ଦିଗପହଣ୍ଡି,୧୨।୫(ଡି.ଏନ.ଏ.): ଦିଗପହଣ୍ଡି ବ୍ଲକ ଚଷାନିମଖଣ୍ଡି ପଞ୍ଚାୟତ ଅନ୍ତର୍ଗତ ପାଳଝାଡି ଗ୍ରାମର ଦୁଇ ବିଜେଡି ନେତା ସୁଦର୍ଶନ ସୁଆର ଏବଂ ସୁଧୀର ଚନ୍ଦ୍ର ପାତ୍ରଙ୍କ ହତ୍ୟା ଘଟଣାରେ ପୋଲିସ ଅଧିକ ତଥ୍ୟ ଆଦାୟ ପାଇଁ ଉଦ୍ୟମ ଆରମ୍ଭ କରିଛି। ଗତ ପଞ୍ଚାୟତ ନିର୍ବାଚନ ପରେ ରାଜନୈତିକ ଶତ୍ରୁତାକୁ କେନ୍ଦ୍ର କରି ସୁପାରୀ କିଲରମାନଙ୍କ ମାଧ୍ୟମରେ ଦୁଇ ନେତାଙ୍କୁ ହତ୍ୟା କରାଯାଇଥିବା ନେଇ ପୋଲିସର ପ୍ରାଥମିକ ତଦନ୍ତରୁ ଜଣାପଡିଥିଲା। ଏହି ଘଟଣାରେ ସମ୍ପୃକ୍ତ ଥିବା ୯ ଜଣ ଅଭିଯୁକ୍ତଙ୍କୁ ଗିରଫ କରାଯାଇ ଜେଲକୁ ପଠାଇ ଦିଆଯାଇଥିଲା। ସେମାନେ ହେଲେ କୁକୁଡାଖଣ୍ଡିର ବୁଡୁ ଦାସ, ଲାଠି ଗ୍ରାମର କୁନା ଗୌଡ଼, ଜଗନ୍ନାଥପୁର ଗ୍ରାମର ବି. ଦେବରାଜ ରେଡି, ପାଳଝାଡି ଗ୍ରାମର କୃଷ୍ଣଚନ୍ଦ୍ର ଗୌଡ, ବସନ୍ତ କୁମାର ଗୌଡ, ଗଡ ସାମନ୍ତରାପୁର ଗ୍ରାମର ସିଦ୍ଧାନ୍ତ ଗୌଡ ଏବଂ ଆଦିକନ୍ଦପୁର ଗ୍ରାମର ସନ୍ତୋଷ କୁମାର ପ୍ରଧାନ। ଦିଗପହଣ୍ଡି ଥାନା ମାମଲା ନଂ. ୧୪୫/୨୨ ପ୍ରକାରେ ସମସ୍ତ ଅଭିଯୁକ୍ତ ଦିଗପହଣ୍ଡି ସବ ଜେଲରେ ରହିଛନ୍ତି। ହତ୍ୟା ମାମଲାର ତଦନ୍ତ ସମୟରେ ମୁଖ୍ୟ ଅଭିଯୁକ୍ତ ପ୍ରଶାନ୍ତ କୁମାର ଗୌଡ଼ର ଗଞ୍ଜେଇ କାରବାର ସହ ସମ୍ପୃକ୍ତ ଥିବା ଏବଂ ତାକୁ ଗିରଫ ସମୟରେ ଗଞ୍ଜେଇ ଜବତ ହୋଇଥିବାରୁ ପ୍ରଶାନ୍ତ ଓ ତାଙ୍କ ଅନ୍ୟ ସହଯୋଗୀ ସୁମନ୍ତ କୁମାର ନାହାକଙ୍କୁ ଅନ୍ୟ ଏକ ମାମଲା ନଂ. ୧୪୭/୨୨ରେ ବ୍ରହ୍ମପୁର ଜେଲକୁ ପଠାଯାଇଥିଲା। ଏହି ସମ୍ବେଦନଶୀଳ ଘଟଣାରେ ଅଧିକ ତଥ୍ୟ ହାସଲ କରିବା ଲକ୍ଷ୍ୟରେ ବର୍ତ୍ତମାନ ପୋଲିସ ତାର ତଦନ୍ତ ପ୍ରକ୍ରିୟାକୁ ବ୍ୟାପକ କରି ମୁଖ୍ୟ ଅଭିଯୁକ୍ତ ପ୍ରଶାନ୍ତଙ୍କ ସହ ସିଧାସଳଖ ହତ୍ୟାକାଣ୍ଡରେ ସମ୍ପୃକ୍ତ କୁନା ଗୌଡ଼, ବୁଡୁ ଦାସ ଓ ଦେବରାଜଙ୍କ ମଧ୍ୟରେ ମୁହାଁମୁହିଁ ଜେରା କରିବା ଚାହୁଁଥିବା ଜଣାପଡିଛି। ସେଥିପାଇଁ ଦିଗପହଣ୍ଡି ମାଜିଷ୍ଟ୍ରେଟଙ୍କ ଅନୁମତି କ୍ରମେ ଦିଗପହଣ୍ଡି ପୋଲିସ ଅଭିଯୁକ୍ତ କୁନା, ବୁଡୁ ଓ ଦେବରାଜଙ୍କୁ ବୁଧବାରଠାରୁ ୩ ଦିନିଆ ରିମାଣ୍ଡରେ ନେଇଛି। ସେହିଭଳି ବ୍ରହ୍ମପୁର ଜେଲରୁ ପ୍ରଶାନ୍ତ ଓ ସୁମନ୍ତଙ୍କୁ ୫ ଦିନିଆ ରିମାଣ୍ଡରେ ଆଣିବାକୁ ସ୍ବତନ୍ତ୍ର ଜିଲା ଜଜ୍ଙ୍କ ନିକଟରେ ଆବେଦନ ମଧ୍ୟ କରାଯାଇଛି। ଗୁରୁବାର ରିମାଣ୍ଡ ଅନୁମତି ମିଳିବା ପରେ ହତ୍ୟା ଘଟଣାରେ ପୋଲିସ ଅନେକ ରହସ୍ୟର ଉନ୍ମୋଚନ କରିପାରେ ବୋଲି ନଜର ରହିଛି।
