ଟୋକିଓ,୨୩।୪(ଏପି): ଟୋକିଓ ଅଲିମ୍ପିକ୍ସ ଆୟୋଜନ ହେବାକୁ ଆଉ ୩ ମାସ ବାକି ରହିଛି। ଅଲିମ୍ପିକ୍ସ ମଶାଲ ରାଲିରେ ପ୍ରଥମ କରୋନା ପଜିଟିଭ୍ କେସ୍ ପଦାକୁ ଆସିଛି। ଗତ ସପ୍ତାହରେ ମଶାଲ ରାଲି ପାଇଁ ଦାୟିତ୍ୱରେ ରହିଥିବା ଜଣେ ପୋଲିସ କର୍ମଚାରୀ କୋଭିଡ୍-୧୯ ପଜିଟିଭ୍ ବୋଲି ଜଣାପଡିଛି। ଏ ନେଇ ଅଲିମ୍ପିକ୍ସ ଆୟୋଜକଙ୍କ ତରଫରୁ ସୂଚନା ଦିଆଯାଇଛି। ଗତ ମାର୍ଚ୍ଚ ୨୫ ତାରିଖରେ ଫୁକୁସୀମାର ଉତ୍ତରପୂର୍ବାଞ୍ଚଳରେ ରାଲି ଆରମ୍ଭ ହୋଇଥିଲା। ଏହି ୩୦ବର୍ଷୀୟ ପୋଲିସ କର୍ମଚାରୀ ଜଣକ ଏପ୍ରିଲ ୧୭ ତାରିଖରେ ଟ୍ରାଫିକ୍ ନିୟନ୍ତ୍ରଣ କରିବାର ଦାୟିତ୍ୱରେ ରହିଥିଲେ। ତେବେ ଏହାର ପରଦିନ ସେ ପଜିଟିଭ୍ ବୋଲି ଟେଷ୍ଟରୁ ଜଣାପଡିଥିଲା। ଏ ଘଟଣାକୁ ନେଇ ସ୍ଥାନୀୟ ସ୍ବାସ୍ଥ୍ୟ କର୍ତ୍ତୃପକ୍ଷ ତଦନ୍ତ ଜାରି ରଖିଛନ୍ତି। ପୋଲିସ କର୍ମଚାରୀ ଜଣକ ମାସ୍କ ପିନ୍ଧିଥିଲେ, ସାମାଜିକ ଦୂରତା ମଧ୍ୟ ରକ୍ଷା କରିଥିଲେ ବୋଲି କୁହାଯାଇଛି। ମଙ୍ଗଳବାର ସୁଦ୍ଧା ଜାପାନରେ ୫,୪୧, ୪୯୬ ଜଣ କରୋନା ଦ୍ୱାରା ସଂକ୍ରମିତ ହୋଇଛନ୍ତି ଓ ୯,୭୧୦ ଜଣ ଏହି ମହାମାରୀରେ ମୃତ୍ୟୁବରଣ କରିଛନ୍ତି। ରାଲିରେ ଅଂଶଗ୍ରହଣ କରିଥିବା ସମସ୍ତ ପାର୍ଟିସିପାଣ୍ଟ ସବୁପ୍ରକାର ନିୟମ ମାନିଥିଲେ ବୋଲି ଆୟୋଜକମାନେ କହିଛନ୍ତି। ମଶାଲ ରାଲିରେ ୧୦, ୦୦୦ ରନର ଯୋଗ ଦେଇଥିଲେ। ଆସନ୍ତା ମେ’ ୧-୨ରେ ରାଲିର ଦ୍ୱିତୀୟ ପର୍ଯ୍ୟାୟ ଦକ୍ଷିଣ ଦ୍ୱୀପ ଓକିନାଓ୍ବାରେ ଆୟୋଜନ ହେବ।
