ମାଞ୍ଚେଷ୍ଟର, ୧୦।୮- ନିକଟ ଅତୀତରେ ଦକ୍ଷତା ଅନୁସାରେ ପ୍ରଦର୍ଶନ କରିପାରି ନ ଥିଲେ ହେଁ ଏବେ ଅବସର ନେବାକୁ ତାଙ୍କର କୌଣସି ଯୋଜନା ନାହିଁ ବୋଲି ଇଂଲଣ୍ଡ ଫାଷ୍ଟ ବୋଲର ଜେମ୍ସ ଆଣ୍ଡରସନ ପ୍ରକାଶ କରିଛନ୍ତି। ୨୦୨୧-୨୨ ଆଶେସ ସିରିଜ ଖେଳିବା ତାଙ୍କ ଇଚ୍ଛା ବୋଲି ସେ ସ୍ପଷ୍ଟ କରିଛନ୍ତି। ପାକିସ୍ତାନ ବିପକ୍ଷ ପ୍ରଥମ ଟେଷ୍ଟରେ ସେ ୯୭ ରନ ଦେଇ ମାତ୍ର ୧ ଉଇକେଟ ପାଇଥିଲେ। ଚଳିତ ବର୍ଷ ସେ ୩ଟି ଟେଷ୍ଟ ଖେଳି ସାରିଥିବାବେଳେ ତାଙ୍କ ବୋଲିଂ ଆଭରେଜ ୪୧.୧୬ ରହିଛି। ତେଣୁ ୩୮ ବର୍ଷୀୟ ଏହି ଫାଷ୍ଟ ବୋଲର ଚଳିତ ବର୍ଷ ଶେଷରେ ଅବସର ନେବା ସମ୍ଭାବନା ଅଛି ବୋଲି ଗୁଜବ ଉଠିଛି। ଇଂଲଣ୍ଡ ପକ୍ଷରୁ ସର୍ବାଧିକ ଟେଷ୍ଟ ଉଇକେଟ ହାସଲକାରୀ ଆଣ୍ଡରସନ କହିଛନ୍ତି ଯେ ଏବେ ତାଙ୍କର ଅବସର ଯୋଜନା ନାହିଁ। ସେ ଏବେ ମଧ୍ୟ ଟେଷ୍ଟ ଖେଳିବା ପାଇଁ ଭୋକିଲା ଅଛନ୍ତି। ଗୋଟିଏ ଖରାପ ଗେମ୍ ଖେଳିବାଦ୍ୱାରା ବିଭିନ୍ନ କଥା ଶୁଣିବାକୁ ମିଳୁଛି। ଏହା ଠିକ୍ ନୁହେଁ।
