ ଏହି ବ୍ୟବସ୍ଥା ଅଟକି ରହିଛି। ବ୍ରହ୍ମପୁର ମହାନଗର ନିଗମ, ବ୍ରହ୍ମପୁର ଏସପି ଅଫିସ୍ ଓ ଛତ୍ରପୁର ସ୍ଥିତ ଆରଟିଓ ଅଫିସ୍ ପକ୍ଷରୁ ଉକ୍ତ ସିସି କ୍ୟାମେରା ଦ୍ୱାରା ଟ୍ରାଫିକ୍ ମନିଟରିଂ ହେଉଛି। ଅନ୍ୟପକ୍ଷରେ ବ୍ରହ୍ମପୁର ସହରର ଆହୁରି ବହୁ ଗୁରତ୍ୱପୂର୍ଣ୍ଣ ଛକ ରହିଛି। ସେଠାରେ ଟ୍ରାଫିକ୍ ଜାମର ମୁକାବିଲା ସହ ମନିଟରିଂର ଜରୁରୀ ଆବଶ୍ୟକତା ରହିଛି। ବ୍ରହ୍ମପୁର ସହରରେ ଆହୁରି ସିସି କ୍ୟାମେରା ଏବଂ ଏଗୁଡିକ ଏଚ୍ଡି ହେବା ଆବଶ୍ୟକ ବୋଲି ଗତ କିଛି ଦିନ ପୂର୍ବେ ଛତ୍ରପୁର ଠାରେ ଅନୁଷ୍ଠିତ ପାର୍ଲାମେଣ୍ଟ ସଦସ୍ୟ ସ୍ତରୀୟ ସଡକ ସୁରକ୍ଷା କମିଟି ବୈଠକରେ ଆଲୋଚନା ହୋଇଥିଲା। ଟ୍ରାଫିକ୍ ମନିଟରିଂ ପାଇଁ ଏହି ସିସି କ୍ୟାମେରା ଲଗାଯାଇଥିଲା ଏବଂ ସହରର ସମସ୍ତ ଛକରେ ଏହା ଲଗାଯିବା କଥା ବୋଲି ବିଏମସି କମିଶନର ସେତେବେଳେ କହିଥିଲେ। ଅନୁଦାନ ମିଳିଲେ ଉକ୍ତ ସିସି କ୍ୟାମେରା ଲଗାଯାଇପାରିବ ବୋଲି କୁହାଯାଇଥିଲା। ବ୍ରହ୍ମପୁର ସହର ପ୍ରବେଶ ପଥ ତଥା ଲାଞ୍ଜିପଲ୍ଳୀ ଛକରେ ଫ୍ଲାଏ ଓଭର ଆବଶ୍ୟକ ଥିବା ବ୍ରହ୍ମପୁର ଏସପି ମଧ୍ୟ କହିଛନ୍ତି। ଏଥିସହ ରାସ୍ତା ଗୁଡିକର ଇଂଜିନିୟରିଂ ତ୍ରୁୃଟି ରହୁଛି। ଏଥିଲାଗି ଦୁର୍ଘଟଣା ବୃଦ୍ଧି ପାଉଛି। ଏହାର ଅନୁଧ୍ୟାନ କରି ପଦକ୍ଷେପ ନେବା ଉପରେ ବ୍ରହ୍ମପୁର ଏସପି ଗୁରୁତ୍ୱାରୋପ ମଧ୍ୟ କରିଥିଲେ। ଦୈନିକ ବ୍ରହ୍ମପୁର ସହରକୁ ୪୫୦ ବସ ପ୍ରବେଶ କରୁଛି। ଏଥିସହ ମାଲ ପରିବହନ ପାଇଁ ମଧ୍ୟ ଶତାଧିକ ଟ୍ରକ ସହରକୁ ଯାତାୟତ କରିଥାଏ। ଟ୍ରକ୍ ଟର୍ମିନାଲ ପ୍ରସ୍ତାବରେ ଅଟକିଥିବା ବେଳେ ନୂଆ ବସଷ୍ଟାଣ୍ଡ କାର୍ଯ୍ୟକ୍ଷମ ହେଉନଥିବାରୁ ବସଗୁଡିକ ସହର ମଧ୍ୟରେ ଯାତାୟତ କରୁଛି।
