ନୂଆଦିଲ୍ଲୀ,୬।୭(ପି.ଟି.): ୟୁନାଇଟେଡ୍ ଆରବ ଏମିରେଟ୍ସ (ୟୁଏଇ) ଓ ଶ୍ରୀଲଙ୍କା ପରେ ନ୍ୟୁଜିଲାଣ୍ଡ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆୟୋଜନ କରିବାକୁ ପ୍ରସ୍ତାବ ଦେଇଛି। ଏନେଇ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଜଣେ ଅଧିକାରୀ ସୂଚନା ଦେଇଛନ୍ତି। ଅଷ୍ଟ୍ରେଲିଆରେ ଅକ୍ଟୋବର-ନଭେମ୍ବରରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ ସ୍ଥଗିତ ହେବା ନେଇ ଘୋଷଣା ନିକଟତର ହେଉଛି। ଫଳରେ ଆଇପିଏଲ୍ ପାଇଁ ସୁଯୋଗ ସୃଷ୍ଟି ହୋଇଛି।
ଅନ୍ୟପଟେ ସେପ୍ଟେମ୍ବର ଶେଷ ଓ ନଭେମ୍ବର ଆରମ୍ଭରେ ଆଇପିଏଲ୍ ଆୟୋଜନ କରିବାକୁ ବିସିସିଆଇ ନଜର କେନ୍ଦ୍ରୀଭୂତ କରିଛି। ଭାରତରେ ଆଇପିଏଲ୍ ଆୟୋଜନ କରିବାକୁ ବିସିସିଆଇ ପ୍ରଥମେ ଚାହିଁବ। କିନ୍ତୁ କୋଭିଡ୍-୧୯ ମହାମାରୀ ପାଇଁ ଏହା ସମ୍ଭବ ମନେ ହେଉନାହିଁ। ତେବେ ୟୁଏଇ, ଶ୍ରୀଲଙ୍କା ଓ ନ୍ୟୁଜିଲାଣ୍ଡ ଆଇପିଏଲ୍ ଆୟୋଜନ ନେଇ ପ୍ରସ୍ତାବ ଦେଇଛନ୍ତି। ବୈଠକ ବସି ଏ ନେଇ ଆମେ ନିଷ୍ପତ୍ତି ନେବୁ। ବ୍ରଡ୍କାଷ୍ଟର ଓ ଦଳଗୁଡିକ ସହିତ ଆମେ ଆଲୋଚନା କରିବୁ ଓ ଏ ନେଇ କୌଣସି ବୁଝାମଣା କରାଯିବ ନାହିଁ ବୋଲି ଅଧିକାରୀ ଜଣକ କହିଛନ୍ତି।
ଅତୀତରେ ଆଇପିଏଲ୍ ଭାରତ ବାହାରେ ଖେଳାଯିବାର ଉଦାହରଣ ରହିଛି। ଦେଶରେ ସାଧାରଣ ନିର୍ବାଚନ ପାଇଁ ୨୦୦୯ ସଂସ୍କରଣ ଦକ୍ଷିଣ ଆଫ୍ରିକାରେ ଖେଳାଯାଇଥିଲା। ସେହିପରି ୨୦୧୪ରେ ମଧ୍ୟ ସମାନ କାରଣ ପାଇଁ ୟୁଏଇରେ ଆଇପିଏଲ୍ ଆୟୋଜନ ହୋଇଥିଲା। କିନ୍ତୁ ୨୦୧୯ରେ ନିର୍ବାଚନ ସତ୍ତ୍ୱେ ବିସିସିଆଇ ଆଇପିଏଲ୍ ଆୟୋଜନ କରିବାକୁ ସକ୍ଷମ ହୋଇଥିଲା। ଆୟୋଜନ ଦୌଡ଼ରେ ୟୁଏଇ ସର୍ବାଗ୍ରେ ରହିଛି। ଶ୍ରୀଲଙ୍କାରେ ଆୟୋଜନ ହେଲେ ଖର୍ଚ୍ଚ କମ୍ ହେବ। ଅନ୍ୟପଟେ ନ୍ୟୁଜିଲାଣ୍ଡରେ କରୋନା ପ୍ରଭାବ କମ୍ ରହିଛି। ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ସାଢେ ୭ ଘଣ୍ଟାର ଫରକ ରହିଛି। ତେଣୁ ସମସ୍ୟା ରହିଛି। ଖୁବ୍ଶୀଘ୍ର ଏ ସଂକ୍ରାନ୍ତରେ ନିଷ୍ପତ୍ତି ନିଆଯିବ ବୋଲି ଆଶା କରାଯାଉଛି।
