ଭୁବନେଶ୍ୱର,୧୪।୧୧(ବ୍ୟୁରୋ): ସୋମବାର ଶିଶୁ ଦିବସ। ଶିଶୁଙ୍କୁ ଉସତ୍ାହିତ କରିବା ପାଇଁ ଏହି ଦିବସଟି ପାଳନ କରାଯାଉଥିବାବେଳେ କୁନି ଝିଅ ଓସିନ୍ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି। ପାଠପଢ଼ା, ଖେଳକୁଦ ସବୁଥିରେ ସେ ଆଗୁଆ। ଭୁବନେଶ୍ୱର ନନ୍ଦନବିହାରର ୮ ବର୍ଷର ଝିଅ ଓସିନ୍ ଏକ ଘରୋଇ ବିଦ୍ୟାଳୟରେ ତୃତୀୟ ଶ୍ରେଣୀର ଛାତ୍ରୀ। ତେବେ ଏତେ କମ୍ ବୟସରୁ ସେ ଇଣ୍ଡିଆ ବୁକ୍ ଅଫ୍ ରେକର୍ଡସରେ ସ୍ଥାନ ହାସଲ କରିପାରିଛନ୍ତି। ଭୁବନେଶ୍ୱର ଲିଙ୍ଗରାଜ ମନ୍ଦିର ପରିସରରୁ ବାହାରି ସାଇକେଲରେ ପ୍ରାୟ ୫ଘଣ୍ଟାରେ ସେ କୋଣାର୍କ ସୂର୍ଯ୍ୟ ମନ୍ଦିରରେ ପହଞ୍ଚତ୍ପାରି ଏହି ରେକର୍ଡ ସୃଷ୍ଟି କରିଛନ୍ତି। ମାତ୍ର ୩ବର୍ଷ ବୟସରୁ ସେ ବାପା ଗୋପାଳକୃଷ୍ଣ ସାହୁଙ୍କ ସହ ମିଶି ସାଇକେଲ ଚଳାଇବା ଆରମ୍ଭ କରିଥିଲେ। ତେବେ ଏହା ପରଠାରୁ ଗୋଟିଏ ପରେ ଗୋଟିଏ ସଫଳତା ହାସଲ କରିଚାଲିଛନ୍ତି ଓସିନ୍। ସେହିପରି ୪ବର୍ଷ ବୟସରେ ଟାଟା ମାରାଥନରେ ଅଂଶଗ୍ରହଣ କରି ପ୍ରାୟ ୧୦ କି.ମି. ଦୌଡ଼ି ଅତିକ୍ରମ କରିପାରିଥିଲେ। କେବଳ ସେତିକି ନୁହେଁ, ମାତ୍ର ୫ ବର୍ଷ ବୟସରେ ସେ କପିଳାସ ପର୍ବତରେ ୧୦ କିଲୋମିଟର ଉଚ୍ଚତା ପର୍ଯ୍ୟନ୍ତ ମାତ୍ର ୨୬ ମିନିଟରେ ଟ୍ରେକିଂ କରିପାରିଥିଲେ। ସେହିପରି କେଷ୍ଟ୍ରୋଲ ଟ୍ରେକିଂରେ ଅଂଶଗ୍ରହଣ କରି ସେ ୩୨ କିଲୋମିଟର ଅତିକ୍ରମ କରିପାରିଛନ୍ତି। ଟ୍ରାଇଥ୍ଲନରେ ଅଲିମ୍ପିକ୍ ପଦକ ଜିତିବା ପାଇଁ ଆଶା ରଖିଥିବା ଓସିନ୍ ଏବେ ଠାରୁ ଅଭ୍ୟାସ ଆରମ୍ଭ କରିଦେଇଛନ୍ତି। ନିଜ ସ୍ବପ୍ନକୁ ସାକାର କରିବା ପାଇଁ ସୁଇମିଂ, ସାଇକେଲିଂ ଏବଂ ରନିଂ ଅଭ୍ୟାସରେ ଲାଗିପଡ଼ିଛନ୍ତି ଓସିନ୍।
ତେବେ ଓସିନ କେବଳ ଯେ ଖେଳକୁଦରେ ଆଗ୍ରହୀ ତାହା ନୁହେଁ, ବିଭିନ୍ନ ଧାର୍ମିକ ପୁସ୍ତକ ଅଧ୍ୟୟନ କରିବାରେ ମଧ୍ୟ ରୁଚି ରଖିଛନ୍ତି। ସେ ମାତ୍ର ୮ ବର୍ଷ ବୟସରେ ସମ୍ପୂର୍ଣ୍ଣ ରାମାୟଣ କଥାବସ୍ତୁକୁ ଇଂରାଜୀ ଭାଷାରେ ନିଜ ଶୈଳୀରେ ଲେଖିପାରିଛନ୍ତି। ଏତେ କମ୍ ବୟସରେ ରାମାୟଣ ପୁସ୍ତକ ରଚନା କରିପାରିଥିବାରୁ ତାଙ୍କୁ ବିଭିନ୍ନ ମହଲରୁ ପ୍ରଶଂସା କରାଯାଉଛି। ତାଙ୍କର ଈଶ୍ୱରଙ୍କ ପ୍ରତି ଭକ୍ତିଭାବ ଏତେ ଯେ, ମହାପ୍ରଭୁ ଜଗନ୍ନାଥଙ୍କ ପ୍ରଚାର ପ୍ରସାର ପଦଯାତ୍ରାରେ ସାମିଲ ହୋଇ ଦୀର୍ଘ ବାଟ ଯାଇଥିଲେ। ଏହାବ୍ୟତୀତ ଚିତ୍ର ଆଙ୍କିବା, ଓ୍ବେବ ଡିଜାଇନିଂ କରିବାଠାରୁ ଆରମ୍ଭକରି ବିଭିନ୍ନ ବିଷୟବସ୍ତୁ ଉପରେ ତଥ୍ୟ ସଂଗ୍ରହ କରିବା ତାଙ୍କର ରୁଚି ରହିଛି। ପିତାଙ୍କଠାରୁ କ୍ରୀଡ଼ା କ୍ଷେତ୍ର ପ୍ରତି ଅନୁପ୍ରାଣିତ ହୋଇଥିବାବେଳେ ମା’ ଶର୍ମିଷ୍ଠା ପଟ୍ଟନାୟକଙ୍କଠାରୁ ବିଭିନ୍ନ ନୈତିକ ଶିକ୍ଷା ଲାଭ କରିଥିବା ଓସିନ୍ କହନ୍ତି।
ତେବେ ଅନେକ ସମୟରେ ବିଭିନ୍ନ ସାମାଜିକ ବାର୍ତ୍ତା ନେଇ ସେ ସାଇକେଲ ଯାତ୍ରା କରିଥାନ୍ତି। ବହୁ ଚର୍ଚ୍ଚିତ କୁନିଝିଅ ‘ପରୀ’ ଅପହରଣ ଓ ହତ୍ୟା ଘଟଣାରେ ନ୍ୟାୟ ପାଇଁ ସାଇକେଲରେ ଯାତ୍ରା କରି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ପତ୍ର ଦେଇଥିଲେ। ସେତେବେଳେ ଏହି ଘଟଣା ଚର୍ଚ୍ଚାର ବିଷୟ ପାଲଟିଛି। ଝିଅମାନଙ୍କ ସୁରକ୍ଷା ପାଇଁ ସେ ସମାଜକୁ ବାର୍ତ୍ତା ଦେଇଥା’ନ୍ତି। ସେହିପରି ପ୍ରାକୃତିକ ବିପର୍ଯ୍ୟୟ ସମୟରେ ମଧ୍ୟ ଲୋକଙ୍କୁ ସହାୟତା କରି ସେ ତାଙ୍କର ଉଦାର ମନୋଭାବର ପରିଚୟ ଦେଇଥାନ୍ତି।
