ଭୁବନେଶ୍ୱର, ୧୩ା୬(ବ୍ୟୁରୋ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିଦେଶ ଗସ୍ତ କାର୍ଯ୍ୟକ୍ରମକୁ ନେଇ ବିରୋଧୀ ଏବଂ ଶାସକ ଦଳ ନେତାଙ୍କ ମଧ୍ୟରେ ସମାଲୋଚନା ଆରମ୍ଭ ହୋଇଯାଇଛି। ଟୁଇଟ୍ରେ ଏହି କଳି ଏବେ ଜୋର୍ ଧରିଛି। ମୁଖ୍ୟମନ୍ତ୍ରୀ ଆସନ୍ତା ମୌସୁମୀ ଅଧିବେଶନରେ ଭର୍ଚୁଆଲରେ ଯୋଗଦେବାର କାର୍ଯ୍ୟକ୍ରମ ଥିବା କଥା କହି ଭାଜପା ରାଜ୍ୟ ସଭାପତି ସମୀର ମହାନ୍ତି ସମାଲୋଚନା କରିଛନ୍ତି। ବିଜେଡି ମୁଖପାତ୍ର ଲେନିନ ମହାନ୍ତି ଟୁଇଟ୍ କରି ଏହାର ଜବାବ ରଖିଛନ୍ତି।
ସମୀର ଟୁଇଟ୍ କରି କହିଛନ୍ତି, ଜୁଲାଇ ୨ରୁ ବିଧାନସଭା ମୌସୁମୀ ଅଧିବେଶନ ଆରମ୍ଭ ହେବାକୁ ଯାଉଛି। ଏହି ସମୟରେ ମୁଖ୍ୟମନ୍ତ୍ରୀ ଡିଜିଟାଲ ପ୍ଲାଟଫର୍ମ ମାଧ୍ୟମରେ ଅଧିବେଶନରେ ରହିପାରନ୍ତି ବୋଲି ଏକ ଖବର ଆସିଛି। ଯଦି ଏହା ସତ୍ୟ ତେବେ ସାଙ୍ଘାତିକ। ଗଣତନ୍ତ୍ରକୁ ସମ୍ମାନ ଜଣାଇ ମୁଖ୍ୟମନ୍ତ୍ରୀ ଗୁରୁତ୍ୱପୂର୍ଣ୍ଣ ବଜେଟ ଅଧିବେଶନରେ ପ୍ରତ୍ୟକ୍ଷ ଭାବେ ଗୃହରେ ରହିବା ଆବଶ୍ୟକ ବୋଲି ସମୀର କହିଛନ୍ତି। ସମୀରଙ୍କ ଟୁଇଟ୍କୁ ରିଟୁଇଟ୍ କରି ଲେନିନ୍ କହିଛନ୍ତି, ରାଜ୍ୟ ଭାଜପା ସଭାପତି ବିନା ତଥ୍ୟ ଆଧାରରେ ଏକ ନିର୍ଦ୍ଦିଷ୍ଟ ଖବରକୁ ନେଇ ମନ୍ତବ୍ୟ ଦେବା ଦୁର୍ଭାଗ୍ୟଜନକ। ଭାଜପା ସଭାପତି ବୋଧହୁଏ ଜାଣିନାହାନ୍ତି କେନ୍ଦ୍ର ସରକାରରେ କିପରି ଅନ୍ୟ ମନ୍ତ୍ରୀମାନେ ଏବଂ ପ୍ରଧାନମନ୍ତ୍ରୀ ଦେଶର ବୃହତ ସ୍ବାର୍ଥ ଲାଗି ବାହାରକୁ ଯାଆନ୍ତି। ସେନେଇ ସମୀର ଥରେ ଅନୁଧ୍ୟାନ କରିବା ଦରକାର ବୋଲି ସେ କହିଛନ୍ତି।
