ନୂଆପଡ଼ା,୫ା୮ (ମକାରୁ ବେମାଲ): ନୂଆପଡ଼ା ଜିଲା କୋମନା ବ୍ଲକ ଅନ୍ତର୍ଗତ ସୁନାବେଡ଼ା ଅଭୟାରଣ୍ୟରେ କଲରାପତରିଆ ବାଘ ଆତଙ୍କ ଦେଖାଦେଇଛି। ବାଘ ରାସ୍ତାରେ ବୁଲୁଥିବା ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଅଭୟାରଣ୍ୟବାସୀ ଆତଙ୍କିତ ହୋଇପଡିଛନ୍ତି। ସୂଚନା ଅନୁଯାୟୀ, ସୁନାବେଡ଼ା ପଞ୍ଚାୟତ ସାଲେପଡ଼ା ଗଁାର ଗାଓସିଂ ମାଝି ସୋମବାର ଅପରାହ୍ନରେ କୌଣସି କାମରେ କୋମନା ଅଞ୍ଚଳକୁ ଯାଇଥିଲେ। ସେଠାରେ କାମ ସାରି ରାତି ପ୍ରାୟ ୯ଟାରେ ଏକ ଚାରିଚକିଆ ଗାଡିରେ ଅନ୍ୟମାନଙ୍କ ସହ ଘରକୁ ଫେରୁଥିଲେ ା ସେହି ସମୟରେ ଜାମଗଁା ଘାଟି ମଥାନଠାରେ ୨ଟି କଲରାପତରିଆ ବାଘ ବସିଥିବା ଦେଖିବାକୁ ପାଇଥିଲେ। ଗାଡି ଲାଇଟ ପଡିବାରୁ ଗୋଟିଏ ବାଘ ଜଙ୍ଗଲକୁ ଚାଲିଯାଇଥିବା ବେଳେ ଅନ୍ୟ ଏକ ବାଘକୁ ମୋବାଇଲ ଭିଡିଓରେ କଏଦ କରିଥିଲେ। ଗାଡି ପାଖକୁ ଆସିବା ପରେ ବାଘଟି ରାସ୍ତା ପାରି ହୋଇ ଜଙ୍ଗଲ ଭିତରକୁ ଚାଲିଯାଇଥିଲା। ସୁନାବେଡା ଅଭୟାରଣ୍ୟ ଜାମଗଁା ଘାଟିରେ ବାଘ ବୁଲୁଥିବା ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଅଭୟାରଣ୍ୟ ଅଞ୍ଚଳରେ ଭୟର ବାତାବରଣ ଖେଳିଯାଇଛି। ଲୋକେ ନିଜ ଜମିବାଡି କିମ୍ବା ଜଙ୍ଗଲକୁ ଯିବା ପାଇଁ ଭୟ କରୁଛନ୍ତି।