ମୋହନା,୨୨ା୭( ମନ୍ମଥ ମିଶ୍ର ): ଗଜପତି ଜିଲା ଚନ୍ଦ୍ରଗିରିରେ ବସବାସ କରୁଥିବା ତିବତୀୟ ଶରଣାର୍ଥୀମାନେ ଚାଇନାର କଥିତ ଦମନ ନୀତିକୁ ବିରୋଧ କରି ଶାନ୍ତିପୂର୍ଣ୍ଣ ଭାବେ ଶୋଭାଯାତ୍ରା କରିଛନ୍ତି। ଗତ ଜୁଲାଇ ୨ ତାରିଖରେ ଜାତିସଂଘ ମୁଖ୍ୟାଳୟ ସମ୍ମୁଖରେ ଆତ୍ମହତ୍ୟା କରିଥିବା ତିବତୀୟ ଯୁବକ ଲୋବଗା ରଙ୍ଗଜେନଙ୍କୁ ଶ୍ରଦ୍ଧାଞ୍ଜଳି ଜଣାଇବା ସହ ବନ୍ଦୀ ତିବତୀୟମାନଙ୍କୁ ମୁକ୍ତ କରିବା ପାଇଁ ଦାବି କରିଛନ୍ତି। ଚନ୍ଦ୍ରଗିରି ତିବତୀୟ ସେଟଲମେଣ୍ଟ କାର୍ଯ୍ୟାଳୟ ପରିସରରୁ ବୁଧବାର ଦିନ ଶତାଧିକ ୟୁଥ୍ କଂଗ୍ରେସର ତିବତୀୟ ମହିଳା ଓ ପୁରୁଷ ଏକାଠି ହୋଇ ଶାନ୍ତିପୂର୍ଣ୍ଣ ଭାବେ ଚନ୍ଦ୍ରଗିରି ମୁଖ୍ୟ ବଜାର ପର୍ଯ୍ୟନ୍ତ ଶୋଭାଯାତ୍ରା ବାହାର କରି ପ୍ରତିବାଦ କରିଥଲେ।
ପ୍ରତିବାଦକାରୀମାନେ ଚାଇନାର କଥିତ ଦମନ ନୀତି ବିରୋଧରେ ସ୍ଲୋଗାନ ଦେଇ ତିବତର ମାନବାଧିକାର ସୁରକ୍ଷା ପାଇଁ ଦାବି ଉଠାଇଥିଲେ । ପ୍ରତିବାଦକାରୀମାନଙ୍କ କହିବା ଅନୁଯାୟୀ, ଚାଇନାର ହିରାସତରେ ଥିବା ୧୧ତମ ପାଞ୍ଚେନ୍ ଲାମାଙ୍କ ସହ ପରିବେଶକର୍ମୀ, ତିବତୀୟ କଳାକାର, ମାନବାଧିକାର ରକ୍ଷକ ଓ ଅନ୍ୟ ତିବତୀୟ ବନ୍ଦୀମାନଙ୍କୁ ବିନା ସର୍ତ୍ତରେ ମୁକ୍ତ କରାଯାଉ। ସେମାନେ ଚାଇନାର କଥିତ ଏକତା ସାମାଜିକ ସ୍ଥିରତା ଓ ଜାତୀୟ ଏକୀକରଣକୁ ପ୍ରତ୍ୟାହାର କରିବାକୁ ମଧ୍ୟ ଦାବି କରିଥିଲେ। ଏହା ସହ ଭାରତ ସରକାର ତିବତୀୟ ସମୁଦାୟକୁ ନୈତିକ ସମର୍ଥନ ଜାରି ରଖିବାକୁ ନିବେଦନ କରିଥିଲେ । ଲୋବଗା ରଙ୍ଗଜେନଙ୍କୁ ଶ୍ରଦ୍ଧାଞ୍ଜଳି ଜଣାଇବା ସହ ବନ୍ଦୀ ତିବତୀୟମାନଙ୍କ ମୁକ୍ତି ଓ ମାନବାଧିକାର ସୁରକ୍ଷା ପାଇଁ ସେମାନେ ଆନ୍ତର୍ଜାତିକ ସ୍ତରରେ ହସ୍ତକ୍ଷେପ କରିବା ପାଇଁ ଦାବି କରିଛନ୍ତି।