ରାୟଗଡ଼ା/ବିଷମ କଟକ, ୬।୭ (କୈଳାସ ଚନ୍ଦ୍ର ପୃଷ୍ଟି/ ପ୍ରସନ୍ନ କୁମାର ପଣ୍ଡା): ରାୟଗଡ଼ା ଜିଲା କଲ୍ୟାଣସିଂହପୁରରେ ଘଟିଥିବା ବହୁଚର୍ଚ୍ଚିତ ଭିଡ଼ ହିଂସା ମାମଲାରେ ସୋମବାର ବିଷମକଟକ ଉପକାରାଗାରରେ ୨୪ଅଭିଯୁକ୍ତଙ୍କ ଟେଷ୍ଟ ଆଇଡେଣ୍ଟିଫିକେଶନ (ଟିଆଇ) ପରେଡ୍ କରାଯାଇଛି। ୧ମ ଶ୍ରେଣୀ ବିଚାରବିଭାଗୀୟ ମାଜିଷ୍ଟ୍ରେଟ୍ ପୂଜା ଜୈନଙ୍କ ଉପସ୍ଥିତିରେ ପୀଡ଼ିତା ଅଭିଯୁକ୍ତମାନଙ୍କୁ ଚିହ୍ନଟ କରିଥିବା ସୂଚନା ମିଳିଛି।
ଟିଆଇ ପରେଡ୍ ସମୟରେ ପୀଡ଼ିତା ଘଟଣା ସମ୍ପର୍କରେ ବୟାନଦେବା ସହ କେଉଁ ପରିସ୍ଥିତିରେ ଆକ୍ରମଣ ହୋଇଥିଲା, ସେ ନେଇ ମାଜିଷ୍ଟ୍ରେଟ୍ଙ୍କ ସମ୍ମୁଖରେ ବିସ୍ତୃତ ବିବରଣୀ ଦେଇଥିଲେ। ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିବା ବେଳେ ବିଷମକଟକ ଏସ୍ଡିପିଓ ସନ୍ତୋଷିନୀ ଓରାମ ଓ ସ୍ଥାନୀୟ ପୋଲିସ ଅଧିକାରୀମାନେ ଉପସ୍ଥିତ ଥିଲେ।
ପୀଡ଼ିତାଙ୍କ ଗୋପନୀୟତା ରକ୍ଷା ପାଇଁ ଗଣମାଧ୍ୟମକୁ କାରାଗାର ପରିସରଠାରୁ ଦୂରରେ ରହିବାକୁ ପୋଲିସ ଅନୁରୋଧ କରିଥିଲା। ଏସ୍ପି ରାଜ ପ୍ରସାଦ ଗଣମାଧ୍ୟମକୁ ସୂଚନା ଦେଇ କହିଛନ୍ତି, ଏହି ଭିଡ଼ ହିଂସା ଘଟଣାରେ ପର୍ଯ୍ୟାୟକ୍ରମେ ୨୪ ଜଣଙ୍କୁ ଗିରଫ କରାଯାଇଛି। ପ୍ରଥମେ ସେମାନଙ୍କୁ ରାୟଗଡ଼ା ଉପକାରାଗାରରେ ରଖାଯାଇଥିଲା। ପରେ ଟିଆଇ ପରେଡ୍ ସୁବିଧା ପାଇଁ ସେମାନଙ୍କୁ ବିଷମକଟକ ଉପକାରାଗାରକୁ ସ୍ଥାନାନ୍ତର କରାଯାଇଥିଲା।ଟିଆଇ ପରେଡ୍ ପରେ କଲ୍ୟାଣସିଂହପୁର ଥାନାରୁ ଷ୍ଟେଟ୍ ବ୍ୟାଙ୍କ ଛକ ପର୍ଯ୍ୟନ୍ତ ପୋଲିସ ଫ୍ଲାଗ୍ ମାର୍ଚ୍ଚ କରାଯାଇଥିଲା।
ସୂଚନାଯୋଗ୍ୟ, ଗତ ଜୁନ୍ ୧୬ରେ ପିଲାଚୋର ଗୁଜବକୁ କେନ୍ଦ୍ରକରି ପ୍ରାୟ ୫୦୦ରୁ ଅଧିକ ଲୋକ ବାହାର ରାଜ୍ୟର ଜଣେ ସ୍ବେଚ୍ଛାସେବୀ ଯୁବକ ଓ ଯୁବତୀଙ୍କୁ ଆକ୍ରମଣ କରିଥିଲେ। ଯୁବତୀଙ୍କ ସହ ଅସଦାଚରଣ ହୋଇଥିବା ମଧ୍ୟ ଅଭିଯୋଗ ହୋଇଥିଲା। ଘଟଣାଟି ଜାତୀୟ ସ୍ତରରେ ଚର୍ଚ୍ଚାର ବିଷୟ ପାଲଟିଥିଲା। ଫଳରେ ଓଡ଼ିଶା ପୋଲିସର ଡିଜିପି ଏହାକୁ ‘ରେଡ୍ ଫ୍ଲାଗ୍ କେସ୍’ ଭାବେ ଘୋଷଣାକରି କ୍ରାଇମବ୍ରାଞ୍ଚ ସହଯୋଗରେ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ।