ଭୁବନେଶ୍ୱର, ୧୩ା୬(ବ୍ୟୁରୋ): ଅଖିଳ ଭାରତ କଂଗ୍ରେସ କମିଟି(ଏଆଇସିସି) ଅଧ୍ୟକ୍ଷ ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କୁ ନ୍ୟାଶନାଲ ହେରାଲ୍ଡ ମାମଲାରେ ଇଡି(ଏନଫୋର୍ସମେଣ୍ଟ ଡିରେକ୍ଟୋରେଟ)ରେ ହାଜର ହେବା କଥାକୁ କଂଗ୍ରେସ ନେତା ଓ କର୍ମୀମାନେ ସହଜରେ ଗ୍ରହଣ କରିପାରୁନାହାନ୍ତି। ଏହି ଘଟଣାକୁ ନେଇ ସାରା ଦେଶରେ କଂଗ୍ରେସ ସୋମବାର ବିରୋଧ ପ୍ରଦର୍ଶନ କରିବାକୁ ଯାଉଛି। ସେହି ଅନୁଯାୟୀ ପିସିସି(ପ୍ରଦେଶ କଂଗ୍ରେସ କମିଟି) କର୍ମକର୍ତ୍ତା ମଧ୍ୟ ସଭାପତି ଶରତ ପଟ୍ଟନାୟକଙ୍କ ନେତୃତ୍ୱରେ ଆଇଆରସି ଭିଲେଜରେ ଥିବା ଇଡି କାର୍ଯ୍ୟାଳୟ ବାହାରେ ଧାରଣା ଦେବେ। ଦିନ ୧୦ରୁ ୧ ପର୍ଯ୍ୟନ୍ତ ୩ ଘଣ୍ଟା ଧରି ସତ୍ୟାଗ୍ରହ କରିବେ ବୋଲି ଦଳ ପକ୍ଷରୁ ସୂଚନା ଦିଆଯାଇଛି। ଅନ୍ୟପଟେ ଭାଜପା କିନ୍ତୁ କଂଗ୍ରେସର ଏହି ବିକ୍ଷୋଭ ପ୍ରଦର୍ଶନ ନେଇ ପାଲଟା ବର୍ଷିଛି।
ଭାଜପାର ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର ରାଜ୍ୟ କାର୍ଯ୍ୟାଳୟଠାରେ ଆୟୋଜିତ ଏକ ଖବରଦାତା ସମ୍ମିଳନୀରେ କହିଛନ୍ତି, କଂଗ୍ରେସ ହେଉଛି ଦୁର୍ନୀତି ଓ ଭ୍ରଷ୍ଟାଚାରର ଗନ୍ତାଘର। ଗାନ୍ଧୀ ପରିବାର ଭ୍ରଷ୍ଟାଚାରରେ ସମ୍ପୂର୍ଣ୍ଣ ଲିପ୍ତ ବୋଲି ସମସ୍ତଙ୍କୁ ଜଣାଅଛି। ବହୁଚର୍ଚ୍ଚିତ ନ୍ୟାଶନାଲ ହେରାଲ୍ଡ ମାମଲାରେ ଗାନ୍ଧୀ ପରିବାରର ସମ୍ପୃକ୍ତି କାରଣରୁ ବର୍ତ୍ତମାନ ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀ କୋର୍ଟଙ୍କ ନିର୍ଦ୍ଦେଶରେ ଜାମିନ ପାଇ ବାହାରେ ବୁଲୁଛନ୍ତି। ଅର୍ଥ ହେରଫେର ମାମଲାର ତଦନ୍ତ ଲାଗି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଉଭୟଙ୍କୁ ହାଜର ହେବା ପାଇଁ ନୋଟିସ୍ ଜାରି କରିଥିଲେ। ସୋନିଆ ଗାନ୍ଧୀ ହାଜର ହୋଇ ନ ଥିବାବେଳେ ରାହୁଲ ଗାନ୍ଧୀ ସୋମବାର ହାଜର ହେବାର ଅଛି। ଜାତୀୟ ସମ୍ପତ୍ତିକୁ ଚୋରି କରିଥିବା ଏବଂ ଧରାପଡ଼ିବା ଭୟରେ ଗାନ୍ଧୀ ପରିବାର ପୁଣି ଡ୍ରାମାବାଜି ଆରମ୍ଭ କରିଦେଇଥିବା ସମ୍ବିତ କହିଛନ୍ତି। ୫ ଲକ୍ଷ ଟଙ୍କାରେ ଗାନ୍ଧୀ ପରିବାର ୫ ହଜାର କୋଟି ସମ୍ପତ୍ତିର ମାଲିକ ହୋଇଗଲେ। ୟଙ୍ଗ୍ ଇଣ୍ଡିଆ ଲିମିଟେଡ କମ୍ପାନୀରେ ସୋନିଆ ଗାନ୍ଧୀଙ୍କ ୩୮ ପ୍ରତିଶତ ଓ ରାହୁଲ ଗାନ୍ଧୀଙ୍କ ୩୮ ପ୍ରତିଶତ ଶେୟାର ରହିଛି। ଏହା ବ୍ୟତୀତ ମୋତିଲାଲ ଭୋରାଙ୍କ ୧୨ ପ୍ରତିଶତ ଶେୟାର ଅଛି। ଜାତୀୟ ସମ୍ପତ୍ତିକୁ ଛଳନା କରି ହାତେଇଥିବା ଗାନ୍ଧୀ ପରିବାର ଧରା ପଡ଼ିବା ଭୟରେ ସତ୍ୟାଗ୍ରହ କରିବାର ଛଳନା ଆରମ୍ଭ କରିଦେଇଛି ବୋଲି ସମ୍ବିତ କହିଛନ୍ତି।
