କଟକ ଅଫିସ,୧୧ା୧୧: ବାଲିଘାଟ ମାଲିକ ଓ ଠିକାଦାରଙ୍କୁ ଲକ୍ଷାଧିକ ଟଙ୍କା ଦାଦାବଟି ମାଗିବା ଅଭିଯୋଗରେ ଧଳସାମନ୍ତ ଭ୍ରାତାଙ୍କ ୩ ସହଯୋଗୀଙ୍କୁ ସିଡିଏ ସେକ୍ଟର-୨ ଥାନା ପୋଲିସ ଗିରଫ କରି ମଙ୍ଗଳବାର କୋର୍ଟଚାଲାଣ କରିଛି। ସେମାନେ ହେଲେ ପୂର୍ବତନ କର୍ପୋରେଟର ତଥା ଦେଉଳସାହିର ରଞ୍ଜିତା ବିଶ୍ୱାଳ, ଚାନ୍ଦିନୀଚୌକ ହାସନାବାଦର ରଣିଆ ଓରଫ ରଞ୍ଜିତ ସିଂହ(୪୯), ମାନସିଂହପାଟଣାର ସାଇକେଲ ନନା ଓରଫ ସୁଚିତ୍ର ରଞ୍ଜନ ମହାପାତ୍ର(୪୮)। ସେମାନଙ୍କ ଠାରୁ ଗୋଟିଏ ମୋବାଇଲ, ସ୍କୁଟି(ଓଡି୦୫-ଏନ-୯୩୧୦) ସହ ୧ ଲକ୍ଷ ଟଙ୍କା ଜବତ କରାଯାଇଛି।
ସୂଚନା ଅନୁଯାୟୀ, ଗିରଫ ସମସ୍ତ ଅଭିଯୁକ୍ତ ହେଉଛନ୍ତି ଗ୍ୟାଙ୍ଗଷ୍ଟର ଧଳସାମନ୍ତ ଭ୍ରାତାଙ୍କ ସହଯୋଗୀ। ଦୁଇ ଭାଇ ସୁଶାନ୍ତ ଓ ସୁଶୀଲ ଧଳସାମନ୍ତ ଜେଲ ଯିବା ପରଠାରୁ ରଞ୍ଜିତା ଏବଂ ସୁଚିତ୍ର ସେମାନଙ୍କ ଆପରାଧିକ କାରବାର ସମ୍ଭାଳୁଥିଲେ। ଦାଦାବଟି ଠାରୁ ଆରମ୍ଭ କରି ଟେଣ୍ଡର ଫିକ୍ସିଂ ଯାଏ ସବୁ ବୁଝୁଥିଲେ। କିଛିଦିନ ହେବ ସେମାନେ ସେକ୍ଟର-୧୧ ଗଡ଼ା କାଠଯୋଡ଼ି ବାଲିଘାଟର ଜନୈକ ଠିକାଦାରଙ୍କୁ ଲକ୍ଷାଧିକ ଟଙ୍କା ଦାଦାବଟି ମାଗିଥିଲେ। ସେ ଟଙ୍କା ଦେବାକୁ ମନା କରିବାରୁ ରଞ୍ଜିତା ଓ ଅନ୍ୟମାନେ ସମ୍ପୃକ୍ତ ଠିକାଦାରଙ୍କୁ ଧମକ ଦେଇଆସୁଥିଲେ। ଏପରି କି ବାଲିଘାଟରୁ ବାଲି ଲୋଡ୍ ଟ୍ରକକୁ ସେମାନେ ଅଟକ ରଖୁଥିଲେ। ସୋମବାର ରାତି ପ୍ରାୟ ୯ଟା ବେଳେ ଗିରଫ ତିନି ଅଭିଯୁକ୍ତ ପୁନର୍ବାର ବାଲିଘାଟକୁ ଆସି ଦାଦାବଟି ଲାଗି ଧମକାଇ ଥିଲେ। ବଟି ନ ମିଳିବାରୁ ସେମାନେ ଗାଳିଗୁଲଜ କରିଥିଲେ। ଏ ସମ୍ପର୍କରେ ସୂଚନା ପାଇ ଇନ୍ସପେକ୍ଟର ବିଜୟିନୀ ସିଂହ ସଦଳବଳ ଉକ୍ତ ସ୍ଥାନରେ ଚଢାଉ କରିଥିଲେ। ତେବେ ଅନ୍ଧାରର ସୁଯୋଗ ନେଇ ରଞ୍ଜିତା ଓ ସୁଚିତ୍ର ଗୋଟିଏ ସ୍କୁଟି ନେଇ ଚମ୍ପଟ ମାରିଥିଲେ। ମାତ୍ର ରଣିଆ ଧରାପଡ଼ିଯାଇଥିଲେ। ରଣିଆଙ୍କ ଠାରୁ ମିଳିଥିବା ତଥ୍ୟ ଆଧାରରେ ପୋଲିସ ମଙ୍ଗଳବାର ରଞ୍ଜିତା ଓ ସୁଚିତ୍ରଙ୍କୁ ଗିରଫ କରିଛି। ଗତ ୪ ଦିନ ମଧ୍ୟରେ ରଣିଆ ଓ ସୁଚିତ୍ର ବିଭିନ୍ନ ସ୍ଥାନରୁ ବଟି ଆଦାୟ କରି ଧଳସାମନ୍ତଙ୍କ ବାପାଙ୍କୁ ଦେଇଥିବା ଜଣାପଡ଼ିବା ପରେ ପୋଲିସ ସେକ୍ଟର-୬ ସ୍ଥିତ ଧଳସାମନ୍ତ ଭ୍ରାତାଙ୍କ ଘରେ ଚଢାଉ କରିଥିଲା। ସେଠାରେ ତଲାସି ବେଳେ ପ୍ରାୟ ୧ ଲକ୍ଷ ଟଙ୍କା ଜବତ ହୋଇଥିଲା। ଏ ନେଇ ପୋଲିସ ଏକ ମାମଲା(ନଂ.୮୭/୨୦) ରୁଜୁ କରିଛି।
