କୋକସରା,୧୬ା୪(ଡି.ଏନ୍.ଏ.): ଗାଁକୁ ନିଶାମୁକ୍ତ କରିବା ପାଇଁ ଅଣ୍ଟା ଭିଡ଼ିଛନ୍ତି ସ୍ବୟଂ ସହାୟିକା ଗୋଷ୍ଠୀର ମହିଳା। କଳାହାଣ୍ଡି ଜିଲା କୋକସରା ବ୍ଲକ ମୂଷାପାଲି ପଞ୍ଚାୟତ ଖପରାମାଲ ଗ୍ରାମରେ ଥିବା ମା’ ମାଉଳି ମହିଳା ସ୍ବୟଂ ସହାୟକ ଗୋଷ୍ଠୀର ମହିଳାମାନେ ଗାଁରେ ମଦ ବନ୍ଦ କରିବାକୁ ଏକାଠି ହୋଇଛନ୍ତି। ସଦସ୍ୟାମାନେ ସ୍ଥାନୀୟ ମୂଷାପାଲି ସରପଞ୍ଚ ଅକ୍ଷୟ ନାଏକଙ୍କୁ ଭେଟିବା ସହ ବେହେରା ମଦଭାଟିକୁ ଯାଇ କର୍ମଚାରୀଙ୍କୁ ଗାଁରେ ଥିବା କୁଚିଆ ମଦ ବେପାରୀଙ୍କୁ ମଦ ଦେବାକୁ ମନା କରିଛନ୍ତି।
ମହିଳାଙ୍କ ଅଭିଯୋଗ ଅନୁଯାୟୀ, ପୁରୁଷମାନେ ଦୈନିକ ଯାହା ରୋଜଗାର କରୁଛନ୍ତି ତାହାର ଅଧା ଟଙ୍କା ମଦ ଭାଟିରେ ଖର୍ଚ୍ଚ କରୁଛନ୍ତି। ଫଳରେ ଘରର ଆର୍ଥିକ ଅବସ୍ଥାରେ ପ୍ରଭାବ ପଡ଼ିବା ସହ ଅଶାନ୍ତି ବୃଦ୍ଧି ପାଉଛି। କୌଣସି ପର୍ବ ପର୍ବାଣୀ କିମ୍ବା ଯାନିଯାତ୍ରାରେ ମଦ ପିଇ ଯୁବକମାନେ ଗାଁରେ ବିଶୃଙ୍ଖଳା କରିବା ସହ ଝିଅବୋହୂଙ୍କୁ ମଧ୍ୟ ଟାହିଟାପରା କରୁଛନ୍ତି। ଏମିତିକି ଗାଁର ଛୋଟ ଛୋଟ ନାବାଳକ ମଧ୍ୟ ଧୀରେ ଧୀରେ ଯୁବକଙ୍କୁ ଦେଖି ମଦ ପିଇବା ଆରମ୍ଭ କଲେଣି। ଏସବୁ ଦୃଷ୍ଟିରୁ ଗାଁକୁ ମଦମୁକ୍ତ କରିବାକୁ ଗାଁର ମା’ ମାଉଳି ମହିଳା ସ୍ବୟଂ ସହାୟକ ଗୋଷ୍ଠୀର ସଦସ୍ୟାମାନେ ଅଣ୍ଟା ଭିଡ଼ିଛନ୍ତି। ଯଦି ଆଗାମୀ ଦିନରେ ସରପଞ୍ଚ କିମ୍ବା ପ୍ରଶାସନ କୌଣସି ପଦକ୍ଷେପ ନ ନିଅନ୍ତି ତେବେ ଆନ୍ଦୋଳନ ବ୍ୟାପକ କରାଯିବ ବୋଲି ଚେତାବନୀ ଦେଇଛନ୍ତି ଗୋଷ୍ଠୀର ସଭାପତି କ୍ଷୀରାବ୍ଦୀ ରାଉତ, ଉପସଭାନେତ୍ରୀ ଉମା ନାଏକ, ସମ୍ପାଦକ ମଥୁରା ରାଉତ, ସୁମନ କନ୍ଦ ପାନ, ଗ୍ରୁପ ଲିଡର କୁନି ଚଳାନ, ସମ୍ପାଦକ କୁମାରୀ ଚନ୍ଦନ,ଅମ୍ବିକା ବାଗ, ଲଳିତା ଶଗଡ଼ିଆ ପ୍ରମୁଖ। ଏ ସମ୍ପର୍କରେ ସରପଞ୍ଚ ଅକ୍ଷୟ ନାଏକଙ୍କୁ ପଚାରିବାରୁ ଗାଁକୁ ମଦ ମୁକ୍ତ କରିବା ସପକ୍ଷରେ ମହିଳାଙ୍କ ସହ ପଞ୍ଚାୟତ ମଧ୍ୟ ରହିଛି। ମୋ’ ଦ୍ୱାରା ଯାହା ସମ୍ଭବ ମୁଁ ସେମିତି ସହଯୋଗ କରିବାକୁ ପ୍ରସ୍ତୁତ ବୋଲି ସେ କହିଛନ୍ତି।
