ରାସୋଳ, ୨୦।୪(ଡି.ଏନ୍.ଏ.)-କିଏ ଭୋକିଲା ନ ରହୁ। ଦୂରେଇ ନ ଯାଉ ଶୈଶବରେ ଶିକ୍ଷାର ସ୍ବପ୍ନ। ପରିଣତ ବୟସରେ ପରିବାରରେ ଅବହେଳିତ ନ ହୁଅନ୍ତୁ ବୃଦ୍ଧାବୃଦ୍ଧ। ବୃଦ୍ଧାଶ୍ରମ ବଦଳରେ ଘରେ ମିଳୁ ସେମାନଙ୍କୁ ସେବାଯତ୍ନ। ମୌଳିକ ଅଧିକାରରୁ କେହି ବଞ୍ଚତ୍ତ ନ ହୁଅନ୍ତୁ। ପିଲାବେଳେ ଆଖିରେ ଉକୁଟୁଥିଲା ଏଭଳି ହଜାରେ ସ୍ବପ୍ନ। ହେଲେ ପେଟପାଟଣା ଚିନ୍ତାରେ ବୃତ୍ତିଗତ କ୍ଷେତ୍ରକୁ ଓହ୍ଲାଇ ପରେ ସେସବୁ ରହିଯାଇଥିଲା ବହୁ ପଛରେ। ମାଟି ମା’ଠାରୁ ଦୂରେଇ ଯିବା ପରେ ଇଚ୍ଛା ଥିଲେ ବି ସ୍ବପ୍ନକୁ ବାସ୍ତବ ରୂପ ଦେବାକୁ ମିଳୁ ନ ଥିଲା ସୁଯୋଗ। ଏବେ ବୟସ ବଢ଼ିଛି। କର୍ମକ୍ଷେତ୍ରରୁ ମିଳିଛି ବିରତି। ଅବସର ପରେ ନିଜ ଅଞ୍ଚଳ କଥା ବୁଝିବା ପାଇଁ ଏକାଠି ହୋଇଛନ୍ତି ବରିଷ୍ଠ ନାଗରିକ। ଆଗାମୀ ଦିନରେ ଏହାକୁ ଜନଆନ୍ଦୋଳନରେ ପରିଣତ କରିବା ଉଦ୍ଦେଶ୍ୟରେ ଗଠିତ ହୋଇଛି ହିନ୍ଦୋଳ ବରିଷ୍ଠ ନାଗରିକ ମଞ୍ଚ। ପ୍ରାଥମିକ ପର୍ଯ୍ୟାୟରେ ସଙ୍ଗଠନରେ ୨୦୦ରୁ ଊର୍ଦ୍ଧ୍ୱ ବ୍ୟକ୍ତି ସାମିଲ ହୋଇଥିବାବେଳେ ଆଗାମୀ ଦିନରେ ଏହାର କଳେବର ବୃଦ୍ଧି କରାଯିବ ବୋଲି ଲକ୍ଷ୍ୟ ରଖାଯାଇଛି।
ଢେଙ୍କାନାଳ ଜିଲାର ସର୍ବବୃହତ୍ତମ ବ୍ଲକ ହିନ୍ଦୋଳରେ ଅନେକ ସମସ୍ୟା। ଜନପ୍ରତିନିଧିଙ୍କ ଇଚ୍ଛା ଶକ୍ତିର ଅଭାବ, ପ୍ରଶାସନିକ ଉଦାସୀନତାରୁ ଯେତିକି ବେଗରେ ବିକାଶ କାର୍ଯ୍ୟ ତ୍ୱରାନ୍ବିତ ହେବା କଥା, ତାହା ହୋଇପାରୁନାହିଁ। ବାରମ୍ବାର ଦାବି ଆନ୍ଦୋଳନ ସତ୍ତ୍ୱେ ଉପାନ୍ତ ଅଞ୍ଚଳରେ ପହଞ୍ଚତ୍ପାରୁନି ବିକାଶ। ଶିକ୍ଷା, ସ୍ବାସ୍ଥ୍ୟ, ଗମନାଗମନକୁ ନେଇ ପୁଳାପୁଳା ସମସ୍ୟା। ତୃଣମୂଳସ୍ତରରୁ ଏହାର ସମାଧାନ କରିବା ଏବଂ ଅଞ୍ଚଳର କଳାସଂସ୍କୃତିର ସଂରକ୍ଷଣ କରିବା ଭଳି ମହତ୍ ଉଦ୍ଦେଶ୍ୟ ରଖି ଅଣ୍ଟା ଭିଡ଼ିଛନ୍ତି ବରିଷ୍ଠ ନାଗରିକ। ଏ ନେଇ ରାସୋଳ ପଞ୍ଚାୟତ ବାଙ୍କଟିଆ ଗଣେଶ୍ୱର କ୍ଲବ ପରିସରରେ ଏକ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ବ୍ଲକସ୍ତରରୁ ଆସିଥିବା ବରିଷ୍ଠ ନାଗରିକମାନେ ସୁଚିନ୍ତିତ ପ୍ରସ୍ତାବ ଦେଇଛନ୍ତି। ସମସ୍ତଙ୍କ ନିକଟରେ ସ୍ବାସ୍ଥ୍ୟସେବା ପହଞ୍ଚାଇବା, ଗଠନମୂଳକ କାର୍ଯ୍ୟରେ ପ୍ରଶାସନକୁ ବିନାସ୍ବାର୍ଥରେ ସହଯୋଗ କରିବା, ଆବଶ୍ୟକସ୍ଥଳେ ପ୍ରଶାସନିକ ଅଧିକାରୀ ଓ ଜନପ୍ରତିନିଧିଙ୍କ ମାର୍ଗଦର୍ଶନ କରାଇବା ଆଦି ବିଷୟରେ ଆଲୋଚନା କରାଯାଇଛି।
ଏହି ଅବସରରେ ଆସନ୍ତା ୨ବର୍ଷ ପାଇଁ ମଞ୍ଚର କର୍ମକର୍ତ୍ତା ଚୟନ କରାଯାଇଥିଲା। ସ୍ଥାୟୀ ସଭାପତି ପୂର୍ଣ୍ଣଚନ୍ଦ୍ର ଜେନାଙ୍କ ସଭାପତିତ୍ୱରେ ସଭାପତି ଭାବେ ଶ୍ରୀନିବାସ ମିଶ୍ର, କାର୍ଯ୍ୟକାରୀ ସଭାପତି ଲଳିତମୋହନ ଧର, ଉପସଭାପତି ଛବିରାଜ ବିଶ୍ୱାଳ, ସମ୍ପାଦକ ରସାନନ୍ଦ ବେହେରା, କୋଷାଧ୍ୟକ୍ଷ ଭାବେ ବ୍ରହ୍ମାନନ୍ଦ ପ୍ରଧାନଙ୍କୁ ଚୟନ କରାଯାଇଛି। ସେହିପରି ଜୋନାଲ ସଭାପତି ପଦବୀରେ ବ୍ରଜକିଶୋର ମହାପାତ୍ର, ବିନୟ ସାମଲ, ପ୍ରଶାନ୍ତ ପତି, ତୁଷାରକାନ୍ତି ମିଶ୍ର ସ୍ଥାନ ପାଇଛନ୍ତି। ଅବସରପ୍ରାପ୍ତ ଜିଲାଜଜ୍ ଦୁର୍ଗାଚରଣ ମିଶ୍ର, ପୂର୍ବତନ ବ୍ଲକ ଅଧ୍ୟକ୍ଷ ପୂର୍ଣ୍ଣଚନ୍ଦ୍ର ଜେନା, ଡାକ୍ତର ଚୈତନ୍ୟ ସାହୁ, ଡାକ୍ତର ସୁଧାକର ପାଳ, ପୂର୍ବତନ କଲେଜ ଅଧ୍ୟକ୍ଷ ଶଙ୍କର ବିଜୟ ପାଳ, ଦଣ୍ଡଧର ପତି, ନନ୍ଦକିଶୋର ସାହୁ ପ୍ରମୁଖଙ୍କୁ ଉପଦେଷ୍ଟା ଭାବେ ଚୟନ କରାଯାଇଛି।
ହିନ୍ଦୋଳ ମାଟିର ବିକାଶ ଲାଗି ସଂକଳ୍ପବଦ୍ଧ
ଗଠନମୂଳକ କାର୍ଯ୍ୟ କେବଳ ବନୀକରଣ କିମ୍ବା ସ୍ବଚ୍ଛ ଭାରତ ଅଭିଯାନରେ ସୀମିତ ରହିବା ଅନୁଚିତ। ଅସହାୟ ଅବହେଳିତ ଲୋକଙ୍କ ସମସ୍ୟା ବୁଝିବା, ସେମାନଙ୍କ ନିକଟରେ ସରକାରୀ ସହାୟତା ପହଞ୍ଚାଇବା, ଭାଇଚାରା ଭାବନା ସୃଷ୍ଟି କରିବା ସର୍ବୋପରି ହିନ୍ଦୋଳ ମାଟିର ଉନ୍ନତି ଲାଗି ସଂକଳ୍ପବଦ୍ଧ ହେବା ଭଳି ଏକାଧିକ ମୌଳିକ ଲକ୍ଷ୍ୟ ନେଇ ଏଭଳି ଏକ ମଞ୍ଚ ଗଠନ କରାଯାଇଛି।
-ଶ୍ରୀନିବାସ ମିଶ୍ର, ସଭାପତି
ଅବହେଳିତ ବୃଦ୍ଧାବୃଦ୍ଧଙ୍କୁ ଅଗ୍ରାଧିକାର ଦିଆଯିବ
ମଞ୍ଚରେ ବିଭିନ୍ନ ବର୍ଗର ବହୁ ବରିଷ୍ଠ ନାଗରିକ ଜଡ଼ିତ ହୋଇଛନ୍ତି। ଚାଷୀ, ଶ୍ରମଜୀବୀ, ସରକାରୀ କର୍ମଚାରୀ, ବେସରକାରୀ କର୍ମଚାରୀମାନଙ୍କୁ ଏଥିରେ ସାମିଲ କରାଯାଇଛି। ପ୍ରତି କ୍ଷେତ୍ରରୁ ବୟୋଜ୍ୟେଷ୍ଠ ବ୍ୟକ୍ତି ଥିବାରୁ ସମସ୍ୟା ସମାଧାନ କରିବା ସୁବିଧା ହେବ। ସରକାରୀ ଯୋଜନା ପ୍ରକୃତ ହିତାଧିକାରୀଙ୍କ ନିକଟରେ ପହଞ୍ଚତ୍ ପାରିବ। ବିଶେଷ କରି ଅବହେଳିତ ବୃଦ୍ଧାବୃଦ୍ଧଙ୍କୁ ଅଗ୍ରାଧିକାର ଦିଆଯିବାକୁ ଲକ୍ଷ୍ୟ ରଖାଯାଇଛି।
-ରସାନନ୍ଦ ବେହେରା, ସମ୍ପାଦକ
