ବ୍ରହ୍ମପୁର ଅଫିସ,୧୮ା୧୧: ବ୍ରହ୍ମପୁରର ୩ ସମବାୟ ସଂସ୍ଥା ବିସିସି ବ୍ୟାଙ୍କ, ଗଞ୍ଜାମ ଜିଲା ସମବାୟ ସଂଘ ଓ ଆଞ୍ଚଳିକ ବାଣିଜ୍ୟ ସମବାୟ ସମିତି (ବିଆରଏମ୍ସିଏସ୍)ସଭାପତି ନିର୍ବାଚନ ସରିଛି। ଏହି ୩ କେନ୍ଦ୍ରୀୟ ସମବାୟ ଅନୁଷ୍ଠାନ ଉପସଭାପତି ନିର୍ବାଚନପାଇଁ ପୁଣି ସମବାୟ ରାଜନୀତି ଚଳଚଞ୍ଚଳ ହୋଇଯାଇଛି। ଉପରୋକ୍ତ ସଂସ୍ଥାଗୁଡ଼ିକରେ ପୁରୁଷମାନେ ସଭାପତି ନିର୍ବାଚିତ ହୋଇଥିବାରୁ ନିୟମ ପ୍ରକାରେ ମହିଳା ହେବେ ଉପସଭାନେତ୍ରୀ। ପ୍ରଥମେ ସମବାୟ ସଂଘ ଉପସଭାପତି ନିର୍ବାଚନ ନିମନ୍ତେ ରିଟର୍ନିଂ ଅଫିସରଙ୍କ ପକ୍ଷରୁ ପ୍ରକାଶିତ ବିଜ୍ଞପ୍ତି ଅନୁସାରେ, ଆସନ୍ତା ୨୮ରେ ନାମାନଙ୍କନ ଦାଖଲ କରାଯିବ। ଆବଶ୍ୟକସ୍ଥଳେ ପରିଦିନ ଭୋଟ ଗ୍ରହଣ ହେବ।
ଅବିଭକ୍ତ ଗଞ୍ଜାମ ଜିଲା ସମବାୟ ସଂଘର ୧୫ ଜୋନ୍ ମଧ୍ୟରୁ ୧୨ ଜୋନ୍ରେ ନିର୍ଦ୍ଦେଶିକା ଓ ନିର୍ଦ୍ଦେଶକ ଅପ୍ରତିଦ୍ୱନ୍ଦ୍ୱିଭାବେ ନିର୍ବାଚିତ ହୋଇଛନ୍ତି। ଶେରଗଡ଼ ଓ ବୁଗୁଡ଼ାକୁ ନେଇ ଗଠିତ ୫ନଂ. ଜୋନ୍ ଏବଂ ହିଞ୍ଜିଳିକାଟୁ ୧୪ନଂ. ଜୋନରେ ନିର୍ଦ୍ଦେଶକ ପଦ ଖାଲି ପଡ଼ିଛି। ଦିଗପହଣ୍ଡି ଓ କୁକୁଡ଼ାଖଣ୍ଡିକୁ ନେଇ ଗଠିତ ୯ନଂ ଜୋନ୍ରୁ କଂଗ୍ରେସ ସମର୍ଥିତ ପ୍ରାର୍ଥୀ ନିର୍ଦ୍ଦେଶକ ନିର୍ବାଚିତ ହୋଇଛନ୍ତି। ଶାସକ ବିଜେଡି ସମର୍ଥିତ ପ୍ରାର୍ଥୀମାନେ ନିର୍ବାଚିତ ହୋଇ ସଂଖ୍ୟା ଗରିଷ୍ଠ ଥିବାରୁ ସଭାପତି ଭାବେ ବିଜେଡି ନେତା କୈଳାସ ରଣା ନିର୍ବାଚିତ ହୋଇଛନ୍ତି।
ସମବାୟ ସଂଘକୁ ୩ ମହିଳା ନିର୍ଦ୍ଦେଶିକା ଭାବେ ନିର୍ବାଚିତ ହୋଇଛନ୍ତି। ସେମାନଙ୍କ ମଧ୍ୟରେ ଝୁନୁ ଗୌଡ଼, ରାଜଲକ୍ଷ୍ମୀ ସାହୁ ଓ ମଞ୍ଜୁଳା ବଢ଼େଇ ଅଛନ୍ତି। ଏମାନଙ୍କ ମଧ୍ୟରୁ କାହାକୁ ଉପସଭାନେତ୍ରୀ କରାଯିବ ସେନେଇ ବିଚାର ବିମର୍ଶ ଚାଲିଛି। ବିଜେଡିର ସମବାୟ ନିର୍ବାଚନ କମିଟି ବୈଠକରେ ନିଷ୍ପତ୍ତି ନିଆଯିବାର ଜିଲା ସଭାପତି ସୂଚନା ଦେଇଛନ୍ତି। ବିସିସି ବ୍ୟାଙ୍କ ପରିଚାଳନା ବୋର୍ଡ ଉପସଭାପତି ପାଇଁ ଖୁବ୍ଶୀଘ୍ର ବିଜ୍ଞପ୍ତି ପ୍ରକାଶ ପାଇବାର କୁହାଯାଇଛି। ବ୍ୟାଙ୍କକୁ ୪ ମହିଳା ନିର୍ଦ୍ଦେଶିକା ଭାବେ ନିର୍ବାଚିିତ ହୋଇଛନ୍ତି। ତେବେ ଶାସକ ଦଳ ମନୋନୀତ ଗୀତାଞ୍ଜଳି ପ୍ରଧାନ, ବିଷ୍ଣୁପ୍ରିୟା ନାୟକ ଏବଂ ବିଦ୍ରୋହୀ ପ୍ରାର୍ଥୀ କୁନି କୁମାରୀ ଦାସ ଓ ସୁଷମା ବେହେରାଙ୍କ ମଧ୍ୟରୁ ଜଣେ ମନୋନୀତ ହେବେ। ବିଆରଏମ୍ସିଏସ୍ରେ ମଧ୍ୟ ଜଣେ ମହିଳା ନିର୍ଦ୍ଦେଶକ ଉପସଭାନେତ୍ରୀ ହେବେ। ତେଣୁ ଶାସକ ଦଳରେ ତର୍ଜମା ଆରମ୍ଭ ହୋଇଯାଇଛି।
