ବାରଙ୍ଗ,୨୪।୧(ଡି.ଏନ୍.ଏ.):ନନ୍ଦନକାନନର ବିକାଶ ପାଇଁ ରାଜ୍ୟ ତଥା କେନ୍ଦ୍ର ସରକାରଙ୍କ ପକ୍ଷରୁ କୋଟି କୋଟି ଟଙ୍କା ଆସୁଛି। ହେଲେ କର୍ତ୍ତୃପକ୍ଷ ଏହାକୁ ଠିକ୍ ଭାବେ ବ୍ୟବହାର କରିପାରୁ ନ ଥିବାରୁ ପର୍ଯ୍ୟଟକମାନେ ନାନା ହଇରାଣ ହେଉଥିବା ଅଭିଯୋଗ ହେଉଛି। ଯାହାର ଉଦାହରଣ ଏବେ ନନ୍ଦନକାନନରେ ହେଉଥିବା ଦଳ ସଫା କାମରେ ଦେଖିବାକୁ ମିଳିଛି। ଦଳ ସଫା କରୁଥିବା ଠିକାଦାର ରାସ୍ତାରୁ ଦଳ ଉଠାଉ ନ ଥିବାରୁ ପର୍ଯ୍ୟଟକମାନେ ଦଳ ଉପରେ ଚଢ଼ି ଯାତାୟାତ ହେଉଛି। ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ପ୍ରକାଶ ଯେ, ଲକ୍ଷାଧିକ ଟଙ୍କା ବ୍ୟୟ କରାଯାଇ କାଞ୍ଜିଆ ହ୍ରଦକୁ ସଫା କରାଯାଉଛି। କାଞ୍ଜିଆ ହ୍ରଦକୁ ଦଳ ମୁକ୍ତ କରିବା ପାଇଁ ରେଞ୍ଜରମାନେ ଠିକାଦାରଙ୍କ ଜରିଆରେ କାମ କରୁଛନ୍ତି। କିନ୍ତୁ କାଞ୍ଜିଆରୁ ବାହାରୁଥିବା ଦଳକୁ ରାସ୍ତା ଉପରେ ପାହାଡ ଭଳି ଗଦା କରି ରଖିଛନ୍ତି। ଦଳ ସଫା ପାଇଁ ଏହି ରାସ୍ତାକୁ ବ୍ୟବହାର କରାଯାଇଥିବାରୁ ଯାତାୟତ ବନ୍ଦ କରାଯାଇଥିବାର କୌଣସି ସୂଚନାଫଳକ ଲଗାଯାଇ ନାହିଁ। ଫଳରେ ନନ୍ଦନକାନନକୁ ବୁଲିବାକୁ ଆସୁଥିବା ପର୍ଯ୍ୟଟକ ପଶୁପକ୍ଷୀଙ୍କୁ ଦେଖିବାକୁ ଯାଉଥିବାବେଳେ କାଞ୍ଜିଆକୁଳ ରାସ୍ତାଦେଇ ଯାଉଛନ୍ତି। ପର୍ଯ୍ୟଟକମାନେ ବାଧ୍ୟ ହୋଇ ପାହଡଭଳି ଗଦା ହୋଇଥିବା ଦଳ ଉପରେ ଚଢି ଯାଉଛନ୍ତି।
