କାଠମାଣ୍ଡୁ,୨୧।୨ : ଚାଇନାର ଧମକ କାମ ଦେଇନି। ନେପାଳ ସଂସଦରେ ଆମେରିକା ଏମ୍ସିସି ପରିଯୋଜନା ବିଲ୍ ଆଗତ ହୋଇଛି। ଆମେରିକାର ଉଚ୍ଚାଭିଳାଷୀ ପ୍ରକଳ୍ପ ମିଲେନିୟମ ଚ୍ୟାଲେଞ୍ଜ କର୍ପୋରେଶନ (ଏମ୍ସିସି)କୁ ନେପାଳର ସଂସଦରେ ଉପସ୍ଥାପିତ କରାଯାଇଛି। ପ୍ରାୟ ତିନିବର୍ଷ ଧରି ଏହି ପ୍ରକଳ୍ପ ଲଟକି ରହିଥିଲା ।
ଚାଇନା ହସ୍ତକ୍ଷେପ ନୀତି ଯୋଗୁଁ ଏହି ବିଲ୍ ନେପାଳ ସଂସଦରେ ଉପସ୍ଥାପିତ ହୋଇପାରୁ ନ ଥିଲା। ଏହି ପ୍ରକଳ୍ପକୁ ନେଇ ଚାଇନା ଏବଂ ଆମେରିକା ମଧ୍ୟରେ କୂଟନୈତିକ ବିରୋଧ ଏବଂ ପ୍ରତିରୋଧ ଜାରି ରହିଥିଲା। ଶେଷରେ ଚାଇନାର ଧମକ ଦାକ ଦେଇନି ଏବଂ ଆମେରିକାର ଏକ ବଡ଼ କୂଟନୈତିକ ବିଜୟ ହୋଇଛି।
ନେପାଳର ଶାସକ ମିଳିତ ମଞ୍ଚର ସିପିଏନ ମାଓବାଦୀ, ଜନତା ସମାଜ ପାର୍ଟି ଏବଂ ରାଷ୍ଟ୍ରୀୟ ଜନ ମୋର୍ଚ୍ଚା ଭଳି କମ୍ୟୁନିଷ୍ଟ ଦଳ ଚାଇନା ଚାପରେ ସଂସଦରେ ଏମସିସିର ଉପସ୍ଥାପନ ନେଇ କ୍ରମାଗତ ଭାବରେ ବାଧା ସୃଷ୍ଟି କରୁଥିଲେ। ନେପାଳରେ ଅବସ୍ଥାପିତ ଚାଇନାର ରାଷ୍ଟ୍ରଦୂତ ହୋ ୟାନକିଙ୍କ ଠାରୁ ଆରମ୍ଭ କରି କମ୍ୟୁନିଷ୍ଟ ପାର୍ଟି ଅଫ ଚାଇନା (ସିପିସି) ବୈଦେଶିକ ବିଭାଗର ମୁଖ୍ୟ ସାଙ୍ଗ ଟାଓଙ୍କ ପକ୍ଷରୁ ଲଗାତାର ଚାପ ପଡୁଥିବା ସତ୍ତ୍ୱେ ନେପାଳ ସଂସଦରେ ଏମ୍ସିସି ଆଗତ ହୋଇଛି। ନେପାଳର କମ୍ୟୁନିଷ୍ଟ ନେତାଙ୍କ ଉପରେ ଚାଇନାର କ୍ରମାଗତ ଚାପ ଯୋଗୁଁ ଆମେରିକା ଏନେଇ କଠୋର ଆଭିମୁଖ୍ୟ ଗ୍ରହଣ କରିଥିଲା।
ଆମେରିକାର ସହକାରୀ ବୈଦେଶିକ ସଚିବ ଡୋନାଲ୍ଡ ଲୁ ଫୋନ୍ରେ ନେପାଳର ସମସ୍ତ ଦଳର ବରିଷ୍ଠ ନେତାମାନଙ୍କୁ ଖୋଲାଖୋଲି ଭାବରେ କହିଥିଲେ ଯେ ଯଦି ଏହା ଫେବୃଆରୀ ୨୮ ସୁଦ୍ଧା ସଂସଦରେ ପାରିତ ନ ହୁଏ ତେବେ ଚାଇନା ଏଥିରେ ପ୍ରତ୍ୟକ୍ଷ ହସ୍ତକ୍ଷେପ ବୋଲି ବିବେଚନା କରାଯିବ ଏବଂ ନେପାଳ ଉପରେ ଆମେରିକା ଏହାର ନୀତି ଆପଣାଇବ। ଏହାପରେ ନେପାଳ ସଂସଦରେ ଏହି ବିଲ୍କୁ ଆଗତ କରାଯାଇଛି
