ଦିଗପହଣ୍ଡି,୫।୪(ଅଶେଷ ନାଥ ମିଶ୍ର) ଦିଗପହଣ୍ଡି ସହର ସମେତ ଆଖପାଖ ଅଞ୍ଚଳରେ ରବିବାର କାଳ ବୈଶାଖୀ ପ୍ରଭାବରେ ଝଡ଼ତୋଫାନ ବଜ୍ରପାତ ସାଙ୍ଗକୁ କୁଆପଥର ବର୍ଷା ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଥିଲା। ବଜ୍ରପାତରେ ଦିଗପହଣ୍ଡି ବ୍ଳକ ଚୌଧୁରୀ ଟିକରପଡା ପଞ୍ଚାୟତ ବଜ୍ରଗୁମ୍ମା ଗ୍ରାମର ଭାଗିରଥି ଗୌଡ଼ଙ୍କ ୨ଟି ମଇଁଷି ମୃତ୍ୟୁବରଣ କରିଥିବା ଜଣାପଡିଛି । ଭାଗିରଥି ମଇଁଷିଙ୍କୁ ଚରାଇବାକୁ ଗାଁ ନିକଟସ୍ଥ ବାହୁଦା ନଦୀତଟକୁ ନେଇଥିଲେ । ସେତିକିବେଳେ ବର୍ଷା ସାଙ୍ଗକୁ ବଜ୍ରପାତ ହୋଇଥିଲା।
ବଜ୍ରପାତରେ ୨ଟି ମଇଁଷି ଟଳି ପଡ଼ିଥିଲେ। ଖବରପାଇ ଭ୍ରମରପୁର ଲାଇଭଷ୍ଟକ ଇନ୍ସପେକ୍ଟର ବାଳକୃଷ୍ଣ ପ୍ରଧାନ ଓ ଅନ୍ୟ କର୍ମଚାରୀ ଘଟଣାସ୍ଥଳରେ ପହଞ୍ଚି ତଦନ୍ତ କରି ଫେରିଥିବା ବେଳେ ସୋମବାର ମୃତ ମଇଁଷି ଦ୍ୱୟର ବ୍ୟବଚ୍ଛେଦ କରାଯିବ ବୋଲି ଜଣାପଡିଛି।
ଭାଗିରଥି ଜଣେ ଗରିବ ଶ୍ରେଣୀର ହୋଇଥିବାରୁ ଗ୍ରାମର ସାମାଜିକ କର୍ମୀ ସୁଶାନ୍ତ କୁମାର ଷଡଙ୍ଗୀ ଏବଂ ଗ୍ରାମବାସୀ ସରକାରୀ ସହାୟତା ଯୋଗାଇ ଦେବାପାଇଁ ଦିଗପହଣ୍ଡି ତହସିଲଦାର ସନ୍ତୋଷ କୁମାର ସାହୁଙ୍କ ଦୃଷ୍ଟି ଆକର୍ଷଣ କରିଛନ୍ତି। ଦିଗପହଣ୍ଡି ଓ ସାନଖେମୁଣ୍ଡି ବ୍ଲକ ଅଧୀନ ବିଭିନ୍ନ ଗ୍ରାମରେ ଭୀଷଣ ପବନ ସାଙ୍ଗକୁ କାଳବୈଶାଖୀର ତାଣ୍ଡବ ଯୋଗୁ ଚାଳ ଓ ଟିଣ ଘର ଉଡ଼ିଯାଇଛି। ଏପରିକି ରାସ୍ତା କଡରେ ଥିବା ଗଛ ଉପୁଡ଼ି ପଡ଼ିବା ସହ ଗଛ ଡାଳ ଭାଙ୍ଗି ପଡ଼ିବାରୁ ରାସ୍ତା ଅବରୋଧ ହୋଇଥିଲା।
ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ମେଶିିନ ସାହାଯ୍ୟରେ ଗଛ କାଟି ରାସ୍ତା ସଫା କରିବା ପରେ ଯାତାୟାତ ସ୍ବାଭାବିକ ହୋଇଥିଲା।
ଏପରିକି କୁଆପଥର ମାଡରେ ପନିପରିବା ଚାଷ ପ୍ରଭାବିତ ହୋଇଥିବା ବେଳେ ଆମ୍ବ ଝଡି ପଡ଼ିଥିବା ଜଣାପଡିଛି। ସୂଚନା ଯୋଗ୍ୟ, ଗତ ମାର୍ଚ୍ଚ ୨୬ ତାରିଖରେ ଭ୍ରମରପୁର ନିକଟ ଚୈତନ୍ୟପୁର ଚାଷ ଜମିରେ ବଜ୍ରପାତ ହେବାରୁ ଭ୍ରମରପୁର ଗ୍ରାମର ସନିଆ ସାହୁଙ୍କ ଗୋଟିଏ ବଳଦ ଏବଂ ଏକ ଷଣ୍ଢର ମୃତ୍ୟୁ ଘଟିଥିଲା।
