ପୁରୁଷୋତ୍ତମପୁର,୧୧ା୧୨(ଡି.ଏନ୍.ଏ.): ଗଞ୍ଜାମ ଜିଲା ତଥା ଦକ୍ଷିଣ ଓଡ଼ିଶାର ପ୍ରସିଦ୍ଧ ଇଷ୍ଟଦେବୀ ମା’ ତାରାତାରିଣୀ ପୀଠଟି ଏକ ପ୍ରସିଦ୍ଧ ପର୍ଯ୍ୟଟନ ସ୍ଥଳ ଭାବରେ ପରିଚିତ ହୋଇଥିବା ହେତୁ ରାଜ୍ୟ ଓ ରାଜ୍ୟ ବାହାରୁ ବହୁ ପର୍ଯ୍ୟଟକ ଏଠାକୁ ଆସିଥାନ୍ତି। ଏହି ତାରାତାରିଣୀ ପୀଠକୁ କିଭଳି ପର୍ଯ୍ୟଟକଙ୍କ ସଂଖ୍ୟା ବୃଦ୍ଧିପାଇବ ସେ ନେଇ ରାଜ୍ୟ ସରକାର ଗୁରୁତ୍ୱ ଦେଇ କୋଟି କୋଟି ଟଙ୍କା ବ୍ୟୟ କରି ମନ୍ଦିରକୁ ନବକଳେବର କରିବା ସାଙ୍ଗକୁ ଚତୁପାର୍ଶରେ ଉନ୍ନୟନମୂଳକ କାର୍ଯ୍ୟ କରିବାରେ ଲାଗିପଡ଼ିଛନ୍ତି। ବର୍ତ୍ତମାନ ପିକ୍ନିକ ଋତୁ ହୋଇଥିବା ହେତୁ ପ୍ରତ୍ୟହ ଶହଶହ ସଂଖ୍ୟାରେ ପର୍ଯ୍ୟଟକ ଏଠାକୁ ଆସି ମା’ ତାରାତାରିଣୀଙ୍କ ଦର୍ଶନ କରିବା ସାଙ୍ଗକୁ ପାହାଡ଼ ପାଦଦେଶରେ ଥିବା ମନୋରମପୂର୍ଣ୍ଣ ଜଙ୍ଗଲର ପ୍ରାକୃତିକ ସୌନ୍ଦର୍ଯ୍ୟକୁ ଉପଭୋଗ କରିବା ସହ ସେଠାରେ ବଣଭୋଜି କରି ଖାଇପିଇ ମଜା ଉଠାଇବାରେ ଲାଗିଛନ୍ତି। ହେଲେ ଏହି ଜଙ୍ଗଲର ପରିବେଶ ସମ୍ପୂର୍ଣ୍ଣ ରୁପେ ଅପରିଷ୍କାର ହୋଇ ପଡିରହିଥିବା ବେଳେ ଏହାକୁ ସଫା ସୁତରା କରିବା ଲାଗି ପ୍ରଶାସନ ପକ୍ଷରୁ ଆଦୌ ଗୁରୁତ୍ୱ ଦିଆଯାଉନାହିଁ। କୁଢ କୁଢ ଆବର୍ଜନା ପଡ଼ି ସମ୍ପୂର୍ଣ୍ଣ ଦୂଷିତ ପରିବେଶ ସୃଷ୍ଟିହୋଇଛି। ଫଳରେ ଆସୁଥିବା ପର୍ଯ୍ୟଟକମାନେ ମୁହଁ ଫେରାଇ ଚାଲିଯାଉଛନ୍ତି। ସରକାର ସ୍ବଛ ଭାରତ ମିଶନର ନାରା ଦେଇ କୋଟି କୋଟି ଟଙ୍କା ସଫେଇ ବାବଦରେ ଖର୍ଚ୍ଚ କରିବାରେ ଲାଗିଥିବା ବେଳେ ପ୍ରସିଦ୍ଧ ପର୍ଯ୍ୟଟନ ସ୍ଥଳୀ ସମ୍ପୂର୍ଣ୍ଣ ପ୍ରଦ୍ୟୁଷିତ ହେବା ଚିନ୍ତାର ବିଷୟ ପାଲଟିଛି। ତୁରନ୍ତ ଏଥିପ୍ରତି ଗଞ୍ଜାମ ଜିଲାପାଳ ଓ ପର୍ଯ୍ୟଟନ ବିଭାଗ ଦୃଷ୍ଟି ଦେଇ ପଦକ୍ଷେପ ନେବା ଲାଗି ସାଧାରଣରେ ଦାବି ହୋଇଛି।
