ନୂଆଦିଲ୍ଲୀ,୩।୧୨: କେନ୍ଦ୍ର ସରକାରଙ୍କ ପକ୍ଷରୁ ଦେଶର ଶ୍ରେଷ୍ଠ ୧୦ ଥାନାର ନାମ ଗୁରୁବାର ଘୋଷଣା କରାଯାଇଛି। ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଏସମ୍ପର୍କିତ ତାଲିକା ପ୍ରକାଶ ପାଇଛି। ୨୦୨୦ର ଶ୍ରେଷ୍ଠ ଥାନା ମଧ୍ୟରେ ମଣିପୁରର ଥୋଉବଲସ୍ଥିତ ନୋଙ୍ଗ୍ପୋକ୍ ସେକମାଇ ଥାନା ଶୀର୍ଷରେ ରହିଛି। ୧୬ ହଜାର ୬୭୧ ଥାନା ମଧ୍ୟରୁ ଶ୍ରେଷ୍ଠ ୧୦ଟି ଥାନାକୁ ବିଭିନ୍ନ ମାନକ ଆଧାରରେ ଚୟନ କରାଯାଇଛି। ତେବେ ତାଲିକାରେ ରାଜଧାନୀ ଦିଲ୍ଲୀ ଅବା ମୁମ୍ବାଇର କୌଣସି ପୋଲିସ ଥାନା ନାହିଁ। ତାଲିକାର ଦ୍ୱିତୀୟ ସ୍ଥାନରେ ତାମିଲନାଡୁର ସାଲେମର ଏଡବ୍ଲ୍ୟୁପିଏସ୍-ସୁରାମଙ୍ଗଳମ୍, ତୃତୀୟରେ ଅରୁଣାଚଳପ୍ରଦେଶର ଚଙ୍ଗଲାଙ୍ଗ୍ସ୍ଥିତ ଖରସାଙ୍ଗ୍ ଥାନା, ଚତୁର୍ଥରେ ଛତିଶଗଡ଼ ସୂରଜପୁରର ଝିଲ୍ମିଲ୍ ଥାନା ରହିଥିବାବେଳେ ପଞ୍ଚମରେ ଦକ୍ଷିଣ ଗୋଆର ସୁଙ୍ଗେମ୍ ଥାନା ରହିଛି। ସେହିପରି ଷଷ୍ଠ ସ୍ଥାନରେ ଉତ୍ତର ଏବଂ ମଧ୍ୟ ଅଣ୍ଡାମାନର କାଲିଘାଟ ଥାନା ରହିଛି। ସପ୍ତମ ସ୍ଥାନରେ ସିକିମ୍ ଇଷ୍ଟ ଜିଲାର ପାକୟୋଙ୍ଗ୍ ଥାନା, ଅଷ୍ଟମରେ ଉତ୍ତରପ୍ରଦେଶ ମୋରାଦାବାଦ୍ର କାନ୍ଥ ଥାନା, ନବମରେ ଦାଦର ଏବଂ ନାଗର ହାବେଲୀର ଖାନଭେଲ୍ ଥାନା ରହିଥିବାବେଳେ ଦଶମ ସ୍ଥାନରେ ତେଲଙ୍ଗାନାର କରିମ୍ନଗରସ୍ଥିତ ଜାମ୍ମିକୁଣ୍ଟା ଟାଉନ୍ ଥାନା ରହିଛି।
